Гьайни сенни октябрьни 27-чил’ цIаIхбышди агъсаххъалыс РаIгьимов ТофикIыс МаIгьаммадни духайс «Рутул районна шарафукана ватандаш» звание гьувы. Ман звание джуни гьайни сен ыхьайни 90 сенни юбилейква алаакъа гьаъы.

ТофикI дайий едике ЦIаIхни хивее кIалхозчийни хизанее едике ыхьа . Манбы йишди гьоIкуматыс экономикайни сардан четинин сенбы ыхьа. ГьоIкуматыл’ хини тасарруфатын коллективизацие аIлгьаана вахт вухьа. Мысвалла, мыкIаалла вухьа . Манчихъа ил’дяакы , МаIгьаммад дайийе джуна хаIбна хизан доланмишавъуна.
Хъийгъа ХаIбна Ватанна даIвъий гибгъыл. ТофикI РаIгьимовна ушахийвалла мани девырылхъа хъабы. Манкъвее джуни тай-тушерше хьинне адамершина иш гьавъу. Сабара сенбы аIрайле адкIынле хъийгъа , манкъуна ед’ раIгьматыххъа аркIын. ДжитIада мана гыргыни ыIмрени дагъам­ийвал’бышике илгъечIуна. «Гьаркьул’» деш. цIедда мактаб таамау , гойне техникуме хъаIдхъы. ТофикI дайийе джуна авхуна ыIмыр ЦIаIхни сельсоветыква (гойне администрациейква) багъламишавъу. ХаIдда сенбына мана мани ташкилатна хааIрна бухгалтерна ишлемишхьа. ЦIаIхни сельсоветеехъа ёкьубле хив ( ЦIаIх, Миххьей, ХыIягъ, Хьойик’) эчIу. Мани ишиква барабарра ТофикI РаIгьимов «Правда» кIалхозна парторг ыхьа.
Манкъун энки югун хасият арына мигьман къарышламишаый ыхьа. Манкъуни хааъад гней идёдхьунна инсан яраб районе ыхьее. КьоIдъэсын манкъун югун хасият — гьаммаше хивын тераф аххъый ыхьа . Хьебыдъэсыныд – ТофикI дайийе маIърафатыквана, хааIрна-кIыл’на хъуваацIана хизан джуни ёлдашиква Гул’пери халайква хаIбхъавъу. Гыргын югун хасиятбы гьаIшде джуни духйешилхъа, йишбышилхъа илгъечIу. Гьел’бедти, манкъуни ишис, гьаракатбышис районни къуллухчерше гьаммаше ахтыйна кьиймат гьувына.
ТофикI дайийи пенчиехъа хъигъечIуйле хъи­йгъа, кочмишхьа хъары МаIгьачкъалее ешемишехьи ворна.
Рутул районни хаIру­нкъуни Давуд Сулеймановни амурыква гьайни дёлесийвале манкъус «Рутул районна шарафукана ватандаш» звание ва пайис дамгъайкван къизлени хьинекван хинджал гьувы. Давуд Сулеймановни мислягьаIтыква манбы гьелес ТофикI дайийни хаахъа Рутул районни халкьни иджласна садры Назим РаIгьимов ва ЦIаIхни администрациейна хааIрна Вагиф АIлиев абы. Мани маджлисеехъа ТофикI дайийн чодж, духйе, йишбы, невабы сабы. Вагиф АIлиеве Давуд Сулеймановни дойиле звание гьелена амур хъаIбхъы ва агъсаххъалыс пай гьувы.
Районни чIакIынбышис миннатдарийвалла гьоолен чыхышбы чодже ХанмаIгьа­ммад РаIгьимове, духйеше: МагьаIммадраIгьим чоджее, Нияз, Джагьангир, ШагьыIсмаил РаIгьи­моварше гьаъы.
Маджлис болни суфраныл’ гювъур, уфтанни гафбышиква таамувхьа.