ОIтмишхьайни уIл’джумее йишди кIазетын ишчер Рутулни районехъа, гьабкIын ва джигабышил’ кIазет хъаIдаххъанбышиква горушмишивхьа, мабышди ешайишна вазият ва дагъамийвал’бы ацIахьа, гойнед цIедни сенийсын кIазет одкIунийни гьаIкIее ишбы къаджу.
ЦIеддыйни йигъыл’ ши Рутул вухьа ва мааъаб районни хааIрынкъуква Давуд Сулейманувыка ва сабара ташкилатбышди чIакIынбишиква горушмишебхьа.
Районни хаIрынкъусана йишди миллетыква багълыданан дагъамийвал’бы ашкарау ва мана кIазетын вуккеккани ишиква танышаы.
Д. Сулеймановни увгьойка, хаIдданан дагъамийвал’бы джукIле ацIа водунбы ва манчиле ооъаб ишлемишоохьи вобунбы. Гойне манкъве сабара хиваршди ва ташкилатбышди чIакIынбышиле наразийра ворнава увгьо. Районни хаIрункъве кIазетни ишис кьиймат гьувы ва манчис подпискайква хыл’авхъас джуваб гьуво.
Гойне ши районни сабара тешкилатбышее вухьа ва мани горушбышин сайид «Рутульские новости» кIазете мани йишди достаршиква чей илёдгъу, ишбышди гьаIкIее гаф гьавъу.
Рутулгъанче йишда йаIхъ Сувал’ни магьаIлылхъа вухьа ва мааъад эгьес эйхьи гыргыни администрациебышее, мактаббышее ва медни идарабышее горушбы гьаъу. Йишди хиваршее аIхрейни вахтал’ сабара югун ишбы къаджу вод ва мани карбышиле ши гейб шадеебхьа. Хиваршее цIедын хайбы аляъу, манзикбы, зияратбы ремонт гьаъу, йаIххъаIр аIкь хъау ва ЦIаIхенче Хьойикехъана йаIхъ эгьес эйхьи асфальт кIяъасхьинне хъавъу воб ва манчини дибыкке машин къиъмехьаджинва бетонын гьаIсарбы гиххьы вод. ГьаIшде манче машинбы раIгьатда ийкарас эхьи.
Ши 8 ноябырыл’ мичIееб ЦIаIхни мактабеехъа гьабкIын, гойнеб Муслагъни, Мишлешни, Джинягъни мактаббышее, клуббышее, ушахаршди бахчее ва джамаъаIтыква горушбы гьаъу. Мааъаб ши абына сабаб манбышис агъмишавъу, гойнед джохъад водни дагъамийвал’бышилхъа гьибхьыр.
Хъийни йигъыл’ йишда сафарий МиххьегIни, Гыл’мецIни ва Лекни хиваршехъа вухьа ва мааъаб джаIмаъатыква горушмишебхьа, абына макьсад агъмишавъу.
Гыл’мецIадын джамаъаIтыкван горуш хивни гима ыхьа ва махъа хивна администратор, мактабна директор, почтальон ва сабара хивын агъсаххъалар сабы вухьа. Мани горушее Сувал’ни магьаIлылни «Инсан» фондни хаIрынкъве АIсадуллагь гьаIджее джамаъаIтылхъа кIазет окIнева мураджият гьаъу.
Манче ши Лекни хивехъа АIсадуллагь гьаIджийква саджигее гьабкIын ва мани хивее мактабехъа, ФАП-хъа, манзикахъа эбчIу, гойнед хивни адамершиква горушмишувхьа. Лекна хив аIкьана вухьейиб, шас маадын горуш гейд кьабыл’хьа. ДжитIада эгьес, йишда сафарий югна вухьа. Фыкреехъа алеетIуйн ишбы гьаыйнбы. Умуд вобна, 2025 сенийсын подпискад писин ихьес деш.
