СВО гидгъылыйн хьебыдъэсын сен быкырехьи. Къийна Россиейни ярахни кьуввабыше Донбассыл’ гьаракатука гьар йигъыл’ вурушбышиква украинайни къулдураршике хивар къаттихьанаъа водунбы. Душманарше гьихъа джо аххъыйн торпахбы, позициебы хъели водунбы.
СВО цIаIхни халкьни джаванаршин иштыракыд хаIдын водун. Манбыше къийна джони гьамбазарше хьинне джона Ватан, Россиейна садибыйвалла къорамишааъа. ОIлкайн геледжагъ югда къаджесдимее, джона дирибашийваллайий джомардийвалла гьаагва.
Къийнийна йишда гаф Ватаннимее джан гьелес гьаIзирни игитни гьаIкIеена вухьес. Мана Росгвардиейна эскер Давудов Тамирлан Рамазанна дих ворна.
Т. Давудовна кок Гыл`мецIни хивейнче вобна. Гойне манбыше Дербентни шагьарее юрд абчы. Тамирлан едике I992-ъэсди сен Дербентни шагьарее ыхьа. 2008-ъэсди сен манкъве шагьарын хьебыдъэсын мактаб быкырау. 20II-202I-ъэсди сенбышее полицией ишлемишхьа. ЙыцIыдле сенна мааъар чалышмишхьайле хъийгъа, Тамирлане джуна иш бадалавъуна. 2023-ъэсди сен манкъве санаъаIтбы Росгвардиейхъа хъуво. Гьаманиджад сен цIеддыйн контракт одкIун.
Тамирлан СВО гидгъылни сабара вахтыле гьамбазаршика саджигее махъа аркIын. Запорожьейни вилаетыл` аIл`гьаани вушубышее иштыракау. Мааъад къаджейнчикейий къайихьыйнчике гаф гьааъанкъаI Тамирлане увгьойн: «ДаIвъийс миллетчер хаIдда сенбына гьаIзироохьи вухьа. Манбыше джон позициебы утIумаъасдимее сангарбы гьидкIур. Силагьый техникIад алищы ыхьа. Манчихъа ил`дяакы, йишди эскерарше къийна хаIдданан торпахбы йыIкьаIлхъа алятIу водонбы. ГьаIшде манбышди хыле сабара районбыйий хивар аху водунбы. Манбыд, алятIасынбы. Ши авхъуна йаIхъ гьаIкIена вобна. ГьаIкIени йаIххъыл’ ал`гьааIна гьаммаше гъамхьесда».
Тамирлан джуни гьамабзаршикIле, командираршикIле джомард хьинне ацIа. Манкъуни баджарухыс манбыше гьаммаше ахтына кьиймат гьооли. Мани сардан манкъухъад хаIдда гьокуIматни ва командираршини сураке алятIуйн наградабы водунбы.
Къийна Тамирлан джуни гьамбазаршика хъары частыл` ворна. Мана гьар хьебни вузале СВО гьайкIан. Сабара вахтаке мана мер махъа оIххъаIс гьазирехьи ворна. Манкъуни увгьойка, джуни гьамбазарше вудж мааъар гозетяъа ворна.
Тамирланыхъаб гееб уфтанна хизан вобна. Манкъве джуни ёлдашыка саджигее хьебыйре ушахар чIакIы хъааъа. Дек` СВО хъарый гыргынкъуле хаIрра ушахарше гозетяъа. МанбышикIле ацIан, деккее игит хьинне Ватан къорамишааъа вухьай.
Гьелбетти, духайле дек’ Рамазан чоджий ва ед’ Земфира баджийир наIрагьатба вобунбы. Манбыше йигъыс Тамирланна фыкыр цIыцIааъа. Йигъ аIрее адчы, манкъука йишонеебахьенбы. Маннкъуна вазият ваацIавхьайле хъийгъа, йикI динджехьен.
ГьаIшде гыргынкъуна мурад даIвъий таамувхьай вобна. Умуд гьааъана, ман йигъ геджвалилхъа ахвас деш ва йишди замаанайн кьаIгьраманар сагъ-саламатба хайбышейхъа, хизанбышейхъа савкIаласынбы. Гьар карахъад аIхир эйхьен.
