Тезе 2025-ъэсын сен гидгъылыйква, Волгоградни шагьареенче спортыква багълыбанана шадна хабар хъабы.
ШакIле ацIан, къийна Волгоградни шагьарее хаIбба йишди миллетин инсанар ешемишоохьи вобунбы. Мааъаб гьам Дагъыстанеенче, гьамыд Азербайджангъанче кочмишхьайн хизанбы водунбы. Хъодкуйн сай манбышин шахъад дешин, амма йишди увгьойква кIылба са 300 хизан вухьесда. Мааъаб едике вухьайнбы, гьаIшде даватбы гьаъы, хизанбышин саIгьыбар вобунбы. Волгоградхъа ва медни шагьарбышеехъа йишин инсанар гуджнаква кочмишебаххьи ХХ асырни аIхрее, ХХI асырни кьома гибгъыл. Манчина сабабыб хизанбы доланмишаъасдимее къазынджихъа хъигьна хъигъебчIуй вухьа. Манке Дагъыстанни Республике, Азербайджан иш- джигабы еттыгъда ыхьа деш. Махъа кочмишивхьайни хизанбышин хаIддананбы къуIванан мебель гьаыйква маIшкьулебаххьи гибгъыл. Цедда манбыше хурун-хурун цехбы ачмишаъы, гойне иш къулайлхъа гибхьы, алверын чархв гьаIррамишехьи гидгъылмее манбыше чIакIын мебель гьаъан цехбы, фабрикабы ачмишаъы. Манчиле гъайре, утIумни мебеликва маIшкьулебаххьи гибгъыл. Къийна гьарни цехыхъаб чин лышан (бренд) водун. Анджах Волгоград ешемишоохьен гыргын цIаIхбы дешобунбы мебеликва маIшкьулебаххьи. Манбышди аIрее югун дохтурарыб, инженерарыб, маъаIллимарыб, спортсменарыб, къасабчераб, шофирарыб, алверчераб вобунбы. Гьарынкъвее джусын къык гьалални заIгьматыква къазанмишаъа. Мааъаб шахъаб йишда диаспора вобна. Манбыше миллетыква багълыданан суалбы илякка, дагъамийвалеехъа гябкIыйнкъаI югни-писди йигъыл’ сана-санкъус кумагбы гьаъа, байрамбы, маджлисбы алгъайгьи, «Нур» кIазетыс, «Лачын» журналыс подпискабы гьаъа, тезеба гьихъа вуIххъани джегьил’ спортсменаршис кумагбы гьели. Шахъаб мани шагьаре меценатыйвалла гьааъан ишкарар вобунбы . Манбышда сайир АIгьмадов ДжуIма Исакьна дих ворна. Мана Волгоградни шагьареена ЦНКА-на эл’чий ворна. Манкъве оIюнбышди баIсбышее гъамувхьайнбышис, дареехъа гирхьуйни цIаIхийгъалийс гьаммаше хыл’авхъаахъана.
Гьайни элейс манкъвее джуни офисее ЦНКА-ни дойиле оIюнбышди баIсбышее гъамувхьайни цIаIхни ва агъулни миллетни джегил’ спотсменаршис пайис пылыкван кIанвертбы, грамотабы ва китаббы гьувы. Джуни табрикаааъани чыхышее гьичIобкырыйква маIшкьулоохьени спортсменаршис угъурбы а1рзуламишаъы ва джони тренерыс ахтыйна кьиймат гьувы. Пайис гьувойни мани китабее Дж. АIгьмадовна « НягьаIрий спортсмен ихьес ыккан» гьаIкIеена макьалеб вобна. Джегьил спортсменаршина тренерыр дагъыстанни агъуларшини миллетна дих ворна.
«Нур» к1азетни редакциейн спортсменаршис, джони тренерыс югун гьаIракатбы аIрзуламишаъа, ДжуIма АIгьмадовыс джанана сагъвалла, баракат аIрзуламишааъа. Гьасре медни ишкарарше манкъуке дарс алетIеджин.
