Оlлкайн геледжагъ, манчин гьихъа адкlыний ацIааликвани ва югни саIнаъаткараршике аlсылыда. Нимее гуджнакван, билигыкван телябабы вухьее, гьманмегад йишин къийхъыйн йигъ ачухын ихьес.
Аlхырейни сенбыше Дагъыстанее югун ацlаал’ алятlас чалышмишоохьени телябабишин сай кьат-кьатна хаIдхъыхьа. Манбыше Дагъыстанни, Россиейни джурабаджур шагьарбышее аали мактабыше хъаIдаххъа. Телябабыше диплом алябтIуйле хъийгъа, югни къуллухбишилхъа хъавайли. Манбышди джаргее цIаIхни миллетын джегьилерыб вобунбы. Югун билиг алятIас чалышмишоохьенбышда сайир ДГТУ хьебыдъэсди курсна теляба Керимов Керим ворна.
Керим 2004-ъэсди сен МагьаIчкъалайни шагьарее едике ыхьа. Манкъве шагьарни № 10 нумранан мактабы югни кьийматбышиква таамаъы. Гьаманиджад сен санаъаlтбы ДГТУ – хъа хъуво. Мана компьютерный технологие ва энергетикайни факультетейхъа кьабыл’хьа.
Керимни увгьойка, Техник университетей хъаIдхъый джуна мурад вухьа. Компьютерын технологиейн азыбы алятIуй, геледжагъыл’ манчиква багълыда ишилемишхьесын захъад хаIдын гьавас водон. Манчиле гъайре, къийна зы ацIаал’ аляатIани университете гьихъа йизди хааIрни чодже хъаIдхъы. Манкъве чIарани дипломыква университет быкраы. Занар манкъуни йаIххъын ал’гьааIс чалышмишехье.
Керимын до университете югда хъаIдаххъани телябабышди джаргее водун. Манкъухъад хъаIдхъыйква багълыда университетни сураке алятIуйн хаIдда наградабыйий грамотабы водонбы. Къийна манкъве Правительствайн стипендия аляатIа. Гьинчиле сабара вахтна гьихъа мана джуни гьамбазаршиква саджигее МаскIавни шагьарее ыхьа. МаIгьдын имканбы югда хъаIдаххъани телябабышис университетын гьуво. ГьаIшде Кериме хъаIдхъыйле гъайре унверситетын алгъайгьени джурабаджура йигъынджагъбышее, тадбырбыше гьаIракатыква иштырака. Манчини аIрайл’ кьомана джига спортын авхъаххъа. Керим университетни баскетбольный дестейна уIзву ворна. Мана джуни дестейква республикайни аали мактабышди аIрайл’ аIлгъаани турнирбыше иштырака.
Керимыке хъаlдхъаlс дагъамдаева, хъидгlын гьаъаннкъаl, увгьойн: «Захъад хъаlдхъыйква багълыдана мысаджаб дагъамийвалла вухьана деш. Зы гьаммаше манчихъа хаlбна фыкыр гьуво. Къийнад мани сентыл’ а’лгьааI ворна. Гойне хьиннед, хъаIдаххъани инсаныс ненкеджад хъаIдхъый дагъамда дешин. Телябайн гьаммаше гьихъа макъсад гивхьес вуккан. Кыл’ба-кIыл’ба манчилхъа гьивхьараъс вуккан. Ненкеджад кIелихаъанас ыккан деш, югда хъаIдаххъани телебайхъад геледжагъыл’ иш авайкесын имканбы водонбы».
Кериме хъаlдхъыйле савагьийда, маданиятылхъаныд хаlдын гьавасыд гьагван. Манкъухъад урусни мизел’ шечIбы ойкIанан баджарагъ водон. Манкъве Россиейни джаван шааирарше алгъайгьени йигъынджахбышее иштиракыд гьаъан. Манкъуни одкIунийбышис шечIбы хъаIдаххъанбыше ахтына къиймат гьооли.
Йишди ихтелетни аIхырее Кериме гыргын телебабы джони байрамыква, джунн гьамбазар, цIаIхни миллетын аали мактабыше, техникIумбыше, колледжбыше хъаlбаххъан телебабы табрикавъу. Маlкъвее гыргынбышис джанан сагъвалла, хъаlдхъее угъурбы аlрзау.
Шинад йишди сурале, Керим ва авхуйн йишди элен телебабы джони байрамыква табрикааъа.
