АIхырейни вахтал’ цIаIхни халкьын СВО воохьен игитер гьокуIматни ва джамаъаIтни ташкилатбышди сурале джурабаджура мукафатбышис, медалбышис лайикьба къавджу. 

Гьайни йигъбышее сайиб шадна хабар редакциейхъа хъабы. Мана хабар хааIрна прапорщик МагьаIррамов ХаIнмагьаIммад Нажмудинни духайс Дагъыстанни кьаIгьраманын до гьувойка багълыба.
Х. МагьаIррамове Вольский военный училище таамауйле хъийгъа, Екатеринбургни шагьарей ишлемишехьи гиргъыл’. СВО гидгъыыйква , мана гьамбазаршиква Луганскни Халкьни Республикейхъа йаIххъыляу. ГьаIшдер мана мааъар вурушмишехьи ворна.
ХааIрна прапорщик ХаIнмагьаIммад МагьаIррамов хаIдданани медалбышда есси ворна. Гьинчиле сабара вахтна гьихъа мана Суворовни» медалыс лайикьра къаджы. ГьаIшде манкъуни коксийл’ гивадхынни Дагъыстанни кьаIгьраманни хаIнейн йишди игитис гьалед хаIдын ярашугъ гьелес.
Х. МаIгьаррамове алятIуйни медалыква табрикаъасдимее ши манкъуква алакьа аххъас чалышмишувхьа. ГыргынкъукIле ацIани сабаббышихъа гора, манкъукана гаф гьааъасда имкан вухьа деш. Манчихъа ил’дяакы, кьаIгьраманни медална барака ши манкъуни деккис Нажмуддин чоджийс ва ед’ Севил’ баджийс гьавъу. Манбышди увгьойка, ХаIнмагьаIммад СВО хъидяйлен сен быкырхьа. ГьаIшде мана истираIгьатыс хъалесда вахтобна. Ши манкъун хъарый гозетяъа. Табрик гьавъуйхъа гора, сагъба гьааъанбы.
«Нур» кIазетни редакциейн хааIрна прапорщик МагьаIррамов ХаIнмагьаIммад Нажмудинна дих, манкъун делесинбы, гьамбазар Дагъыстанни кьаIгьраманни доюква табрикааъанбы. КьаIгьраманыс джанана сагъвалла, СВО угъурбы аIрзаъа.