2025-ъэсын сен Россиейл’ Ватан кьорамишааъанбышин сен водон. МаIгьбына кьарар РФ-ни Президенте Владимир Путине гьуво. Манчиле гъайре гьайни сен ХаIбна Ватанна даIвъий таамувхьайни 80 сенис къадсырыйн тадбырбы ихьес.
Ватан кьорамишавъуй, манчина садибийвалла гьувааджий гьар дюнйейлхъа арыйни инсанын бордж водон. Россиейни таарыхее хаIдданан дагъамын йигъбы растына хъады. Манбы йишди хаIнни оIлкайни эксина, манчин къурулуш дагъылмишаъасва гьаъан ишбы водонбы. ХаIбна Ватанна даIвъий 80 сенна гьихъа быкырувхьейиб, къийнад дюнйейл’ саакитийвалла дешда. Йишди деккярше фашистаршис, манбышди тарафдараршис гьувойни дарсын сабаранбышис эсер гьуво деш. Манбыше меб Россиейквана алябтIуна. Гьини элеес аIджафарше кьоIни чубахьиннени миллетбышди арайл’на абчу.
Хьебыдъэсын сен быкырехьи СВО гидгъылыйн. Украинайни террористарше йишди гьоIкуматыс джона гудж гьаагвас гьаракатаъа. Мани карее манбышис хаIдын кумаг Авропайни оIлкабышейий Америкайн гьели. Манчихъа ил’дяакы, манбы йыIкьаIл’ аахва вобонбы. Урсиятни ярахни кьуввабыше украмиллетчершис аман гьооли дешобна. Къийна йишди кьаIгьраманарше кIылда-кIылда душманаршике торпахбы азадаъанбы.
СВО йишди эскерарше гьаагвани джомардыйвал’ни гьаIкIее ши «Нур» кIазете хаIдда макьалабы гьуво. Геледжагъылиб мана иш давамааъасда. Чалышмишувхьесынбы манбышди игитийваллайна хабар инсанаршилхъа гьивхьарааъас.
Росгвардиейни кIыл’ни сержанте АIгьмадов Расул Ил’ясни духее Ватан къорамишааъанбышин саIнаъат гьаъан хаIдда сенбы водонбы. Расул едике 1988-ъэсди сен Баш-МуIхахни хивее едике ыхьа. АIрейнче сабара вахт абкIынмее, манбышди хизанын дюзилхъа, Камбулатни хивейхъа коч гьау. Мааъаб тезе юрд абчу. 2005-ъэсди сен Расуле Камбулатын йыIкьнекин мактаб быкырау. Манчиле хъийгъа эскерийвалейхъа аркIын. 2006-2008-ъэсди сенбышее джегьиле Ватанни гьийдын бордж хъуво, хаахъа саркIыл’. 2012-ъэсди сен манкъве Грозныйни шагьарее Росгвардиейна эскер ихьесдимее цIеддыйн контракт одкIын. Мааъад Расулыс стрелок- пулёметчикын къулайбы хаIдхъыхьа.
Расул АIгьмадове 2023 сениле хъийгъа СВО иштыракаъа. Сений сурани аIрее мана мааъар хьулехьейр ыхьана. Манкъве гьамбазаршиква саджигее Херсонни вилаятни аллани вурушбышее хаIбна игитийвалла гьаагу.
Заквани горушее Р. АIгьмадове увгьойн: «Йиздимее Ватан аIзизба вобна. Манчина садибийвала гьувааджес зы гьаммаше гьаIзирра. Къийна заквасана саджигее хаIбба Дагъыстанейнчен гадебы вобунбы. Манбышди аIрайл’ цIаIхни миллетын игитерыб кIыл’ба дешобунбы. Ши къийна миллетчершиква мубариза вуккекка. Манбы фашизмайн тарафдарар вобунбы. Манбышда кок юзмишааъасда. Дешхьей, геледжагъылид манбыше шас диндж гьелес деш».
Расулни гьунарбышис гыргынбыше, командирарше, гьамбазарше ахтына кьиймат гьооли. Мана гьар вахтал’ джулхъа тапшырмишаийн ишбы быкыраъас, гойне хьинне кумаг гьелес гьаIзирра ворна. Ман джуваббы гьоIкуматын гьувойни наградабыше тасдикьаъа водонбы.
Къийна Р. АIгьмадов сабара гагьнани истираIгьатыс хаахъа хъары. Мана уфтанни хизанна саIгьиборна. Расул ёкьни ушахна дек’ ворна. Аллагье джо гьуваадженбы. Сабара йигъбышиле хъийгъа, мана мер частылхъа сакIалас.
СВО воохьени гадебышда сагъвалла вухьена. Манбы гедждевхьа, хайбышейхъа сагъба-саламатба савкIалас кьисматаъан.
