ЦIаIхбы ыIлимылхъа гьавасыкван инсанар вобунбы. Шахъаб гьар ыIлимыква маIшкьулоохьен ааIлимар гьаммаше вухьайнбы, вобунбы, ин ша Аллагь, мебыб вухьесынбы. Манбыше садджу джон до деш, манчиле гъайре, джони миллетын, районын республикайн до ахтыхъаъа. Манбыше одкIунни ыIлим ишбышике хаIдын хайир гьоIкуматбыше алеетIу. Манбышда сайир, шакдена, техники ыIлимбышда доктор, Дагъыстанни девлет университетни физикайни факультетни «Инженерная физика» кафедрайна профессор Бабаев Баба Джабраил’на дих ворна.
Баба Джабраиловиче гьар сен цIаIхбышди мактаббышди ушахаршини аIрее физикайкен олимпиада алгъайгьи . Гыргын манчиква багълыданан заIгьматбы , харджийбы манкъвее джулхъа аляатIа. Шаца ман олимпиада Бабаюртни зонайл’ни йишди мактаббышее алгъавгьу. Манчика барабарда онлайн форматыква Сувал’ни магьалыл’ илгъечIу. Гьайни сен ман «Шаг в энергетику» гьар сенийн физикайкен олимпиада Рутул районни Мишлешни мактабее илгъечIу. Гьайни сен мани олимпиаде рутулбышди мактаббышди шигыртаршед иштырак гьаъы.
Мани олимпиадайс кьувва гивхьес районни хъаIдхъийни управлениейнчен къуллухчера, методистар абы. Манбышиле гъайре физикайн дарсбы гьелен маъаIллимарыб джони ушахаршиква абы.
Къийна мана ДДУ-етна дараджа ахтыхъааъана, гьихъа токIани ишгъеква багълыбанана дюнйейл’на ыIлим артымишааъана цIаIхни миллетни ааIлим ворна. Б. Бабаевни увгьойква, мани олимпиадайна метлеб — баджарагъукван, ацIааликван, хъаIдхъийлхъа гьавасыкван ушахар сечмишавъуй вобна ва манбышикIле санаъаIт алеетIасда хъобкуна йаIхъ гьаагуй вобна.
Баба Бабаевыква саджигее физикайни ыIлимыква маIшкьулехьена ДФИЦ РАН-на хааIрна ыIлимна ишчий, ДДУ-ни физикайни факультете дарсбы гьелена ааIлим Дибиров ЙаIгье (Яхья) АIлийна дих ары.
Олимиада гигъалассе гьихъа маъаIллимаршиква, иштыракаъас абыйни ушахаршиквана гаф вухьа. Абыйн мигьманар саламыква Мишлешни йыIкьнекни мактабни директоре ЫIсмаыл Мамедове къаршламишавъуйле хъийгъа, джаваб ааIлимыс Баба Бабаевыс гьувы. Манкъвее ушахар олимпиадайни усулбышиква, тапширыгъбышиква танышавъу.
Джуни чыхышее ЙаIгъе Дибирове олимпиадайна ваджибийвалла агъмишавъу ва къийнини йигъыл’ мани санаъаIтылхъа гьоIкуматын нягьаIбна фыкырий гьоолива увгьы.
АIтрафлы чыхышбы олимпиадеехъа сабыйни ушахаршини, маъаIллимаршини, ааIлимаршини гьийд Рутул районни хъаIдхъийни управлениейни шоIъбайни хааIрынкъке Къизил’ Нажмудиновае ва Мишлешни мактабни физикайни маъаIллимае Ширингул’ Рамазановае гьаъы. Манбыше олимпиадехъа абыйни ушахаршис угъурбы аIрзуламишаъы.
Олипиадайни усулбышиква ва тIалаббышиква ушахар танышавъуйле хъийгъа , манчина иш гибгъыл
Ман 7- 11 сыныфбышее илгъеIу. Гьар сыныфын ацIаал’ джурайда къурмишаъы ва ёхламишавъу.
Олимпиада кьоIбле саъаIтна цIыцIахьа. Хъийгъа комиссиейн ушахаршин джаваббы ёхламишаъы.
Тапширыгъбы ёхламишаъы таамхьайле хъийгъа, гыргын олимпиадайн иштыракчер екунбы ыIхас мактабни маIгьаллеехъа сабы.
Баба Джабраил’ни духее маджлисеехъа сабыйнбышди гьийд олимпиадайн екунбы ыккы. Манкъвее геледжагъыл’ нишилхъайий маъаIллимарше ва ушахарше гьевлес вуккан, увгьу. Гойне манкъвее физикайни санаъаIтыкен маIълумат юшенаъы ва мани санаъаIтна ваджибыйвалла гьайни дюнйейл’на увгьо. Профессор Б. Бабаевни увгьойква, ДДУ гьазирда водун физикайлхъа гьаваснани ушахаршис хыл’авхъас. «Къийхъийн дюнйейн геледжагъ, физикаршикед хаIдда аIслыда водун….», — ааIлиме джуни чыхышее увгьо. Гойне марахыкван, билигысын, физилкайлхъан гьавас ачмишааъан чыхыш мед ааIлим ЙаIгьйе АIлиеве гьаъы.
АIхрее Баба Джабраил’ни духее джуке олимпиаде гъамувхьайни ушахаршис грамотабы ва пылыкван кIанвертбы гьувы. Манкъвее гъамувхьайни ушахаршис физикайке чIакIын-чIакIын натийджабы гьагуй ва джанана сагъвалла аIрзуламишавъу.
Гьайни элейс югун физикайкен ацIаал’бы , натийджабы гьайни шигыртарше гьагу ва джигабы аххъы:
7 сыныф. 1 джига – ЫIсаева Наилия (Шиназын йыIкьнекин мактаб); 2 джига — Керимова Макка (Гел’мецIын йыIкьнекин мактаб; 3 джига – Айвазова Амина (Мышлешин йыIкьнекин мактаб).
8 сыныф.1 джига – Бабаев МагьаIммад
(ЦIаIхын йыIкьнекин мактаб); 2 джига — Абакарова Фатима (Рутулын 2-ъэсын йыIкьнекин мактаб);3 джига – Къаратова Саида (Мишлешин йыIкьнекин мактаб).
9 сыныф. 3 джига — АIббасова Салима (Рутулын 2-ъэсын йыIкьнекин мактаб).
10 сыныф. 2 джига – Гьарунова Фатимат (Шиназын йыIкьнекин мактаб).
11 сыныф. 1 джига Сулейманов СултIан (Шиназын йыIкьнекин мактаб).
Дипломбышиле ва сертификатбышиле гъайре Баба Джабраиловиче джуке 1 джигабы аххъыйнбышис 5 аазыр манат пылна, 2 джигабы аххъыйнбышис 3 аазыр манат пылна. 3 джигабы аххъыйнбышис 2 аазыр манат пылна гьувы.
Манчиле хъийгъа, ЦIаIхни, Мишлешни , Гыл’мецIни, Шиназни, Рутулни 2 –ъэсди мактабни физикайн дарсбы гьелени маъаIллимаршис Мамедов Мамедни ШаIъбанни духайни хизанни дойиле пылыкван кIанвертбы гьувы.
Олимпиада таамхьайле хъийгъа, абыйн мигьманар, мактаббышин маъаIллимар, ушахар суфранылхъа сабы кар одхьун ва едигарыс шикыл’бы цIыIцаъы.
