Гьар сен июнни 15-чил’ йишди гьоIкуматыл’ медицинайс къуллух гьааъани ишчершин Йигъ алгъайгьи. Гьел’бедти, мани санаъаIтыс къуллух гьааъан цIаIхбыб кIылба дешобунбы. Манбышда дараджа районе, республике, гьоIкуматыл’ гьийбни джаргабышее вухьа,вобна в амеб вухьесда.
Аллагьыле хъийгъа, ыкIарни, чIырыни инсанын джан хъувадкаъана дохтур ворна. Энки хаIдын алхыш , джанани сагъвалика багълыда. Инсаныс эн гранын ва аIзизын кар джун джан водун. Джан ыкIаранкъаI ваяхуд манчис са зиян ыхьайнкъаI, инсанни улекIле не вар-девлет’, не пыл, не иш къедженбы деш.
Дохтурыйвалла дюнйейлхъа инсанна ыIмыр къорамишааъас къахувыйн санаъаIт водун. Гьаарункъус дешобна дохтурын санаъаIт гьаъасда кьисмат ва имкам гьуво. Дохтур ихьес аIкIелис серраасына, ацIаалис гуджнана, йикI темизна, рушватылхъа маIтях дешда, хыл’ сибыкна, рагьаIмнана, мурватнана ва ыIмрелхъа майил’нана инсан ыккан. Агар инсаныхъад манчин сурабыджад гьаIракатбы дешхьее, манкъуке дохтур ихьес деш. Мана инсанни джанна къаалим ихьес. Манке дохтур азраилилхъа сийкIал.
ЦIаIхбышди аIреенчеб доюкван дохтурар, ааIлимар хаIбба хъигъебчIу. Дохтурарше : АIшуров Бегьраме, Кьарнаев Сабире, Кьасумов МагьаIммаде, Мустафаев Бейдуллагье, Мирзоев Эмирджане, ЫIсаев Рамазане, Дабузов Абакаре, Рамазанов МагьаIммаде, ГьаIджиев Аллагьвердийе, Магьмудов Магьмуде, Незиров АIбдулле, Эфендиев Саламе, Кавузов Джебийе, ГьаIджиев Таджидине, ЫIсаев Таджиддине, ЫIмаров Сирадже ва мебынбыше джона дараджабы ишбышиква къалхымишаъу. Манбышин добы садджу югвалис агъмишаъа. Къийна манбышда вааджибна иш ешли ва джегьил’ дохтурарше: МаIммадов, Раджабов АIрзумане, Керимов УIмаргьаIдже, Ибрагьимов Геланийе, ЫIсмыъылов Якьубе, АIгьмадов АIбдулнасире, Кавузов ГьаIджимаIгьмыде, ГьуIсенов Алетдине, Кьарнаев Халиде, Ширинов Ширине, Маллеев Саид, АIлиев Махач, Мирзоев Мирване, Маллеева Саиде, ЫIсмаилов АIлий, ЫIсмаилов Шамил’, ГьаIджиев ГьаIджий ва мебынбыше артымишааъа вобна.
Шахъаб югна дараджа алебтIуйн джегьил’ дохтурар Азербайджанылиб вухьайнбы ва гьаIшдеб вобунбы. Къийна Урсиятыл’ни шагьарбышеейиб йишди миллетын гьаIракатыкван джегьил’ дохтурар ишлемишеебаххьи вобунбы. Нимеега шахъаб кар ацIан, хыл’ сибыкын дохтурар вухьее, шас манбышике дагъамийвалехъа гябкIуйнкъаI, кумаг ихьесын.
Ши йишин раIгьматыххъа абкIынийн , миллетис хаIдын кумаг гьувойн дохтурарыб ймкIел’хъаляъас вуккан ва манбы джегьилершис чечнайс гивхьес лазымба вобунбы.
Къийнийна йишда гаф дохтурни АIгьмадова Амина Асланни йишни гьаIкеена вухьес. МаIнкъыни нассылна кок ЦIаIхни хивеенчена вобна. ХХ асырни кьоIдъэсди сурал’ манбы Азербайджанхъа кочмишебхьа.
АIмина АIгьмадова 1975-ъэсди сенни июнни 10-чил’ Закаталайни шагьарее едике йихьа. 9-ъэсди сыныфеехъаме маIнкъее Сумгаитни шареени урус мактабее аIълада хъаIдхъы. Гойне мана хъарына Дагъыстанеехъа хъаIдхъас. 10-11 сыныфбы Амине ЦIаIхни йыIкьнекни мактабее таамаъы. Мааъад хъаIдаххъанкъа, маIнкъын гьавас дохтурни санаъаIтылхъа акчмышхьа. Джен хъаIдхъийийд, гьаIракатбыд мани санаъаIтыква уйгъунынбы ыхьа.
ЦIаIхын йыIкьнекин мактаб югни кьийматбышиква таамаъы, гьаманиджар сен А. АIгьмадова Дагъыстанни девлет медицинайни университеетни джанан дохтурар гьаазирааъани факультетехъа иккейчIу. КьоIдле сенна мааъад хъаIдхъы, мана илгъейчIуна хъаIдхъас Азербайджанни девлет медицинайни университетеехъа.
1996 с. АДМУ–ни 4-ъэсди курсе хъаIдаххъанкъа, мана барабарра Бакуйни шагьареени Республикайни таксикологиейни марказее медицинайна сестрана ишлемишеехьи гиргъыл’. 1988 сен А. АIгьмадовае мана университет таамаъы, джанани дохтурын (терапевт) санаъаIт алеетIу.
Амина Агьмадова мер языйн Дагъыстанеехъа гьортIул’. Мана адамийс Фируддин АIгьмадовыс хъигъейчIу, хизан манкъуква къурмишавъу. Азербайджангъанче Дагъыстанеехъа кочмишийхьа хъары.
1999-ъэсди сеннике мана Рутул районни марказ больнице терепевтна дохтурна ишлемишеехьи гиргъыл’. ЙыIкьба чIрыни инсанаршиква мана мааъар растына хъары. Са-кьоIни сенни аIрее маIнкъее хаIдын къулай алетIу ва дохтураршини ва маIнкъее маалидже гьаъыйни инсанаршини аIрее хаIбна гьуIрмат къазанмишавъу. Аминее джени гьаIракатбышиква, гьунарбышиква, ацIааликва хаIбба чIырын инсанар къелилхъа хъавъу. Гьел’бедти, манбышди аIрее йишин цIаIхбыб кIылба деш вухьа. Сабара сенбышиле, ушахара вухьайле хъийгъа мана кочмишийхьа хъарына ешемишийхьес МаIгьаджкъалеехъа. Гьиняаъаб тезе юрд абчы.
2012 сенике мана терепевтна, участокIна дохтурна МаIгьачкъалайни 7–ди поликлинике ишлемишехьи гиргъыл’. Гьиняйиб джесда гьуIрмат Амине къазаммишавъуна. МаIнкъее маалидже гьаъына инсан, гьаммаше разийра ахва. Дагъыстанни Минздравни къуллухчершикIле манкъыIн гьаIракатбы къадже, Амина АIгьмадова 7-ди поликлиникайни заведующайна маIъвынна гийхьы. Къийна ман поликлиниква республике югни сыранедынчис гьыIсабехьи.
А. АIгьмадова югна дохтурчий джар дешорна, мана гьам хав, хизан гьувааджена хьунаще ворна. Адамийква — Фируддиныква саджигее са дих — Расул, кьоIйре йишбы: Миланайий Хаджиджат чIакIы хъавъу. ХааIрни йишехъаб джена хизан вобна. Сабара гагьна гихъа Фируддиныкейий Аминайке дидей, адий вухьа. Расул хъаIдхъый таамаъы, ишлемишехьи ворна. Хаджиджатыр гьазиреехьи ворна един санаъаIт алеетIас.
Амина АIгьмадовае няаъад хъаIдхъейид, няаъар ишлемиш йихьейр мана гьаммаше грамотабышис, дипломбышис, премиябышис лайикьеэъи йихьа!
«Нур» кIазетни редакциейн АIмина АIгьмадова ва гыргын цIаIхбышин дохтурар джони санаъаIтни байрамыква табрикааъа, джанана сагъвалла аIрзуламишааъа ва йикIеедын мурадбы быкырхьенбы. Амина хьиннен дохтурар шахъаб хаIбба вухьенбы!
