Гьайни уIл’джумее Дагъыстанни сувал’ни районбышее гёгъуйни гуджнани гёогъуйбышекейий долуйке инсанаршис хаIдын зиянбы хъетIу. Вухьайни фалякатын машинен йаIхъбы гьодгъул. Багъбышейни йиваршилин мейвабы кIякIанаъу, дирингбышейни биткибы кIецIы.

Гёогъуйбышике хаIбна зараар Рутул районни хиваршисыб хъоотIу. Республикайни йаIхъбышихъа иляккани ташкилатын гьувойни маIълуматхъа гора, хаIдын зиян районни машинбы ийкарни йаIхъбышис хъетIу. Манче «Рутул – Вочек – ДжинаIгъ» йаIххъын 27-ъэс., 51-ъэс. км. «Вочек – Йигьрак – Аракъул йаIххъын 19-ъэс. км. «ДжинаIгъ – МуIхаIх» йаIххъын 3-ъэс. 5-ъэс. км. «МуIхаIх Азербайджанни сергьадылхъани 1-ъэс. 4-ъэс. км. йаIхъбы утIумхьайнбы.
Селин гьодгъулыйний окIалауйн йаIхъбы, гедж гьидяу, техникайн темизяъа гидгъыл. Гёогъуйбы явашхьайле хъийгъа, хиваршейхъан йаIхъбы техникайн темизяуйнбы. Къийна манбы аIкьхъаъа водунбы. ЙаIхъбышил’ ишбы «Амкодор» донани ташкилатын ыкекка. Манбыше йаIхъбы гьийдни абрейхъа хъаляъасдиме чIакIын техника ишилхъа адчы водон. Гьаваабыше имкан гьувее, йаIхъбы са-кьоIни йигъни аIрайл’ темизяу таамхьесынбы.
Хиваршини аIреедын инсанар ивийкаран йаIхъбыд джамаъаIтын темизяуйнбы. Диракбышилин хъодуйн тIокIан симар тезелемишауйнбы. ГьаIшде районын гыргын хивар гьийдни къайдайл’ ешемишехье водунбы.
Фалякат гуджна вухьейиб, инсанаршина сагъвалла цIебба вобна. Манбышди хайбышее, йыцIабышее, дамазлыгъбышда саламатийвалла вобна.