«Нур» кIазетни редакциейхъад экIда-экIда халкьыква багълыданан марахукван горушбы алгъайгьен аIдат водон. Гьайни йигъбышее редакциейн маIгьбына хаIбна тентенейквана маджлис алгъавгьу. Гьини элеес редакциейн мигьманар цIаIхни халкьын Афганистан, Чернобыл’, Къузайл’ни Кавказыл’ ыхьайни гьаIдисабышин иштыракчер, СВО эскерар, джаван офицерар, миллетын ватанпарварар сабы. Йигъынджах ветеранаршини йигъыс къадсырыйн ыхьа.
Ветераннаршини йигъыс къабсырна маджлис «Нур» кIазетни редакторе Байрам АIбдуллаеве ачухавъу. Манкъве абыйни мигьманаршис хошгелдий гьавъуйле хъийгъа, редакциейни гьаIкIеена гаф гьавъу. Маныд эгьес ыккан, гьини элесын ветеранаршикван горуш «Нур» кIазетни юбилейни са йигъылхъа хъады. 1995-ъэсди сен июльни вузани санчил’ «Нур» кIазетын цIеддыйн номер хъигъечIу. Манчини гьаIкIее гаф гьааъанкъа Б. АIбдуллаеве увгьойн: «Гьайни сен цIаIхни миллетын кIазет хъигъааI гидгъылыйн хьебцIал’ сен быкырхьа. Манаб кIыл’ба вахт дешда. Мани сенбышей редакциейн йишди халкьын до гьувааджесдиме хаIбна иш вукку. Къийна шу редакциейхъа савъуна макьсад мана дешобна. Мана шоква хъызаахый, вушда вазият ваацIавхьай, шоква йикIейнче гаф гьавъуй вобна.
Гойне хьинне редакторе редакциейхъа абыйнбы сана-санкъуква танышавъу. Манбышди гьарункъуни гьаIкIее кIылин маIълумат гьуво. Манчиле хъийгъа, джуваб цIаIхни халкьына ватанпарвар, хайирхагь ишбышда инсан Мамедов Мамед ШаIъбанни духайс гьуво. Манкъве джуна гаф ветеранар табрик гьавъуйка гибгъыл. Манбышис джанана сагъвалла, угъурбы аIрзау. Гойне хьинне увгьойн: «Зынар вушди джаргее ворна. Зы хаIдда сенбына Дагъыстанни ФСБ-ни ташкилатее ишлемишхьа. Манбы сибыкын сенбы ыхьа деш. Дагъыстаныс гьар сураке гичI гьооли вухьа. 1999-ъэсди сеннан августни вуза Дагъыстанее ыхьайн гьадисабы зас къийнийни йигъыл’ хьинне йикIел’ водон. Мани сена ыхьайн гьаIдисабы шокIлед югда ацIанбы. Манке Дагъыстанейхъа душманарше басхун гьавъу. Зы Карамахийни хивей адкIынни вурушбышда иштыракчий ворна. ЗакIле вуруш гьиджо кар ыхьай лап югда ацIа. Манке ши Россиейни эскераршиква санаб Дагъыстан манбышике темизявъуна. ГьаIшде аIрейнче хаIбба вахт абкIынийле хъийгъа, Россиейл’ вазият динджиба дешобна. Гьал гьазырее йишди эскерарше СВО миллетчершика вурушбы ыккекка.Эскераршини аIрайл’ йишди халкьын джаванарыб вобунбы. Манбышда гьаарна са ахтыни доюс лайикьра ворна. Манбышди джаргее Ватанни гьийб джан гьувойнбы вухьайнбы. Манбы къийна шаква девхьейиб, манбышин добы, манбышда игитийвалла гьаммаше йишди йикIел’ вобна. М. ШаIъбанни духее джуни ихтелете гееб югна мыслягьаIт къавджу. Манкъве геледжагъыл «ЦIаIхбы. СВО иштыракчер» донан десте къурмишаъасди теклифыква хъигъечIы. Мани дестейн гыргыба йишди миллетын СВО иштыракчер саджигейхъа саъасда иш вуккейс вуккан. Мани саягъыл’на десте къурмишааъас манкъве СВО ветеранаршис тапширмишавъу.
Джун ихтелет М.Мамедове «Нур» кIазетын коллектив табрик гьауйка быкырау. Джамиятни эл’чее редакциейн вуккеккани ишис ахтына кьиймат гьуво.
— «Нур» кIазет йишди миллетын до, геледжагъ гьуваджен дюнйейни акьвал’ ишлемишехьен са ташкилат водон. Манче йишди халкьын таарых, маданият, миз гьувааджесдимее хаIбна иш вуккекка. КIазетее хаIдда йишди халкьыс къадсырыйн макьалебы растына хъайли. Манчиле савагьийда редакциейхъад джурайн мыслягьатын ташкилат водун. Махъа хаIбба йишин ааIлимар, дохтурар, ишкар инсанар аккяаа. Манбыше йишин миллетын геледжагъ гьувааджесдимее, хивар къелил’ хъаъасдиме гьаIракатыква ишлемишоохьи…
ЦIаIхбышда доюквана ааIлим Баба Джабраил’на дих къийнийни йигъыл’ Дагъыстанее доюквана профессор ворна. Мана Чернобыл ыхьайни авариейна иштыракчий ворна. Джуна гаф Б.Бабаеве «Нур» кIазетни ишчершис табрикыква гибгъыл. Манчиле хъийгъа, профессоре гаф кIазетни таарыхыке гьавъу. Манкъуни увгьойка, манбы редакциейни ишчершис геед дагъамынбы ыхьа. Манбыше инсанаршис кIазетбы чини вахтал’ гьихьараъасдимее йыIкьаIл’ гьаххъа ыхьа. Зы мани кIазетна гьаваскар ворна. Гьар сен манчис подписка гьаъан. Шунад, мани сураке редакциейс кумаг гьувое писда ихьес деш. Няъас увгьое, манбышда иш ши гьаъани подпискайке аIсылыда. КIазетын тираж нимее хаIдда ыхьее, са гьаманмегад манбышис югда водон. Амма къийнад редакциейн ишчер подпискабы гьаъасдимее акка-аккана ивийкаранбы. Манаб сибыкна иш дешобна.«Агар миллет акIанаъас ыкканхьей, цIебба манбышда миз авакIанеъэ». Къийна кIазетын йишди ед’на миз гьувааджесдимее, китаббы къекка, мактаббышее дарсыбы ыккейсдимее манчин усулба хаIдхъаъа, ушахаршини аIрайл’ конкурсбы алгъайгьи. Мани саягъыл’ манбыше цIаIхна миз авакIанаъас гьайсар деш. Мани карее зы манбышис гьаммаше ахтына къиймат гьуво, геледжагъылиб гьевлесда.
Джурайда Б. Бабаеве са-кьоIдле кал’ма СВО воохьени йишди эл’ни джаванаршини гьаIкIее увгьо. Манкъве манбы гьаIкIен игитер, ватанпарвар джаванар вобунва къейдау. Манбышис джанана сагъваллайий угъурбы аIрзау. ЭкIда СВО таамхьа, хайбышейхъа савкаIалсдимее дилягбы гьеххъы.
Мани йигъыл’ ветеранаршиква горушейхъа абыйнбышди аIрайл’ ДР-ни ДжаIмиятна Палатайна уIзву Сафар Сайдумовыр ыхьана. Манкъве горуш алгъауйхъа гора, редакциейс джуни сураке миннатдарийвалла агъмишавъу. Гойне хьинне манкъвей увгьойн: «Къийна шу алгъайгьен горуш йишдимее геед вааджибын водон. Шу чалышмишоохьенбы йишин ветеранар, СВО эскерар, Чернобыл’ ва Афганистан иштыракчер йикIел’ хъаваляаъас. Манбышди джомардийваликейий игитийвалике шас хабар гьооли. Манбы кIеливханаъас гьавайсар деш. ГьаIкIедад, инягьдыни горушбышин ши саджигейхъа сааъа. Къийнийни йигъыл’ йишди эскерашихъад, миллетыхъад водни дагъамийвал’бышике танышааъа. Манбы аIрейнче алятIасын имканбы тIабалаъа. Зы умудааъана, къийнийни йишин горуш, аIхрейдын ихьес деш. Геледжагъылид ши инаIгьдын горушбы алгъаъасынбы. Зас вушди гыргынкъус джанана сагъвалла аIрзааъас вуккан. СВО воохьени джаванаршисыд, манбы гьаммаше йишди йикIел’ вобунбыва эгьес ыккан.
Ветеранаршини доюле джуваб Кьурбан Кьурбанове увгьо. Кьурбан чоджий СССР-ни къошунбышиква Германиейл’ къуллух гьавъу. Манче йишин къошунбы хъигъебчIыйнчиле хъийгъа, мана Буйнакскейхъа хъары. Манке Къузайл’ни Кавказыл’ гееб дагъамна вахт вухьа. Дагъыстаней, Чечнайл’ саакитийвалла вухьа деш. Хаариджейнче хыле ярахуква Дагъыстанейхъа иккебчIыйнбышиква вурушбы ыккекканбышда сайир мана ыхьа. Манкъуни увгьойка, душманаршини фыкрее Дагъыстанын Конституциейн къурулуш дагъылмишауй ыхьа. Амма джуни эскерарше манчис йаIхъ гьуво деш. Душманаршин дестебы дагъылмишауйнбы. Кь. Кьурбановее горушейхъа сабыйнбышис джукIле Германиел’ къуллух гьааъанкъаI къаджейнчикейий къайихьыйнчикеб ихтилет гьауйн. Джуни ихтелетни аIхырее манкъвве «Нур» кIазетын коллективыд юбилейква табрикауйн.
Мани йигъыл’ маджлисейхъа сабыйни гыргынбышис джуваббы гьувойнбы. Манбышихъад джони фыкрейдын авхуйнбышис гьихьараъасын имканбы ыхьайнбы. Гыргынбыше редакциейс маIгьдын уфтанын йигъынджах алгъауйхъа гора, сагъулва увгьо. Ветеранарше джурайда редакциейна ишчий Рамил’ АIбдуллаевыс джо саджигейхъа саъас чалышмишхьайхъа гора, миннатдарийвалла агъмишавъу. Манбыше геледжагъылид маIгьдын горушбы экIда-экIда алгъаъасди кьарарейхъа хъабы.
Горушни аIхырее редакциейн ветеранаршис грамотабыйий, пайбы гьуво. Манчиле хъийгъа, къийна СВО воохьени джаванаршина сагъвалла гозетяаъана дуIъа гьавъу. Манчиле хъийгъийна гаф редакциейни мигьманарше чейна истякIан илёгъангъаI гьавъу.
Юсуф Бабаев
