КъыIл’ ушахарше истараIгьат гьаъана вахт вобна. Манбышда джанана сагъламийвалла гьуваджесдимее республикайни шагьарбышейий районбышее истираIгьатын лагерьбы ачмишау водунбы. Къийна лагерьбышеени ушахаршина санитариейкена вазият экIба-экIба ёхламишааъана.

Гьайни йигъбышее Рутул районна хааIрна Давуд Сулейманов, районни хъаIдхъыйни управлениейни хаIрынкъуква Осман ЫIсмаиловыка Хлютни хивеени ушахаршини лагерей ыхьа. Манбы ушахаршини истираIгьатыква, манбышди ешайишиква, гьелени одхьунийква дёлесвалейнче танышувхьа. Манчиле гъайре абыйн мигьманар ушахаршис тербие гьелени маъаIллимаршиква хъызаахы.
ИлгъечIуйни горушее районни хаIрынкъве Д. Сулейманове ушахаршини истираIгьатыква марахламишхьа. Ушахаршиквайий маъаIллимаршиква гаф гьавъу. Манбыше къулайка иш вуккуйниме гьиджо кумаге лазымда хъидгIынау.
Ушахаршикани горушейхъа Д. Сулейманов хыл’ кьаIрар ары деш. Манкъве лагерее воохьени ушахаршис спортын дезгагьбы пайис ады. Манбы топпар, къоокъалан кандирбы ва сабара медын карбы ыхьа.
Адыйни пайбышис ушахар хаIбба шадувхьа. Манбыше Давуд Сулеймановыс, Осман ЫIсмаиловус миннатдарийвалл агъмишавъу. ГьаIшде Хлютни хивейни лагерее джурабаджура оюнбы гьуваагасдимее гьар суракен имканбы водонбы.
Мани йигъыл’ лагерее къаджейнчиле къуллухчер разийба авху. Манбыше ушахаршис раIгатын истираIгьат алятIуй ва джанана сагъвалла аIрзуламишавъу.

Юсуф Бабаев.