Гьар сен сентябырьни вуза Дагъыстанее «Джагварани дурнабышин» йигъбы илгъайгьен аIдат водун. Ман йигъбы доюквана шааир Расул Гьамзатов едике ыхьайни йигъыс къадсыр. Гьайни сен мана едике ыхьайн 102 сен быкырхьа. Мани йигъыл’ Дагъыстаней хаIдда йигъынджахбы, тадбырбы, конкурсбы илгъечIу. Мани саягъылин шааир йикIел’ хъаляъан шадлыгъбы Россиейни менни регионбышейид илгъечIуйнбы.
«Джагварани дурнабышди йигъбышил’» Дагъыстанейхъа хаIбба шааирар, язычер, Расул Гьамзатовын дост-танышар савайли. Абыйн мигьманар зиярат гьаъасва манкъуни нюкьнелхъа, едике ыхьайни хивейхъа гьавайкIан. Шааирни дёлесынбышиква хъызааха.
Гьини элеесыб абыйн мигьманар республикайни чIакIынбышиква саджигее шааирни нюкьнелхъа гьабкIын. Правительствайни хаIрынкъве АIбдулмуслим АIбдулмуслимове, Россиейни язычершини союзни хаIрынкъуна маIъвын Константин Пуликовске, Халкьни Маджлисни хаIрынкъкуна кумагчий Камил’ Давдиеве, маданиятна министр Зарема Бутаевае, Р. Гьамзатовна йиш СаIлгьат Гьамзатовае ва сабара мебынбыше шааирни нюкьнелхъа тIетI’бы гиххьы.
«Джагварани дурнабышин йигъбы» къадсырыйн хаIдын йигъынджах шагьарни Ленинни комсомолни паркее, Азадни эскерни абидайсана илгъечIу. Правительствайни хаIрынкъве АI.АIбдулмуслимове сабара гагьна МагьаIчкъала шагьарни хаIрынкъун ишбы ыккеккана Джамбулат Салавовыка абыйни мигьманаршика саджигее ХаIбни Ватанни даIвъийе ва СВО гьабтIыйн эскерар са даIкьикьа динджиква йикIел’ хъавалявъу.
Премьер-министре абидайсахъа сабыйнбышис хошгелдигьавъуйле хъийгъа. увгьойн: « Гьар сен сентябрьни вуза Дагъыстанейхъа Расул Гьамзатовын достар, гьамбазар, манкъуни одкIунийбышис кьиймат гьоолен инсанар савайли. Манбышди хаIббананбышикIле шааир дёлесийвалейнче ацIа ыхьа, манкъуква ишлемишувхьа. Гьамзатовын фестиваль «Джагваран дурнабышин йигъбы» ман поэзиейн хаIдын байрам водон. Расул Гьамзатовни поэзиейн садджу авар миллетынджад деш, дюнйейни гыргыни халкьбышин акьва гьагва. Манкъун одкIунийбы инсанаршикIле аIзбарда ацIа».
Мани йигъыл’ чыхыш гьаъанбышди аIрайл’ Липецкни шагьарейнче арына СВО иштыракчий фронтейнчена шааир Станислав Ведринцевыр ыхьана. Манкъуни увгьойка, къийна джухъаб СВО хаIбба гьамбазар вобунбы. Гойне хьинне манкъве увгьойн: «Къийна доюквана шааир Расул Гьамзатовни Ватанылхъа арый хаIбна шадвалла вобна. Дагъыстаныс СВО игитер чIакIы хъавъуйнчини алла сагъулва эйгьи. Къийна зас гьихъа ва гьаIшде Ватан къорамишааъанкъаI гьабтIыйн кьаIгьраманар йикIел’ хъаваляаъас вуккан».
Чыхышни аIхырее Ст.Ведринцеве кьаIгьраманаршис къабсырна шечI хъаIбхъы.
Мани йигъыл’ махъа сабыйнбышди мебынбышед чыхышбы гьауйнбы. Манбыше Расул Гьамзатовни ыIмырике, манкъве одкIунни шечIбышике, сагъвалее къаджыйни хайирхагь ишбышике хабаравъу.
«Джагварани дурнабышди йигъбышис» къадсырыйн тадбырбы республикайни шагьарбышейид, районбышейид, хиваршейид илгъечIуйнбы. Маданиятни марказбышее, йыIкьнекни мактаббышее шааирын шечIбы хъаIдхъы, гьагуйбы алгъавгьу. Гьамзатовын фестиваль хьебыдле йигъна адкIын.
