Сентябрьни 8-чил Урсиятыл’ цIедда оIлкайниме вааджибын байрам – Урсиятни халкьбышди мизяршин Йигъ къейдау.
Ман календарейдын сайид чIаIран йигъ деш, ман мизяршина ва маданиятна болвалла бил’дирааъан йигъ водун. Манчин гьаммаше ед’на миз гьуваджес ва мана хъийгъийни насылбышилхъа хъевлес лазымба вухьай йикIел’хъаляъас.
Ман йигъ тасдикьаъасда кьарар Урсиятни Президенте В. Путине гьуво. ОIлкайни хаIрынкъве ман байрам сентябрьни 8-чил, шааир ва язычий Расул Гьамзатов едике ыхьайни йигъыл’, алгъагьас теклифау.
«Машгьур «Дурнабы» одкIунинкъве едина кьоIбле миз гьыIсабааъа вухьа — асарбы ойкIанна аварна миз ва урусна миз. Манчини кумагука манкъун асарбы дюнйейни гыргынанкъаI ацIахьа» — Путине агъмишау.
ГьаIшде Урсиятыл’ 270 един мизяр ва диалектбы водунбы. ГьаIмагьад, оIлкайни 64 субъектбышее мактабыле гьихъани, дагъайдни, аIсасни ва йыIкьнекни таIгьсилни чечнайл’ 76 едини мизяршикен таIгьсилин программабы ишекечирмишехьи водунбы.
Урсиятни геед мизярнани регионбышди санчини, Дагъыстанниме, мани йигъыхъаб хаIбна аIгьмият вобна. Республике 50 мизел’ ва лугъадыл’ юшенааъан халкьбы водунбы. Манчике 14 мизяршихъаб гьоIкуматна дараджа вобна. Дагъыстанын мизяр садджу юшенавъйуниме дешодунбы. Манчин халкьбышин таарых, аIдатбы ва гивъур-сугъооций гьагва. ГьаIйифки, аIлядхъыйни мизяршини хаIддананчихъа арайле аIл’гьаасда къорху вобна. Тасдикьхьайни байрамын мани проблемайлхъа фагьым гьевлес кумагаъас.
Республикайни гыргынанкъаI едини мизяршис хыл’ авхъуйниме хаIбна иш къооджи вобна: мактаббышее дарсбы гьели, китаббы, журналбы, кIазетбы хъигъечIи, гьар сенийлин олимпиадабы алгъайгьи, едини мизяршини маIъаллимаршиниме ассоциациебы къурмишау ва медынбы.
Мани сардан МаIгьачкъалайни шагьарни китабханэй едини мизяршис къадсырыйн фестиваль илгъечIу. Ман Расул Гьамзатовни едике ыхьайни йигъыква алаакьада ыхьа.
Маджлис ачмишааъанкъаI МаIгьачкъалайни маданиятни управлениейни хаIрынкъве Фарид Абалаеве един мизяр гьувааджийна вааджибыйвалла агъмишавъу. Хъийгъа манкъве ушахарше баба-дидершини мизяршил’ юшенааъани видеохабарбышда гаф вукку. Филологиейни ыIлимбышди докторе Разият АIгьмадовае батмишхьесди мизяршини къорхуйни статистикайлхъа фагьым гьуво. Махъа дагъыстанын мизярыд гехьа водунбы. Мана вазият девхьайниме гьоIкуматын аIхан кумаг гьелен.
Фестивале йыIкьнекна джига Расул Гьамзатове обкIунна «Дурнабы» шечI йицIакьвад мизяршил’ хъаIбхъыйн авхъу. Манчини аIрее – цIаIхни, урусни, аварни, кумукни, лакни, лезгийни, даргийни, агъулни, ногъайни, табасаранни, рутулни, татни, азербайджанни ва чеченни мизяршил’.
Махъа сабыйнбыше геедни диххъатука Калел’ни йыIкьнекни мактабни йигIыдъэсди сыныфни шыгыртее Сабина Аслановае цIаIхни мизел’ хъаIбхъыйни «Дурнабы» шечIилхъа кIыры гьуво. Мана шечI ед’ни мизелхъа йишди доюкани шааирее Валегь Гьамзаеве тарджума гьавъу.
Тамашечерше Сабинайс ахтына кьиймат гьуво. Фестивалыс мана мактабни ед’ни мизен дарсыбы гьелени маIъаллимае Гуляра Аслановае гьаIзирейъы.
Маджлисни аIхрее гыргын иштыракчер дипломбышис лайикьавъу. Едини мизяршини фестивалын маданият-мизени мирасни гьувааджийс тезе аIдатна йаIхъ ачмишавъу.
