ГьаIшдийна йишди оIлкайна дагъамна вахтобна. Мана Украинайл’ аIл’гьаани СВО багълыба. Ватан дареенанкъаI, гыргынкъун фыкырбы-зикырбы мана къорамишавъийка алаакьада эйхьи. Къийнийни йигъыл’ Россиейни Ярахни кьувватни джаргэйни эскерарше гьоIкуматын марахбы гозетяъа водунбы. ГьоIкуматыныд бордж водун манбышил’ мугъайитивхьес. Манчини гьаIкIее гьаммаше Россиейни Президенте Владимир Путине эйгьен.
Мани сардан СВО иштыракчершилхъа ва манбышди хизанбышилхъа Дагъыстанэй хаIбна фагьым гьооли вобна. МаIгьад, 2025 сенни октябрьни 20-чиле ноябрьни 10-чилхъа меега РФ-ни Ярахни Кьувватбышиква контракт одкIунийнбышин Дагъыстан Республикайкен пылбы 2 милйонылхъа авакьараъас (аIгьтиятни полкейнче). Федерални (400 аазыр манат) ва муниципални ( 100 аазырыле 500 аазырылхъа меега) сураке гьелен пылбы назара алятIу, ватандашна контракт одкIунийнкъаI пылна садибна микьдар 2,5 милйоныле 2,9 милйон манталхъа меега вухьес.
Дагъыстанни хаIрынкъве Сергей Меликове къейд гьаийнки, гыргыни къошинбышее дагъыстанны эскерарше къуллухааъа вобна. Джегьилершини камандираршике миннатдарийвалла агъмишааъан гьаммаше кагъызбы хъадайленбы. Ши 15-ни йишди Россиейни КьаIгьраманаршиква гуянмишоохьи.13,5 аазыр йишин ватанэгьлийер джурабаджурайни гьоIкуматни наградабышис лайикьавъу. Гьарын награда игитийваликва алааьада водун. Шавахьей угъадука камандираршин амырбы быкырау, шавахьей джун эскер гьамбазар къаттихьанавъу, шавахьей джулхъа йыIкьын юк алятIу.
Ватан къорамишааъанбышда йаIхъ сечмишавъуйнбышис хыл’авхъуйниме ва йишди ярахни кьувватбышда гудж мыIгькамавъуйниме ши контрактникаршин регионын гьелен пыл 2 милйонылхъа меега къалхмишаий кьарарылхъа хъабы. МаIгьдын пылбы алятIасын ихтиярбы октябрьни 20-чиле хъийгъа контракт одкIунийни ватандашаршихъад водун.
Йишди кьаIгьраманаршикIле ши джоква вобунбыва ацIахьес ыккан. Ши манбышилхъа инамаъан ва шакIле ацIан, манбышди къуллухыл’ни гьар дакьийкьан гъамувхьай дёлес хъаъа водун. Ши гьаммаше манбышис кумагаъасын.
Сергей Меликове йикIел’хъаляуйнки, Дагъыстанэй къйна эскераршис ва манбышди хизанбышис кумаг гьелен гьоIкуматын 26 тадбырбы водунбы. Кумаг гыргыни сент’бышил’ гьелен — джанани сагъламыйвалике , ушахаршини хъаIдхъыйле гидгъыл хав аляъасын торпахбы гьувойнчилхъа меега.
АIсас фыкыр ши СВО иштыракчершиниме ва ветеранаршиниме къурмишавъуйни «Сувабышда джуIръат» программайлхъа гьооли. Гьиняаъад игитершис къуллухчийни саIнаъатын ацIаал’бы хаIдхъехьи, манбы наIсигьатчершиква ишлемишоохьи. Манбышда таджруба, хасиятна кьувват къийна геед лазымда водунбы.
Гьел’бетти, гыргыни сент’бышил’на иш давамааъасда. Мани ишин екунбы, шавае Россиейни Ярахни Кьувватбышиква контракт одкIун, ноябрьни 10-чил ыккейс ва хъийгъийни ишни гьаIкIее фыкыррашмишивхьес.
Фронтыл’ни эскераршис угъадбы аIрзуламишаъа! Йишди Президенте увгьойн хьинне, ши гьаIхълыба вобунбы ва манчее гуджобна. Ши мутлякь гъамувхьесынбы! — Сергей Меликове увгьо.
