«Нур» кIазетыхъад хаIдда югун аIдатбы водунбы. Манчини аIрайл’ сайид хивни администрациебышди вукIлелинбышикван горушбы. Къийнийна йишда гаф тезера ЦIаIхийни хивни администрациейхъа хаIбвалла гьааъас хъарыйни Шихамиров Рамазан ГьаIджимусайни духайквана вобна.

Манкъуни гьаIкIее:
Шихамиров Рамазан ГьаIджимусайна дих 1973-ъэсди сен Миххьейни хивее едике ыхьа. 1990 ъэсди сен едике ыхьайни хивее йыIкьнекин мактаб тамаъы. 1991-1993-ъэсди сенбышее эскерийвалей ыхьа. 1994-ъэсди сен управлениейни ва бизнесни институтни экономикайни факультетейхъа хъаIдхъас иккечIу. Аали мактаб быкырауйле хъийгъа, мана джурабаджура ишбышил’ чалышмишхьа.
2012-ъэсди сениле къийнийлхъамее ООО «СК ЭКОМИР» ташкилатыс хаIбвалла гьааъа вобна.
Гьайн сенни октябрьни вазыке ЦIаIхийни хивни администрациейс хаIбвалла гьааъа гиргъыл’. Хизан вобна. КьоIни ушахна дек’ ворна.

— Рамазан чодж, «Нур» кIазетни редакциейн гъу тезе къуллухыква табрикаъа! Мани къуллухыл’ фыкрее аххъыйн ишбы гьаъас джанана сагъвалла гьевлена, угъурбы аIрзаъа!
— Сагъул! Йигъни суалбышис джаваббы хъелессе гьихъа, зас сечкибышее сес’бы гьувойнбышис минатдарыйвалла агъмишааъас вуккан. Манбышди аIрайл’ джурайда ЦIаIхийни хивни депутатаршикIле, сагъулва эйгьи. Зы чалышмишхьесда манбыше залхъа гьагуйн инам, уфтанда аIхырейхъамее быкыраъас.
— Тезе къуллухылхъа хъарыйнкъухъад, гьаммаше сифтада къаджесын ишбы эйхье. Йигъын фыкырбы ацIахьес ыкканий?
— Къийна зы администрациейни саIнаъатбышиква танышехьи ворна. Мана иш быкыравъуйле хъийгъа, хиваршее ешемишоохьени инсанаршикван горушбы ыккейс. Манбышди ешайишиква, хиваршихъад водни дагъамийвал’бышиква дёлесвалейнче танышхьес. Манчис сикIы, геледжагъыл’ къаджесди ишбышин сиягьый аххъас. ЗакIле ацIан, маIгьдын мисалабы гыргыни хиваршее гьеххаалика водунбы. Манбы хивни аIрайлин йаIхъбы,йыIгъааIр, хьинен хатIбы, токIбышин диракбы ва сабара медын дагъамийваллабы. Чалышмишхьесда цIедда ман мисалабы таамаъас. Къийна ЦIаIхни администрацейхъа — ЦIаIхна, Миххьейна, ХыIягъна, Хьойикна хивар гядакIва. Манчиле гъайре, Бабаюртни зонал’ шахъаб сайиб инсанар ешемишохьена бина вобна. Добы агъмишауйни хиваршее авхуйни инсанаршиква ишбы гигъалассе гьихъа, цIедда югун алаакьабы къурмишаъас. Мана гыргынчиле гьихъана иш вобна.
— Къийнийни йигъыл’ энки хаIбна дагъамийвалла ЦIаIхийни дерайл’ни хиваршее инсанар идявхый вобна. МагьаIбна дагъамийвалла садджу ЦIаIхийни администрацейхъа гядакIвани хиваршейджадбдеш, гыргыни хивни администрациебышейиб растына хъабайли.
— Ман гьаIкIен ихтелет водун. Мана къийна аIрайлхъа хъигъевчIына дагъамийвалла дешобна. Инсанар хиваршейнче шагьарбышейхъа кочмишоохьи гибгъылыйн хаIдда сенбы водунбы. Манчихъад хаIдда джурабаджура сабаббы водунбы. Манчини аIрайл’ кьомана джига хиваршее иш джигабы девхьай вобна. ШакIле ацIан, иш дешди джигее, ненаджар явашхьес деш. Уфтанра ешемишхьесдимее, хизан гудмишааъасдимее инсаныс гелир ыккан. Маныд дешданкъаI, хиваршейнче авайкIананбы. ГьаIшдийни девырее гыргынкъус югра ешемишхьес ыккан. Югун ешайиш тIабалаъасва джаван хизанбы шагьарбышейхъа кочмишехьи. Къийна манчин оIги явашаъасын хаIдда имканбы водунбы. Мани сардан хиваршейхъа сивийкIални джаванаршис гьоIкуматын хайбы аляъасын кумаг гьели. Амма хаIббананбы мани программайква танышба дешобунбы. Гойне хьиннед, хиваршейнче абкIынни инсанарше юрдбы таргау дешодунбы. Манбы шагьарей ешемишувхьейиб, экIба-экIба юрдбышилхъа зияратаъас абайленбы. Манчиле гъайре, аIхырейни вахтал’ хаIббананбыше хиварше тезе юрдбы адаччи гибгъыл. Манбыше джон йиссейн ата-бабайн юрдбы тезелемишаъа, хайбы аляъа. Манчиныд гьагва водун, ЦIаIхыйни дерайл’ хивар ахвас ыхьай.
— Рамазан, инсанаршикIле гъу са ишкар инсан хьинне ацIа. Ишкар инсаныхъад гьаммаше ишилхъан хаIдын гьавас эйхьи. Гьел’бетде, мани карее манкъус кумаг гьеленар ыкканна.
— ГьаIшде республикайни сувал’ни хиваршее ешемишоохьени инсанаршин гудмишувхьай юг хъаъасдимее Дагъыстанэй хаIдда миллетбышин проектбы, джурабаджур программабы ишлемишехьи, амма йишди хиваршее манчикена хабар дешда. Зы чалышмишхьесда мани сардан хаIбна иш вуккейс. ЦIаIхийн администрацие гьаIракатейхъа адчесдимее инвесторар тIабалааъас. Инвестициебы хъадымее, хиваршей ешемишоохьени инсанаршин доланаджагъыд юг хъихьесын. Хиваршин экономика артмышхьесын. Гыргыда зы агъмишауйн ишбы йиздимее тезебы дешодынбы. Мани ишбышил’ захъаб хаIбна таджруба вобна.
— ЗакIле ацIан, къийна хиваршее авхуйни инсанаршин геллесынкъун гелир пенсиебышике, ушахаршис гьелени пособиебышике аIсылыда. Манчиле савагьийда, сабаранбы мааъад ишлемишехьени ташкилатбышди кумагыква гуд’мишоохьи.
Къийна хиваршее ишлемишехьени мактаббышди, маданиятни марказбышди, ФАП-ышди вазиятбышиква гъу танышране?
— Ачухда увгьее, мааъаб гееб дагъамна вазият яранмишувхьа вобна. Къийнийни йигъыл’ ЦаIхни администрацие водни ёкьни мактабыке са ишлемишехьи. Ман ЦIаIхийни хивее ахуйн мактаб водун. Миххьейн йыIкьнекин мактаб, ХыIягъын, Хьойикын дагъайдни сыныфбышин мактаббы ушахар девхьайхъа гора, утIумхьайнбы. Маданиятын марказбы ЦIаIхийни, Миххьейни хиваршее водонбы. Миххьейни хивна марказ бербадни вазиятей вобна. Манчиле гъайре, шахъад са ФАП-ый ,сайид амбулаторие водун. ЦIаIхейдын амбулатория хаIдда сенбына гьихъа аляуйн водун. Манчис не ремонт, нейид быкырда тезелемишаъас ыккан. Увгьойбышихъа гора, ЦIаIхей тезе амбулатория аляъас гьаIзирувхьайн хаIдда сенбы водунбы. Зы чалышмишхьесда мана иш гьаIракатейхъа хъаваляъас. Гьамани саягъылиын Миххьейни хивыни маданиятна марказ вобна. Манаб тезелемишааъасдимее чараа къавджесда. Мана иш зы геджвалейхъа гьавассарас деш.
— Йишин санихьыйн йигъ хивни тасарруфатыква багълыда. Къийна маа яранмишувхьайни вазиятын ненаджар шадаъа деш. Тасарруфатбы аху дешинбы. Манчини гьаIкIее гьиджо эгьес аIхайе?
— Мани суракед хаIдда къаджесын ишбы водунбы. ШокIле ацIан, къурмишауй гьаммаше дагъамда водон. Хивын тасарруфат къийна гьаIракатейхъа хъаляъасдимее хаIбна иш вуккейс вуккан. ГьаIшде ЦIаIхийни дерайл’, Бабаюртни зонайл’ малкъара гьуваджесдимее гьар джура имканбы водунбы. Шавааджад малкъара гьуваджес, тIотIаршин тIапIанбы аххъас, фермераршин тасарруфатбы ачухаъас кьадагъа гивийхьи деш. Дагъамийвалла манчиква маIшгъулувхьесын инсанар девхьай вобна. Манбыб тIабалувхьесынбы. Шахъад хьиннен уфтанын табият, малкъара гьуваджесын ейлагъбы Дагъыстанее шавухъаджад дешинбы. Манбы кьаIрад гьассарас шахъад иджаза дешин.
-Дора йишда гаф сыкIылба бадалааъас. Йизын хъийгъыйн суал гъу хаIдын гьавас гьагвани футболни гьаIкIее ихьес. ШакIле ацIан, гъу футболун оIюн цIаIхни халкьни джаванаршини аIрайл’ гуджламишаъасдимее хаIбна фыкыр гьооли…
— Йигъын суал зас башдахьайн. Йизда иш нимее акьаIнаба вухьейиб, зы футболылхъан гьавас таргаъас деш. Йишин чемпионат водун хьинне илгъечIесын. Чалышмишхьесда гыргыни оIюнбышее ,аIхалетти, иштыракаъас. Футбол садджу оIюн деш, ман гьамыд йишин джаванар саджигейхъа сааъан джига водун.
— Къийна ши гьавъуйни ихтелете гъу ЦIаIхийни хивни администрациейн геледжагъыл’ гьаъасди ишбышике, мааъад ишлемишехьени ташкилатбышди вазиятыке, инсанаршини къийнийни йигъыке аIтрафлы маIълумат гьуво. Гыргыда гъу фыкрее аххъыйн ишбы йишди халкьнимее хайирыкванбы ихьенбы.
— Джурайда зас «Нур» кIезетни редакциейкIле сагъулва эгьес ыккан. Къийна шу, йишин халкь, миз, маданият, адабият, таарых гьуваджесдимее, хаIбна иш вуккекка. Мани карее зы шос ахаIн кумаг гьелесын.
— Сагъра ихьена!