Юххьанбы хъадыйка, инсанарыб гьаIракатейхъа хъавайли. Манбыше хайбы абрелхъа хъаляъа, дирингбы, эзан торпахбы гьаIшике темизяъа. Ман йишди миллетын аваалыйле хъооlн аIдат водун.

Къийнад Сувал’ни магьалыл’ни хиваршее маIгьдын югун аIдатбы аху водунбы. Имааджийбы садджу юххьан хъадыйнкъаIдеш гьаъа. МаIхудын имааджийбы йишди хиваршее цывылихъа, кьыIдим хъихьессе гьихъад гьаъанбы, няъас увгьее мани вахтал’ хьянбышин дурбабы ва былахбы ремонтаъа, кьыIдимна хъимийгъарджинва ва хайбышее илёгъан хьян ихьеджинва.
Гьайни йигъбышее Мишлешни хивее хаIбна имааджий вухьа. ДжамаъаIтын, кьома администрациейни ишчершиква, хивейхъа хъооIни илёгъани хьинен дурбабы ремонтаъу ва лазымни джигабышее цIедынбы гиххьы. Манчиле савагьийда манбыше хьян цIыцIауйн аIрагбышин гьихъийаллан джигабы темизяъу ва махъана йаIхъ хъавъу.
Хивни администрациейни хаIры­нкъуни Ислам Ибрагьимовни увгьойка, гьаар сен хивни джамаъаIтын кьоIни-хьебни элеес маIгьдын имааджийбы алгъайгьи. Мани карее гыргынбыше иштырак гьаъан. Администрациейни регьберийвалика, мактабни коллективын, больницайни ишчерше, хивни джамаъаIтын джоке ахаIн ишбы гьаъанбы.
Манкъве хивни администрациейн джамаъаlтыс имааджийс хъигъечIуйхъа гора, миннатдарийвалла агъмышавъу.
Къийнийни йигъыл’ Мишлешна хив Сувал’ни маIгьалыл’ хаlбна вобна. Манчис сикIы хивни аIрайл’ гьаъан ишбыд гьаммаше гьехаалика эхьи. Манбы сибык хъаийниме, джамаъаlтын хаIбна заIгьмат гьааъа. Мани карее манбы гьаммаше санаб воохьи.