Къийна гыргынкъун ниятбы, доъаIбы, дилягбы Украинее аIлгъаани СВО таамхьайква багълыдананбы водунбы. Нишихъа горайий ман гидгъыл, манчин сабаббы гьиджобыйий ыхьа шакIле ацIа водун. Агар ман 2022 сенни февральни вуза гидидгъылыйнхьий, мункум вобний Украинайн нацистар Авропайни оIлкабышди фашистаршиква гьыIджум гьавъу, Россиейлхъа ярахыква эбчIес. Манбышди гьаIракатбышин оIги вахтал’ ыIхы. Гьел’бедти, Россияйн Украинайни хъалкьыква деш вобна даIвъий вуккекка. Йишди эскерарше фашистаршини, нацистаршини бугъазылхъа мыкI вобна гивийххьи.
Гыргыни ярахыква багълыданани даIвъийбыше, СВО-ше зиян, эб, нагъбы, хаджалатбы адайли. Месала вобна: «Агар вас суIл’гь, саакитыйвалла вукканхьее, даIвъий гьааъас гьазирба вухье». Ярах къидодкIулыйле хъийгъа, ман ярахни сесеква кIитIокIалаъас эхьи. Эн писиныд ман водун – даIвъийн эн уфтанын, эн игит’, эн ватан вукканан джегьилера чисхъа сааъа .
Шахъаб хаIбна умуд вобна, гьайни дёлесийваллее азугъунувхьайн Авропайни оIлкабышин паччагьар ва Украинайн регберар мислягьаIтеехъа хъабы , ярах чIиелхъа гиххьесын. Агар гьаман гьидеъэ, Украинава эйгьен гьоIкумат дюнйел’ ахвас деш. Къийна Россияйна армие гыргыни фронтбышее гъамоохьи-гъамоохьи гьихъа аIл’гьаа вобна.
Россиейн гъамувхьай, гыргыни миллетбышиква саджигее, йишди цIаIхбышди джегьилершед дёлесхъаъа водун . Къийна СВО 200 аваркьыл’на цIаIхбышда джегьил’ ворна. Манбышин гыргынбы, йишдимеега кьаIгьраманар вобунбы. Гьел’бедти, даIвъийна либас кIаарна вобна. Ватанын ихтиярбы ва манчина садибыйвалла гозетяаъа джан манчис гьувойнбыб, батмишивхьайнбыб вобунбы. Манбышда джига дженнете вухьена. ХаIббанани СВО иштыракаъани йишди джегьилершис гьоIкуматын наградабы – орденбы, медалбы гьуво водунбы.
Манбышда сайир цIаIхни хивеенчена КIамазов Сакит ГьаIджиэфендийна дих ворна. Манкъуни игитийваллайни гьаIкIее ши «Нур» кIазете хьулехьей макьаалебы одкIунийнбы. Сакит СВО-хъа мобилизациехъа гирхьу аркIын. Ёкьудъэсын сен водун мана душманаршиква вурушмишехьен. Энки гуджнаква вурушбы аIлгъаани фронтбышее Сакит джуни эскер-гьамбазаршиква саджигее душманаршиква вурушмишехьи ворна. ЦIаIхийгъалее укранацистаршин, полякаршин, французаршин, инглисаршин ва мебынбышин азгъунын гьаIракатбы кIядхъаъа водунбы. Гьайни дёлесийвале мана отпускайс хаахъа, деккисахъайий едисахъа хъары.
МаIгьаб манкъуна сафарий вухьа, Сакит Рутул районни маданиятни управлениее алгъааIни творческий маджлисеехъа къонши Кьурбан Омаханов табрикаъас эчIу. Сакит утагъеехъа эчIумее , гыргынбы къелилхъа сугъооцы, мана гапаршиква къаршламишаъы. «Нур» кIазетни хааIрни редакторе Байрам АIбдуллаеве маджлисни иштракчершис Сакит КIамазовни гьаIкIеедын маIълумат гьуво. Рутул районни маданиятни управлениейни хаIрункъвее Саид Сулейманове С. КIамазов ва гыргыни районын СВО оIгунмишааъан ва ташаккурыйвалла гьоолен чыхыш гьаъы. Язычее, журналистее Кьурбан Омаханове джуни къоншийс Сакитыс пайис китаб «ЙикIеедын сирбы» гьуво. АаIлим Светлана Магьмудовае эскерыс ед’ хьинне хуIваайирхьу, манкъус джеке пайис 10 аазыр пылна гьуво.
С. КIамазовее СВО-ни гьаIкIеедын тезе хабарбы юшенаъы. Манкъуни увгьойква , къийна ши укранацистар, наёмникаршиква саджигее йыIкьалхъа гьичIибхыр аIл’гьаа вобунбы. ГьоIкуматни регьбере Владимир Путине гиххьыйн месалабы ва метлеббы аIхреехъамее быкыраъа водунбы.
«Душман дагъылмишаъасда, ши гъамувхьесынбы»,- джуни чыхышни аIхрее Саките увгьо.
Манчиле хъийгъа цIаIхбышди артистке Гул’сават Наврузоваее Кь. Омаханове одкIунни джуваббышиквана маIъний гьавъу. МыкIар эскерыква саджигее гьаъас майдамахъа маджлисын иштыракчера хъигъебIчу. Маджлис таамувхьайле хъийгъа, адабиятын байрам къурмишауйни Рутул районни маданиятни управлениейн, китабханайни ишчерше абыйни мигьманаршис хорагбышикван суфра ачмишаъы. Маджлис быкырба оператор Насир шу (чоджее) камереехъа цIыIавъу вобна. Сабара вахтале телевизоренче нягьаIбый адабиятна маджлис илгъевчIу ва нягьаIрий мани маджлисее эскер къаршламишауй шокIле къаджесын. АIхрее едигарыс шикыл’бы цIыцIаъы.
Ноябрын 21 йигъ Рутулни районе марахыква илгъечIу . Ман байрам йишди йикIее едигарыс ахвасын.
Гьаманиджар йигъыл’ СВО-на иштыракчий ЦIаIхни хивее джуни деккее, едее, гогьарбыше, хивынбыше манзикни гьийдни майдама къаршламишаъы. ЦIаIхни дерайни имаме Эл’дар Сулейманове нашидбы хъаIдхъы.
КьоIдъэсди йигъыл’ Сакит КIамазов ЦIаIхни йыIкьнекни мактабеехъа горушыс хъортIул. Мактабни магьаIлле тентенейквана маджлис вухьа. Мана маджлис Россиейн байдах къалхымишауйква ва Россиейни гимныква ачмышавъу. Мигьман хошгел’дийква къаршламишауйле хъийгъа , мактабни директоре СВО иштыракаъани ЦIаIхни хивни джегьилершини гьаIкIеедын маIълумат гьуво ва манбышди игитийвал’ни гьаIкIее юшенаъы. Джуни чыхышее директоре хаIбна фыкыр Сакитни игитийвалилхъа гьуво. С. КIамазове сабара сенбына гьихъа ЦIаIхыйн йыIкьнекин мактаб таамаъы.
Гойне Сакитни гьаIкIеедын чыхышбы мактабни маъаIллимарше , хивни инсанарше ва абыйни мигьманарше гьаъы.
Саките манбышис горуш къурмишауйхъа гора, миннатдарийвалла агъмишавъу . Манкъвее мактабни шыгыртарше СВО-ни гьаIкIеена хъобкуна хабар гьавъу ва манбышин Ватанылхъан аIшкь, майил’, инам гьаIракатеехъа адчы.
Ман горуш саджигее цIыIцIаъыйни шикыл’бышиква ва чейни истякIаныква таамхьа.
PS. Зы, йизди сураке эйгьен : « Адабиятна маджлис къурмишавъуйс , йизди китабын « ЙикIеедын сирбы» презентация уфтанда, марахыква алгъавгьуйс Рутул районни администрациейс, районни маданиятни управлениейс, йыIкьнекни китабханайс, маджлисеехъа абыйни адабиятни гьаваскараршис «Нур», «Рутульские новости» кIазетбышис, операторыс, гьейкIункъус йизын асарбы хъаIдхъийни шыгыртаршис Сагъул-варул!
СВО таамхьа, душманыле гъамебхьа, йишин гыргын джаванар сагъба-саламатба джони хизанбышеехъа хъаваленбы. Аамин!».
