Гьайни йигъбышее цIаIхни халкьына агъбирчак, 100 сенна ыIмыр гьавъуна ГьыIсейнова ФатIимат Керимна йиш раIгьматыххъа аркIын.
ФатIимат адий, хаIдда югуний-дагъамын къайджына заIъыфа йихьа. Мана 1925-ъэсди сен ЦIаIхыйни дерайл`ни Калел`ни хивее едике йихьа. Гьайни сен майни вузани 9-чил’ маIнкъын едике йихьайн 100 сен быкырхьа. ФатIимат адийна ушахийвалла Калел`ни хивее илгъевчIу. Мана Рутул районын хивын тасарруфат къелилхъа хъаъанбышда са йихьа. МаIнкъее хивни ичершиквайий едаршиква саджигее кIалхозын ишбы къаджы. Йишда агъбирчак цIерра Хосе-Диасни, гойнехьиннер М. Дахадаевни доюл’ни тасарруфатбышей чалышмишийхьа. Манчиле гъайре, мана Зрыхни хивейхъа поштна йаIхъ цIыцIааъанбышда са йихьа.
Ф. ГьыIсейновайна джаванийвалла оIлкайни дагъамни сенбышее абкIын. Манке Совет оIлкее ХаIбна Ватанна даIвъий ал`гьааI вухьа. Хиваршее ешемишоохьени инсанарше джони бугъазейнче къацIадкIун, одхьанан кар фронтейхъа оIтирау. Манчиле гъайре манбыше эскераршис джурабаджура хьахьалейр, турсубы ва сабара медын аляъасын палтарбы гьоодаха ыхьа. Манке Диндийни гадигейиб эскерар вухьайнбы. Манбы экIба-экIба АIранейхъа гьавайкIан-хъавайли вухьа. КьыIдим хъадыйква, манбышин ивийкырый явашехьи ыхьа. Эскерар юххьанийлхъамее хиваршеений аахванбы.
1944-ъэсди сен ФатIимат адее ДжинаIгъни хивейхъа истагъна аркIын. МаIнкъее ГьыIсейнов Мамед дайийква хизан къурмишавъу. Мамед дайий манке къуллухчий ыхьа. Мана ДжинаIгъни хивни кIалхозна садрына ишлемишехьа. Адамий къуллухчий ыхьейир, ФатIимат адийна иш сибык хъувхьа деш. Мана сыкIыл’рар гьаIракатыква ишлемишейхьи гиргъыл’. Няъас увгьее мани вахтал` ишилхъа хъигъеебачIенбышди аIрайл` цIеррыйна садрыйна хьунащений йихьес йиккан. МаIнкъыхъа иляакы, авхуйнбыб ишилхъаний хъигъеебачIи. ДжинаIгъни тасарруфатее ишлемишейхьенкъаI, ФатIимат адее гьар сен гыргынчикен пIлан гьеххаалика гяцIаъанний. Гойне хьинне хиваршейхъа поштна йаIхъ девхьайхъа гора, инсанарше гыргын джос лазымын кар Рутулгъанче йыIкьаIл’ний гьаххъан. Шалабышиква хейбы сувал’ни йаIхъбышиле гьихьарауй сибыкна иш дешдий. Гьавъуйни заIгьматыс сикIы едаршис гьелен пыл кIылин ыхьа.
ФатIимат адийнайий Мамед дайийна хъийгъыйна ыIмыр Бабаюртни бинабышиква багълыба. Манке Мамед дайий Рутул районни хивни тасарруфатни управлениейна хаIрнаний ишлемишехьи.
Манкъун ишилхъан гьавас, аIшкь къаджы республикайни чIакIынбыше Мамед дайийс Уланхолее ЧIарада районни МЖС хаIбвалла гьааъас теклиф гьау. Мани ташкилатын республикайни малкъара гьуваджени тасарруфатбышис окIакен, емыкен, гямрабы аляъасди тикинтийни материалыкен, техникIайкен ва сабара менни лазымни карбышикенкумаг гьели ыхьа.
Мааъаб воохьенкъаI ФатIимат адийъхъабый Мамед дайийхъаб кьоIйре ушахар вухьа. МаIнкъыни увгьойка, мааъаб ешемишоохьени вахтал’ джон гудмишивхьай писда ыхьа деш. Амма манчихъа илдяакы, раIгьаIтийваллаб джекIле къавджу деш. Адамий къуллухчий ыхьайхъа гора, гьар вахтал’ мигьманарный воохьенбы.
Дагъамийвал’бышихъа ил’дяакы, манбыше джони хизанна уфтанийвалла гьувааджына. Манбыше йигIыйре ушахар – йихьыйре гадейий са ичий чIакIы хъавъу. Манбышис хъаIдхъый гьуво, эвле-атта гьавъу. Хизанбышин ийессибы гьавъу.
ФатIимат адийс джени сагъвалее 20 нева, 42 нетийдже, 3 котийдже къавджес кьисматхьа.
Къийна ФатIмат адий шаква дейхьейир, маIнкъын до, йиджей къаджыйн хайирхагь ишбы гьаммашийс йикIел’ ахвасынбы.
«Нур» кIазетни редакциейн, цIаIхни миллетни джаIмаъатын раIгьматтыгъни гогьар-гьамбазаршис, дёлесынбышис башсагълыгъийвалла гьооли ва джига дженнетее хъааъанава эйгьи.
