Гьар сен декабрьни 22-чил йишди гьоIкуматыл’ энергетикаршин йигъ алгъайгьи. Мани йигъыл’ мани отрасле ишлемишоохьени инсанаршис къадсырыйн джурабаджур маджлисбы илгъечIи, гьаъвуйни ишин екунбы алгъайгьи ва пIланеехъа тезе ишбы аляатIа.
Къийна инсанна ыIмыр токIани ишгъевка алаакьаба вобна. Гыргын къеджен чIакIын ва хурун ишбы, гьаъан гьараIкатбы токIани ишгъени кумагыква гьаъа. Манчин нимеехье инсанын ешайиш, заIгьмат вахари хъаъа. ТокIан ишыгъ дешданкъаI, ваяхуд сабара гагьна акIанаъыйнкъаI инсанар къел’- хыл’ сабкьархьайнбы хьинне аахва. Телевизорыб, интернетыд, холодильникыд, телефоныб ва медын тасарруфатын ыIгьтаджбы токIака ишлемишехьи.
Гьел’бедти, ман ыхьай токIака багълыданан ишбы гьаъани энергетикаршин : индженераршин, оператораршин, монтераршин, монтажникаршин, электрикаршин, токIани назаратчершин ва мебынбышин гьаIракатбы водунбы. Мана са чичеехъа абчина хыллийна санаъаIтчершина зинджир вобна.
ТокIвани ишгъеква багълыданани ташкилатбышее ишлемишоохьен цIаIхбыб кIылба дешобунбы. Манбышда гьаарна югни джуваббышис лайикьра ворна.
Зас гьаман эгьес ыккан, аIхреени сенбыше йишди Сувал’ни дерайл’, ишгъени токIаква багълыданан хаIдда ишбы гьаъы. Гьел’бедти, дагъамийвал’быд кIылда дешодунбы. Манчини гьаIкIеедын маъIлумат ши «Нур» кIазете гьелен. Сабара дагъамийвал’бышихъа ил’дяакы, хайирыс гьаъан ишбыд кIылда деш ыхьа. Масалан , хиваршее тезе трансформаторбы бадалаъы, токIани симына линия сабара участокIбышее бадалавъу, диракбы, анкербы илёзараъы. Манаб, республикайни токIани ташкилатбышее ишлемишоохьени йишди чоджаршина: УIмаров Кьурбанна, Гераев ГьаIзратна ва мебынбышда гудж вобна. Субутаыйн тахсир дена, кьийна йишда чодж Кьурбан УIмаров аххъы ворна. Инам водун, силистын мана нягьаIкьни гарданахъа гиххьыйни быIгьтанбышике темизяъы къайиккасда. Манкъухъад мысаджад писин напс , не гьаIрамылхъан гьаIрс ыхьайн деш. Кь. УIмарове кумаг гьидёвуна хив ЦIаIхни дерайл’, Рутулни районее дешда. Анджах мана дареенанкъаI, манкъуни дерделхъа гьийхьарна инсан, джуни делесни гогьарыле гъайре мерна дешда. Гьамани джар балее мерна йишда чодж мишлешелий Агъаширин Мамедов ворна. Манкъвейид хаIдда югун ишбы миллетни меега къаджы. Югуный-писин са чуIт’ кар водун. Ман гыргынкъуни вукIлелхъа хъалес мункум вобна. МаIгьадни чоджаршис джувабыкахьейид кумаг гьелес ыккан.
ТокIани ишгъеква алаакьан ва медын хайир ишбы йишди энергетике, джамаъаIтче ГьаIзрат Гераеве къадже. Мана югни-писди йигъыл’ гьаммаше джуни миллетыква эхьи. Лазымни джиге джун джуваб миллетни хайирысын эгьес аIхан.
Шаца манкъуни кумагыква ва мислягьаIтыква ЦаIхни хивее тезе гуджан трансформатор бадалаъы. Хивни аIрайл’ бадалаъасын токIан диракбы хъады, токIан прожекторбы ады. Къийнад, хивееъад кумаг дехьайхъа гора, ман диракбы бадалаъы дешодунбы. Манчина сабаб хивее джегьилершин кумаг дехьай водун. Ман суалыд юххьан, хивее джамаъаIт хаIддананкъа, гьаIллаъас ыккан.
ТокIани ишгъеква маIшкьулоохьен ааIлимарыб шахъаб вухьайнбы. Гьайни сен раIгьматыххъа ДДУ-на профессор Баба Бабаев аркIын. Мана Муслагъни хивеенченаний. Джуна ыIмыр манкъвее ишыгъыс къабсыр. ХаIбба санаъаIткарар гьазиравъу. Манкъуни ниятее хаIдда ишбы Сувал’ни магьаIлыл’ къаджей ыхьа. Манкъулхъа раIгьмат къихооли.
«Нур» кIазетни редакциейн гыргын цIаIхни миллетын энергетикар джони санаъаIтни байрамыква табрикааъа, джанана сагъвалла, хизанбышее болвалла аIрзуламишааъа!
