2025-ъэсди сенни аIхрее Дагъыстанни регьберни Сергей Меликовни кьарарыква ДР-ни эгьлибышди Советын тезе эл’чера сечмишапвъу. Манбышди аIрее лайикьна джига йишди миллетни гьуIрматыквани агъсаххъале Айдын Бабаеве авхъас.
Бабаев Айдын Керамна дих 1955 сенни 9 январее Рутул районни Хьойикни хивее кIалхозчийни хизанее едике ыхьа. Манкъве Закаталайни урус мактабее хъаIдхъы. Ман мактаб таамаъы, ДОСААФ-ын шофираршин курсбы хъаIдхъас иккечIу.
1973-1975 сенбышее А. Бабаеве Ватанни гьийдын бордж хъуво. Манкъуна эскерийвалла Украинайни Бердянскни шагьарее дерйагьна авиациее илгъевчIу. Эскереенче хъары, мана кIомсомолни путёвкайква ишлемишхьес Оренбургни вилаетыл’ни Ясный донани шагьареехъа аркIын. Мана мааъар Кембаевни табиятын маIъданбы джураъани комбинате ишлемишхьа.
1975 сенее хизан къурмишавъу.
1978 сен А.К.Бабаев джуни хизаныква Закаталайни шагьареехъа хъары. Сабара гагьна мааъар аху, ыIмрен мана ешемишхьес МаIгьачкъалеехъа цIыIцIаъы. Айдын чоджий 1736 автоколонне автобусна шофирна ишлемишехьи гиргъыл’. ХаIдда сенбына манкъве республикайни марказеенче аIкьанани районбышеехъа, шенче иняхъа инсанар тIашмишавъу. Мана МаIгьачкъала – Вочек рейсейхъаний айкIан. Манке йишин Сувал’ни маIгьалыл’ ешемишоохьен инсанар манчикваний ивийкар, няъас увгьее инсанар тIашмишааъан транспорт манке махъа ийкар дешдий. Айдын чодже мысаджар йишда инсан йаIххъыл’ гьарсыл’на деш. Билетбы дешди вахталиб манкъве са чараа къавдже, цIаIхийгъалий автобусеехъа аляратIа ыхьа. Гьале манкеджаб манкъве джусда гьуIрмат джамаъаIтни аIрее къазанмишавъу.
1987 сен мана МаIгьачкъалайни автодорожный техникумеехъа иккечIу. Манчина диплом алебтIу, мана Гидромелиоративни ташкилатее хааIрна механикна ишлемишехьи гиръыл’. Манбы дагъамын, Совет гьоIкумат дагъылмишхьайн, чIакIын ташкилатбы, заводбы, фабрикабы, комбинатбы утIумехьен замаанабы ыхьа. Айдын чоджий ишлемишехьен ташкилатын гаражбы багъламишхьайнбы. Мани ишиле аркIын, мана бизнесылхъа илгъечIу. Манкъве раIгьматтыгъ ГьуIсейнов Фикретыква саджигее ташкилат ООО «АIттагъай» ачмишаъы. ЦIеддыйн кумаг манбышис манкийни цIаIхбышди депутате, «Дагагропромстройни» банкни директоре АIриф ОIмарове гьуво.
Ишкараршини ниятее ыхьайн сувал’ни дамабышди чейлягъбышеедын къаебы гьецIы, плитабы гьаый. Анджах еттыгъын пыл дехьайхъа гора, ман проект аIхреехъамее ыккейс кьисмат дехьайн. Гойне Айдын чоджий къуIванани мебеликва маIшкьулехьи гиргъыл’. Манкъве раIгьматтыгъ лекий Муса чоджийква Бакуйни шагьарее кIылин мебылин цех ачмишаъы. Маайиб джигайл’ни къуллухчерше бизнес хаIдхъъас имканбы гьувы деш. Анджах къуIванан мебел’ гьаъан къулай алеетIуйн.
2006 сен ишкаре АIбутIалиб Мурадове мебел’на иш ваацIана устадхьинне Айдын чоджий Челябинскхъа ишлемишхьес хъортIул’. ЙицIыдле сенна мааъар ишлемишхьа. Фабрикайни ишчершини аIрее хаIбна гьуIмат къазанмишавъу. Айдын Бабаевни гьаIракатбышиква фабрикайн къеккан мебел’ къат-къатна хаIдхъыхьа. Манкъве мааъад фабрикайсын цехбы аляъанкъаI хааIрни устадна иш вуккы.
Айдын чоджий ешбышеехъа эчIумее, джуни Ватанылхъа саркIыл’.
Хъары МагьаIчкъалеехъа джун хусусы къуIванан ва утIумын мебел’ (истолбы, истулбы, кIонзийбы ва мед.) къеккан кIылин фабрика ачмишаъы. ГьаIшде мана манчина мудир ворна. АIхреени вахтал’ Айдын чодже хаIбна фыкыр исламни динылхъа гьооли гибгъыл. Манкъве джуни къул’пенче гехьан фитIра, садакьа исламын дин маIгькамаъас гьели. Гьаммаше миллетыква багълыдани йигъынджагъбышее манкъве иштыракаъа ва хыл’авхъаахъа. Джегьилершис югун тербие гьели, чечнайс джун гьаIракатбы гийххьи. Манкъве гьам пылыкван, гьам хылекван кумаг спортун оIйинбы алгъааIнкъа, гьам манзикбы аляъанкъаI, тезелемишаъанкъаI, абидабы хиваршее гийхьенкъаI гьели. Джуна иш гьабсыр, джаIмаъатна иш гьааъас мана цIеббыйнбышди джаргее гьаммаше эхьи. АIхреени сенбышее манкъуни регьберийваликва джуни Хьойикни хивее хаIдда ишбы къадже. ЦIеддыйке, манкъве джусын хав хивееъад аляу. Хив тезелемишааъа гиргъыл’. Манзик тезелемишавъу, мураалий алявъу, гармабы, йаIххъар хъаъы, горханабы сетIкIайква гьаIсареехъа алеетIу ва медын хайир ишбы къадже. Гьел’бедти, манбы хивни джамаъаIтыква саджигее гьаъы, амма джуни мислягьаIтыква.
Айдын чоджийна хизаныб мигьман ыккийканна, мигьман кьабыляъана хизан вобна. Манкъуни хааъар ыхьана инсан, манкъуква ишлемишхьана инсан манкъуни хыл’ачухийвалиле, йикIени темизийвалиле разийра аху.
Манкъуна эн хаIбна бахт джуна хизан вобна. Манкъвее Набият истагъыква саджигее са дих, кьоIйре йишбы чIакIы хъавъу. Манбышед декке, еде гьувойн тербие, къык аххъыйн. ГьаIшде манбы хизанбышин ессибы вобунбы. Айдын чоджийий Набият истагъыб гьуIрматыкван дидейий адий вобунбы.
Къийна цIаIхни миллетыхъад манкъулхъан хаIдын умудбы ва иням водунбы. Манкъвее чIакIни гьуIкумни утагъбышее йишди миллетын ихтиярбы гозетяъасынбы ва водун дагъамийвал’бы ашкараъасынбы.
«Нур» кIазетни редакциейн, цIаIхни миллетни дойиле Бабаев Айдын Керамна дих ахтыйни джамаъаIтни къуллухыква табрикаъа! Манкъус угъурбы джулхъа ыIгьтибаравъуйни ишее, шадна ыIмыр хизаныква саджигее аIрзуламишааъа! 
