Мусурманни уммайни календарыква гьаIшде ШаIъбанна ваз вобна аIлгъаа. Мана ваз эн аIзизни Рамандини вузале гьийбна вобна. ШаIъбанни вуза инсанаршин ыIбадат гьехха эхьи, дин.иман гуджлемишехьи. Инсанар чалышмишоохьенбы хайирыкван, суваабысын ишбы гьаъас. Гунагьбышике къорамишоохьи. Сабара йишди чоджарше, йичибыше мани ШаIъбана ваз сурале илгъевчIуйнкъаI сивар аххъаххъа гивийгъал. Мани вуза днни гьаIкIеедын маджлисбы гьаъый сунна вобна.
Январьни вузани аIхрее ДР-ни муфтиятна гунайлни округеена элчий Раджабов МугьаIммадрамазан джуни ишиква багълыбани сафарийква ЦIаIхни дерайлхъа гьаркIын. Манкъуква саджигее мебын динэгьлер ва имамар вухьа. Сувални маIгьалыл манбы ЦIаIхни дерайни имаме Элдар Сулейманове къаршламишавъу. Манкъвее абыйн мигьманар ЦIаIхни дерайл исламни диныква багълыба вуккеккани ишиква танышавъу. Абыйни мигьманаршис манзикбышин ва зияратбышин таарых ющенаъа. Мана динэгьлершина десте салам гьевлес цIебба ГылмецIни хивни имамысахъа, цIаIхни дерайлни фонд «Инсан» садрыйсхъа АIсадуллагь гьаIджийсхъа илхъебчуI . Манкъве абыйн мигьманар йишди аIдатыква къаршмишавъуйле хъийгъа, манбы «Инсан» фондын вуккеккани ишиква танышаъу ва хивни манзикни гьаIкIеедын аIтрафлы маIълумат гьувы. Арыйни мигьмане суфраныс баракат гивхьуйле хъийгъа , Исламни динни гьаIкеена ваIъаз гьувы, зикыр хъаIдхъы. Абыйни Муфтиятни элчерше ГылмецIни манзикни имамни ишис ахтыйна кьиймат гьувы. Манчиле хъийгъа, Муфтиятна элчий М.Раджабов Сувални магьаIлылни хиваршини манзикбышее ыхьа. Мана хиваршини джамаъаIтыква ва имамаршиква горышмишхьа. ЦIаIхни йыIкьнекни манзике ( мадраса Ан- Низамия) манкъвее аIтрафлы чыхыш исламни динни, кIылни ва хаIбни гьаIджни, Рамандини вузани , шейгъаршини , зияратбышди гьаIкIеедын чыхыш гьаъы. Манкъвее ЦIаIхни мадрасайни гьаIкIеедын таарых ющенаъы. Саджигеедын кубар гьаъыйле хъийгъа, суфраныл джмаъаIтыква саджигее садакьа одхьун.
М. Раджабове хайир доъаI йишди джамаъаIтыс хъаIбхъы,
Манчиле хъийгъа абыйн мигьманар Элдар Сулеймановыква алибни дерайлхъа гьабкIын. Манбы миххьейни, мишлешни, муслагъни, джинаIгъни джамаъаIтыква хъызаахы. Манбышис джо сафареехъа абына метлеб ющенавъу.
Абыйн мигьманар ЦIаIхни дерайлни манзикбышиква, имамаршиква, джамаъаIтыква, табиятыква саламаттамишвхьа югни фыкырбышика йикьаIлхъа ( аIвхъуна) сабкIыл.
