Февральни 16-чил МаIгьачкъалэй  «Сенна маIъаллим – 2026» саIнаъатни устадыйваллайни республикайни конкурсын екунбы ыккы.  Манчее цIеббыйна джига Каспийск шагьарни М. К. МаIгьаммаджановни доюл’ни  16 № гимназиейни хурни сыныфбышди маIъаллимае ГьаIджимаIгьаммадова Индира Муъминни йище авхъу. МаIнкъына кок Муслагъни хивейнчена вобна.

Конкурсын иштыракчер табрикааъас республикайн ахтыйни дараджайлин къуллухчер абы. Манбышди аIрее — Дагъыстан Республикайни ГьоIкуматна вице-премьер Муслим Телякавов, республикайни хъаIдхъийни министерствайна регьбер Ягьйе Бучаев ва мебынбы.
Джуни чыхышее регионни министраршини кабинетни хаIрынкъуни маIъвыне маIъаллимни дараджейна ахтывалла къейд гьавъу. Манкъве сувал’ни мактаббышее ишлемишоохьени маIъаллимаршини заIгьматысыб хаIбна кьиймат гьуво.
Манкъве увгьойн: «Дагъамни шарааитбышее ишлемиш вухьейиб, шу ушахарше кейфиятукан ацIаал’бы алятIуйниме гыргын гьаъан ва саIнаъатын бордж лайикьыква оIдамишаъан. Дагъыстанын хъаIдхъийн майдан садибын водун. Манчини аллад ман оIл’чибы гьаарни муниципалитетбышее гьаIшдийни тIалаббышис уйгъунда хъадый йишдиме ваджибда водун. Хъийгъа къуллухчее конкурсее югун натийджебы гьагуйн маIъаллимар табрикавъу ва манбышис тезе угъурбы аIрзуламишау.
Конкурсни екунбышиква пылын сертификатбы ва едигарын кубокбы муниципал этапбы алгъагьийни хьоцIалиле гьеххани маIъаллимаршис гьуво. Хусуси наградабышиква конкурсни хьони финалистаршина заIгьмат къейдавъу.
Индира ГьаIджимаIгьаммадова Дагъыстан Республикайкейнчена «Россиейна сенна маIъаллим — 2026» федерални этапеена эл’чий йихьес.
«Нур» кIазетни редакциейн, гыргыни цIаахбыше И. ГьаIджимаIгьаммадова заIгьматыс гьувойни лайикьни кьийматука табрикейъа ва геледжагъылид угъурбы аIрзуламишаъа.