Гьаар сен Рамандина ваз дюнйейл’ шацыйнчиле йицIыдле йигъна гьихъа гивийгъал. Мана вазни кIалендарыква февральни 18-19-чилхъа хъооI вобна. Мана таамувхьайле хъийгъа, мартыни 19-20- чил’ дюнйейл’ни мусурманарше джон аlзизын байрам кечирмишаъас.
Исламни диныс ыIбаадат гьаий, манчилхъан инам йикIеенче ыхьай ва динни гьаIкIеедын кIорааленчен ацIаал’ алеетIуй хаIдын сувааб водун. Гьайни гунагьбынани дюнйейл’ ешемишехьенкъаI, гьар инсане гьаммашийни дюнйеехъана джига гьазирааъас вуккан.
Ши, цIаIхбыб, мусурманаршини уммайнбы вобунбы, манчихъа гора Исламни диныс ыIбаадат гьаъас ыккан. Темизна мусурманий ихьесдимее, хьобле фарз вобна бирмишаъу:
1. Шаъадат гьауй. (Аллагьыле гъайре мерна дешда, МаIгьаммад (аIл.с.) манкъве къаховуна пейгъанбар ворна). Агар гьаман джуваббы йикIеенче, каамил’ни фыкреква увгьее, мана мусурманий ворна. Ыкканни миллетна, ыкканни сифатыквана мана ыхьай, тафавут сыкIылин джад дешин.
2. Йигъыс чини вахтал’ хьобле куб, гиджараIххий алеетIу гьавъуй.
3. Рамандина ваз авхъуй. Рамандини вуза мусурманаршилхъа бирмишаъы водун сивар аххъый, гыргыни писди карбышике къирагъылхъа хъувхьай, нягьаIкьни карбышике туба гьавъуй.
4. ФитIра къайищий. Гьар мусурманийн бордж водун сенис джуни девлетике, малаке фитIра хъувой касибаршини, чIырынбышди йаIххъеехъа хъувой.
5. ГьаIдж къил’мишавъуй. Агар имкам вобхьее, мусурманийн бордж водун ыIмырее са элеесхьейир ГьаIджилхъа гьаркIыний. Маккеени ва Мадинеени зияратбышис ыIбадат гьауй, горханабышилхъа гьаркIыний, чIакIни манзикбышее джамаъаIт кубар гьауй, бирмишауйн аIгьдбы быкырауй.
Мусурманни уммайн сенее кьоIдле вааджибын, исламни диныква багълыданан байрамбы кечирмишаъа. Манчин са Ураза-байрам, шенсад Кьурбан-байрам водунбы. Ши, цIаIхбыше, манчикIле Рамандин ХаIдын йигъый Кьурбанын хаIдын йигъва эйгьи. Вазни календарыхъа гора, гьар сен манбы йицIыдле йигъна шацыйле гьихъа алгъайгьи. КьоIни ХаIдни йигъбышди аIрее йигIцал’ йигъ эйхьи. ЦIедда Рамандин ХаIдын йигъ кечирмишаъа, гойне Кьурбанын хаIдын йигъ. Рамандини ХаIдни йигъыкIле аIрабна мизяаъани оIлкабышил’ Ид ул’- фитр эйгьи, амма тюркна мизяаъани оIлкабышил’ ва медни мусурманар ешемишоохьени оlлкабышил’ Рамазан- байрам, Ураза-байрам байрам эйгьи.
Рамандини вуза Аллагьыс джуни къуларше хаIм-йигъна ыIбаадат гьаъа. ХьебцIал’ йигъна манбы сиваадженбы. Йигъни-йигъын не кар ойхьан деш, не хьян илёгъа деш. Мани вуза гьаIкIени мусурмане вудже вудж нягьаIкьни ишике, напсыке къорамишаъа. ЙикIеехъа темизин ниятбы аляатIа. Миз темиз’ба гьувааджи, гьаъан ихтелет’ гьор дешин , саламатын эйхьи. Мани вуза сана-санккъуни хатрес хъоотIа деш. Рамандини вуза гьеххъыйн ниятбы, доъаIбы АIллагье зарада кьабыляъа. Мани вуза инсаныс ыIмыр темизни варакьыле гивгъаласда имкан гьооли. Агар гъу гьауйни гунагьбышиле йикIеенче пашманехьихьее, сайид гьидяъас гъуджад вакIле эйгьихьее, манке гъу гунагьбышике азадаъана. Рамандини вуза джегьенямын дарвазабы утIумехьенбы. Садджу дженнетин дарвазабы аахъы эйхьи. ВаъаIз’ вобна: «Агар инсанаршикIле Рамандини вазна кьуват, батIраалла, гудж ваацIавхьанахьий, манбыше эгьесынний: «ЫIмырволли Рамандина вазхьий вухьа».
Рамандини вуза гьаагва вобна хьобле куб вахтал’ гьавъуй. Сувааббы хаIдхъехьи, агар джамаъаIтыква саджигее манбы гьеъээ. ХаIмдийни кубаршиле хъийгъа, Рамандини вуза тараIвгьий гьааъа. Рамандини вуза Кьадиргеджейна хаIм хъабайли. Мани хаIмде гьеххъыйн диляг Аллагье кьабыляъан. Мана эн югна хаIм вобна. Кьадиргеджее, ааIлимаршини увгьойка, вузани аIхреени йигъбышилхъа хъавайле. Рамандини вуза рагьмаIтыххъа абкIынни инсанаршини рыгьыIле Кьуръан хъаIбхъый хаIдын сувааб водун..
Гьайни сен Рамандина ваз, Ин ша Аллагь, февральни 18-чил’ гивгъалас. Аллагьни кумагыква гьайни сенийн Рамандин ХаIдын йигъ ши мартни вуза алгъагьас. Хъодкуда ненкейи ихьес, шакIле телевизореенче эгьесын . Садджу гыргыни мусурманарше ман са йигъыл’ гьаъас ыккан. Аллагьыс мислягьаIтеехъа хъабайлен джун къулар, гейб вуккийкан. Рамандина ваз Аллагье джуни къуларшин иман, сабыр, ооIрхый, джулхъан инам ёхламишаъасдимее дюнйейлхъа къахову.
АIхреени сенбышее, шукур Аллагьылхъа, исламни динилхъа хъооIн цIаIхбы хаIбхъоохьи вобунбы. Садджу, дин сиясатыква аликкаъас ыккан деш. ГьаIкIени динилхъа арыйни инсанни йикIее мерункъус писин гьауй мысаджад эйхьен деш, нейиб манкъве мерункъулхъа хыл’ къалхымишааъас деш. Исламын дин ачухын, майиликван, раIгьамыкван водун.
«Нур» кIазетни редакциейн гыргын мусурманар гивийгъални Рамандини вузака табрикааъа. Аххъасын сивар, гьаъасын кубар, гьеххъасын дилягбы, гьаъасын ниятбы къайищесын фитIрабы Аллагьее къабыляъанбы! Аамин!
