СВО гыдгъылийле къийнийлхъаме мааъад 300 оохъани йишди миллетни джаванарше иштыракаъу ва гьаIшдед гьаъа водун. Манбышин хаIббананбы къийнийни йыгъыл’ Донбас душманыке азадаъа вобонбы ва вурушбышее кьаIгьраманийвалла ва игитийвалла гьаагва вобна.

Манбышда сайир Гыл’мецIни хивна ЫIсмаилов Расул ЫIсмаилна дих ворна. Мана 1975-ъэсди сен Гыл’мецIни хиве едике ыхьа ва мааъад мактаб таамаъу. Манкъвее йыIкьнекин мактаб едике ыхьайни хивее быкырауйле хъийгъа, сабара вахтыле эскерейхъа къуллухааъас аркIын, гойна прапоршикаршин мактаб таамаъу ва Россиейни силагьни кьувабышее къулухааъа гиргъыл. Маъаб къуллухааъани вахтал’ 2000-ъэсди сен манкъве Чечне террористаршис эксына вуккеккани мубаризе иштракаъу. Гойне мана манче пенсийехъа хъигъечIуйле хъийгъа, Краснодарни шагьаре МЧС ишлемишехьи гиргъыл’. Мааъар ишлемишехьенкъаI манкъус Россиейни Президентна Шарафна грамота гьуво .
Расул ЫIсмаилове 2024 – ъсди сени ноябрьни 23-чил’ Росийени силагьни кьувабышиква контракт багъламишаъу, СВО иштракаъас аркIын ва къийнийни йигъылхъаме мана мааъар ворна. Расуле цIебба Курскни вилаетыл’ къуллухаъа гиргъыл’ ва мани вахтал’махъа Украинайн басхын гьаъу ыхьа. Душманыква вуккеккани мубаризее кьаIгьраманийвалла гьагуйхъа гора, манкъус Курскни вилаетни губернаторни суракке «Защитник Курской области» донан медаль гьуво. Манчиле хъийгъа манкъус Донбас аIлгьaани вурушбышее игитийвалла гьагуйхъа гора, Россиейни Президенте Жуковын медаль гьуво.
Расул хьинне СВО иштыракаъан, Гыл’мецIни хивенче джаванар хаIбба вобунмы. Манбышди аIрее гьабтуйнбы, батмишебхьайнбы, яраламишебхьайнбыб вобонбы. Умудаъана батмышебхьайн йишин джаванар аваакесынбы ва яраламышебхайнбыб хъувабкасынбы.
Ин ша Аллагь СВО таамхьа, душманыле гъамебхьа йишин гыргын эскерар сагъба-саламатба хайбышейхъа, хизанбышисахъа сабкIыл хъавалесынбы.