Рамандини вуза шагьарни Кировни районни ДОСААФ-ни къасабее тезе манзик алявъу истифадейхъа хъуво. Гьайни йигъбышее манчин аахъый илгъечIу.

Тезе манзикейхъа кубаршис абайлени инсанаршиква саджигее шадвалла гьааъас Дагъыстанни Муфтиятна маркази округна эл’чий МугьаIммад Майранов ва сабара мебынбыб абы. Манчис къабсырна маджлис Красноармейскни къасабайни имаме Кьуръан хъаIбхъыйка гибгъыл. М.Майранове цIебба манзикейхъа сабыйнбы республикайни муфтийни АIгьмад-эфендий АIбдуллаевни доюле табрикавъу. Гойне хьинне манкъве маIгьабна уфтанна манзик алявъуйнбышис миннатдарийвалла агъмишавъу.
Тезе манзикни имаме Гьамзат-гьаIджее манзик аляаъанкъаI хаIббананбыше иштырак гьаува къейдау. Манбышин геллесынбы шакIле ваацIа деш. Манбыше Аллагьын хав аляуйхъа гора, джоке ахаIн кумаг гьувойн. Къийнаб манзик таамааъасдиме кумаг гьелес вуккананбыб вобунбы. Манбышди гыргынбышис ши сагуъл эйгьи.
Рамиз Юсубов ДОСААФ-ни къасабей ешемишехьена хаIдда сенбы водунбы. Мана къасабей цIедда хав аляуйнбышди джаргее ворна. Къийнийни йигъыл’ хаани дёлесвалее мусурманарше ыIбаадат гьаъасын уфтанын джига аахъыйле геер шадра ворна. Манкъве увгьойн: «Гьихъа ши кубыс Красноармейскейхъа вая Семендерхъаний гьавайкIан. Къийна йишди манзикдёлесвалей вобна. Йишдимее гьаIшде махъа гьабкIын-хъабый нимеехьей сибык хъыхьа. Зы джурайда манзик’ аляаъас кумаг гьувойнбышис ва тикинтийн ишбы ыккыйнбышис сагуълва эгьес ыккан. Гьасре манбыше къавджуна хайирхагь иш суваабыс оокIанна.
Маджлис мавлидыка ва манзик аляаъас кумаг гьувойни инсанаршис муфтиятни доюле гьувойни грамтабышиква таамувхьа. Манчиле хийгъа махъа сабыйнбыше уфтанни авазуква мавлид хъаIбхъы.
Маныд эгьес, къийна ДОСААФ къасаба МагьаIчкъалайни шагьаре гуджнада тикинтибы аIлгьааIн район водун. ГьаIшде мааъад ушахаршин бахче ишлемишехьи, манчиле къайре 400 ушахар кьабыляаъасын тезе йыIкьнекин мактаб аляъа водун. Мааъаб ешемишоохьени инсанаршихъаб са дагъамийвалла вобна. Манаб поликлиника дехьайква багълыба. Инсанарше умуд гьааъана, гьокуIматын манчинаб башара къавджесда.