Миллетыхъаб нимее хIабба ацIаал’нан, гьаIракатукван, хивыс, джаIмаъатыс хайир гьелен инсанар вухьай, мана хаIбна баракат вобна. ЦIаIхбышди гьар хивыхъаб маIгьбын инсанар гьар вахтал’ вухьайнбы ва гьаIшдеб кIылба дешобонбы. Манбышда сайир Лекни хивенчена ишкар хивее, миллетее къеджени ишбышис лазымын кумагбы гьар вахтал’ гьелена АIлиев АIзим Семедна дих ворна.
Мана 1976-ъэсди сен феврални 1-чил’ Рутул районни Лекни хивее едике ыхьа. Гьайни сен манкъве вудж едике ыхьайн 50 сен къейдаъу. Ши мана мани юбилейиква табрикаъа. Джус джанана сагъвалла, хыллийна ыIмыр арзуламишааъа.
Манкъуна дек’ Семед дайи, ва ед’ Рафа халай Гыл’мецIни кIалхозее, гойне Азербайджан Агъйезийна совхозе заIгьматааъан инсанар вухьа.
АIзим 1982 –ъэсди сен Лекни дагъайдни сыныфбышди мактабеехъа аркIын ва 1987-ъэсди сенехъаме маа хъаIдхъы. Гойне манкъве са сенна Гыл’мецIни йыIкьнекни мактабе хъаIдхъий давамаъу.
1988-ъэсди сен манбышда хизан Азербайджанни Къах районни Агъйезийни хивеехъа кочмишувхьа. Мани хивее манкъве мактаб давамаъу.
Мактаб таамаъуйни са сеныле 1994-ъэсди сен мана эскерейхъа къуллухааъас аркIын. КьоIдле сенна эскерийвалла гьавъу хъарийле хъигъа АI. АIлиев Благовещенскни шагьарейхъа аркIын. Мааъар ишлемишехьи гиргъыл’. Мани сенбышее цIаIхбышин джаванар мебеликва маIшкьулоохьи гибгъыл. Благовещенскна шагьар эгьес эйхьи манчина марказ вухьа.
АIзим цIерра 1996-ъэсди сеныле 2006-ъэсди сенылхъамее ООО «Самур» донани компаниейни хаIрынкъуна маIъвын ыхьа, гойне мана 2008-ъэсди сеныле 2026–ъэсди сенылхъаме ООО «Салют» донани мебельни компаниейни хаIрынкъуна маIъвын ишлемишхьа.
Гьайни сен мана ЧОП «Кодекс» донани ташкилатее ишлемишехьи гиргъыл’.
Мана вудж ишлемишехьени джигей, Амурскни вилаетыл’, Благовещенскни щагьарее ешемишоохьени цIаIхбышди аIрее гьаммаше гьуIрматуква, ахтыра ыхьа ва маfъад къеджени джурбаджур ишбышее лазымын кумаг гьелен.
АI. АIлиеве джуке аIхан кумаг йишди цIаIхни миллетее къеджени ишбышисыд гьаъа водон. Ши манкъве гьаъуйни кумагбышди гьаIкIее оIгийлни сенбышее одкIын ыхьа. Масалан, пандемиейни вахтал’ дарманбы, маскIабы алищес, йиджбы битIалаъас ва гуманитарын кумаг гьувова.
Манкъве гьар вахтал’ Сувал’ни магьаIлылни «Инсан» донани фондехъа вахт-вахтал’ кумагыс пыл алгъайгьи, ва манчиле савагьийда вудж едике ыхьайни Лекни хивее къеджени ишбышис кумагбы гьеленбы.
Гьайни сен майни вуза Лекни хивее тентенейква ХаIбни Ватанни даIвъийе иштыракаъуйни хивни ветеранаршис гьаIйкал ачмышавъу. Мана гьаIйкал хивее гивхьесва мыIслягьат къавдженбышда са ва мана аляъас кумаг гьеленбышда сайир АIзим АIлиев ыхьа. Хивыке, республикайке аIкьана ешемишхьейир мана гьаIйкални ачылышеехъа ары ва мааъар йишонхьана. Манкъус мани ишбышее кумагаъуйхъа гора Дагъыстанни ветеранаршди cоветни садрыйни суракке Ташаккурийвалла (Благодарность) гьуво. Мааъад Сувал’ни дерайни ветеранаршди советни садрее НезирмагьаIммад АIгьмадове манкъусхъа мана хьуво ва сагъулва увгьо.
Сайид са кар къейдаъас ыккан, гьайни сен апрельни вуза Дагъыстане ыхьани фаляакатбышке зиян хъетIуйнбышис кумагбы гьеленкъаI Амурский вилаетыл’ воохьени цIаIхбыше 231 аазыр манат пылна савъу,
Сувал’ни дерайни «Инсан» донани фондеехъа оIтиравъу. Махъа кумаг гьувойбышди аIрее АIзим АIлиев эгьес эхьи, кьоIъэсда-хьебыъэсда ыхьа.
АIзим чоджийхьиннен хивыс, миллетыс кумаг гьелен инсанар цIаIхбышихъаб камдевхьенбы. МаIхуIбни инсанаршике дарс алятIанбыб шахъаб хаIбба вухьенбы.
Джус, джуни хизаныс югун арзуламишаъа ва джуни кьоIни балайн югын йигъбы къаджу, невабы вухьа хьунащейква Инсанат баджийква сана джоле гуянмышеебхьенбы. Аамин!
