Инсан цIерра джус ихьес ыккан, гойне джуни хизаныс, гойне джуни миллетис, хъийгъар Ватаныс. Манбы гыргынбы са зинджирын гьаIлкьабы водунбы. Джус дехьана инсан мерынкъусыр ихьес деш. Джуни миллетни мизена, маданиятна, таарыхна, адабиятна ахтыба дараджа гьидвааджени джигее югун къийхъийн геледжах дешин. Ман миллет батмишхьа аIлгьаасын. Эле гьамани йаIххъын сент ши аххъы водун.
Йишди миллетын геледжах шаке аIслыда. Йишда гьаарна чалышмишхьес ыкканна джуна едина миз, адаббы, аIдатбы цIедда хизанее, гойнед миллетни аIрайл гьуваджес. Шахъабыб, цIаIхбышихъабыб, вобунбы манчиле ооъаб ишлемишоохьен инсанар. Агар йишди миллетни ишкарарше манбышис хылявхъаахъа вухьанахьий, писда ихьес дешдий.
Мани сардан авар, лезги, лак, дарги ва медни миллетбышис ма ша Аллагь. АлебтIас месалайс йишин къонши миллет лезгибы. Джони миллетын таарых, миз, адабият, маданият , фольклор гьуваджесдимее манбыше фондбы къурмишаъы водунбы. Фондеехъа садыйн пылбы манбы гьуваджес ва артымишаъас ишлемишаъа. Едини мизел ооъаб ишлемишоохьени ааIлимаршис, маъаIллимаршис, телябабышис хыл’ авхъааъа. Сенис едини мизекен ва адабиятыкен джурабаджур конкурсбы, олимпиадабы ва медын маджлисбы алгъайгьи. Мааъад югун натийджабы гьагуйни шыгыртаршис, телябабышис, маъаIллимаршис мукафатбы гьели.
Хил’дже сенбы водунбы ДДУ-ни ва ДДПУ-ни филоложи факультетбышее хъаIдаххъани ва лезги мизен санаъаIт аляатIани телябабышис стипендие гьели.
Гьайни сен манбыше лезги мизен дарсбы гьелени маъаIллимаршини аIрее конкурс алгъавгьу. Ненкъвейий вая ненкъэйий мааъад югун гьаIракатбы ва ацIаалбы гьагу, манбыше цIедни хъаIдхъийни сенни аIхреехъаме гьар вуза доннух алеетIас. Нена хайирыквана иш гьааъасдиме, харджийбы лазымехьи.
Гьар сен шинаб чалышмишоохьенбы маIгьдын хайирыкван ишбы гьаъас. Манчин сайид ааIлим Гьарун Ибрагьимовни дойилин едини мизекен гьар сен алгъайгьен конкурс водун. Ман конкурс «Нур» кIазетни редакциейн алгъайгьи. Конкурс алгъагьасдимее йишди заIгьматбышиле гъайре, шыгыртаршис гьелесын пайбы, дипломбы ва мани конкурсее иштыракаъас абыйни ушахаршис охьанасын кар гьелес ыккийкан. Манчиле гъайре йаIхъ-кьыIтIин харджий лазымехьи.
Ман конкурс алгъагьасдимее джуке аIхан кумаг гьар сен Гьарун маъаIллимни духее Александр Ибрагьимове гьели. Анджах медни йишди ишкараше гьале джолед алхъа увгьойн деш, дора гьайни элейс ши кумаг гьелес.
Гьайни сенид эле гьаIмагьад ыхьа. Хъодкуда увгьее, шахъад мани конкурсылхъа хаIдын умыдбы ыхьа. Анджах ушахаршини ацIаал’бышиле, маъаIллимаршини, директораршини гьаIракатбышиле ши разийба авху деш.
Манчихъа ил’дяакы, гьайни сенийн конкурс алгъагьас хаIдын кумаг шас Мишлешни маданиятни марказни хаIрункъве Мустафа Рамазанове гьуво. Манкъвее садджу конкурс алгъагьасдимее хивын клуб джад деш гьуво. Манчиле гъайре ушахаршини ва абыйни мигьманаршис одхьуний гьувойн харджийбы джулхъа алеетIу. Мустафа Рамазанове джуни марказни ишчершиква саджигее накьра-зурнайква конкурс алгъагьас абыйнбы къаршламишавъу. Мишлешни музейе экскурсие мактаббышенче абыйни ушахаршис ва маъаIллимаршис алгъавгьу. Мустафа чоджий гьам жюрийна уIзвы ыхьа. Манкъвее мактабни шыгыртаршис джони музейни экспонатбышикен маIълумат гьуво. Ушахарше мани йигъыл’ кIелихан дехьесын билиг ва ацIаал’ манкъуни лекциейке алеетIу.
Къийна йишди миллетын таарых, миз, адабият, маданият, фольклор гьуваджий ва артымишхьай Мустафа чоджий хьиннени инсанаршике аIслыда водун. Манкъус джанана сагъвалла ва хыллийна шадна ыIмыр хизаныква саджигее аIрзуламишааъа. МаIгьбын игитер, сувахъанар, заIгьматчер, Ватаныс джан гийхьен инсанар шахъа вухьенбы. Аамин!
