Дагъыстанейид, быкырни Россияйл’ хьинне, мактаббышди 9 ва 11 сыныфбышди шыгыртарше имтаIгьанбы хъели гибгъыл. 2026 сен йишди республике ОГЭ-бы ва ЕГЭ-бы Россиейни Минпросвещениейн ва Рособрнадзорын тасдикьаыйни усулбышиква ва расписаниейква аIлгъаа водунбы.
ОГЭ-бы 2 июныле гидгъыл 6 июлылхъаме цIыIцахьес. Ман имтагьаIнбы гьайни йигъбышил’ илгъечIес: 2 июне — математика; 5 июне – урус мизеле ва математикайле гъайре, гыргын предметбы; 6 июне – хаариджий миз, информатика; 9 июне – урусна миз; 16 ва 19 июне – сечмишаийни предметыкена.
Манчиле гъайре ОГЭ-бы хъелес аIгьтиятын йигъбыд водунбы. Агар ушахарше сабара сабаббышике (чIырыра ыхьайхъа гора, цIеббыйни элейс имтаIгьан хъевлес даIвхее ва мебна вааджибна багьнайхъа гора) чини вахтал’ имтаIгьан хъевлес даIвхее, манбыше математикайкена ОГЭ 29 июне, урусни мизекена – 2 июле, ахуйни предметбышекена – 3 ва 6 июле хъелес иджааза гьуво.
Манчиле гъайре, имтагьаIнбы 3 сентябырыле 25 сентябреехъаме хъелесыд иджааза гьувойн.
Гыргын ОГЭ-бы саъаIт 10-чил’ гийгъал. ИмтагьаIнна цIыцIавхьай предметыке аIслыба. Масалан, математикайна имтагьаIн 3 саъаIтнайий 55 дакьийкьана авайкIан, физикайна — 3 саъаIтна, географиейна 2 саъаIтнайий 30 дакьийкьана цIыцIоохьи.
ЕГЭ-бы 1 июныле 6 июлехъаме хъели. Ман имтагьаIнбы гьайни йигъбышил’ илгъечIес:
1 июне — таарыхна, адабиятна, химиейна; 4 июне — урусни мизена; 8 июне – математикайна (базовый ва профильный); 11 июне – обществознаниейна ва физикайна, 15 июне — биологиейна, географиейна, хаариджий мизена, 18-19 июне — информатикайкена ва хаариджий мизекена. ЕГЭ-бы хъелесын аIгьтятын йигъбы 22- 25 июныл’ гьагу.
Мед имтагьаIнбы хъувой (пересдачабы) сечмишауйни предметыкен 8-9 июлылхъа гиххььы.
Саэлейсыд алава (дополнительный период) ЕГЭ-бы 4-25 сентябрыл’ хъелес ихьесынбы. ЕГЭ-бы саъаIт 10.00 гийгъал.
Дагъыстанни хъаIдхъийни ва ыIлимни министерствайни увгьойква, гьайни сен республикее 63 аазырыле агъаллани шыгыртарше имтагьаIнбы хъелес. Манбышике 14 аазырыле агъаланбыше ЕГЭ-бы хъелес; 50 аазырылхъа аваакьарни шыгыртарше ОГЭ-бы хъелес.
Ман имтагьаIнбы хъелесдимее джигабы (пунктбы) чини тIабалбышикван гьазираъы водунбы. ИмтаIгьанбы хъелени джиге джурабаджур къуллухбышди эл’черше манчин улух ыккейс ва манчилхъа фыкыр гьевлес, ОГЭ-бы, ЕГЭ-бы саIгьфбы дена илгъечIеджинва. Гыргыни имтагьаIнбы хъелени гозершее видеокамерабы гиххьы водунбы.
Зас гьаман эгьес ыккан, ОГЭ-бы ЕГЭ-бы полицейский операциейлхъа сакIалаъас ыккан деш. Ушахе джун ацIаал’бы гьагвасдиме, манкъус динджин шарааитбы яратмишаъас ыккан; манкъус кумагаъас ыккан; хъаIкьанаъас ыккан деш; ацIаныд кIелиханаъас чалышмишивхьес вуккан деш; ушахна ыIмыр «гьавкьарааъас» вуккан деш. ШакIле ман карбы гыргынбы къедженбы. Йизди увгьойква, ыIмыр хъаIдхъийле гранба вобна.
Гьел’бедти, ОГЭ-бы, ЕГЭ-бы хъеленбышди ушахаршини аIрее йишин цIаIхбышин джегьилераб вобунбы.
АIтрафлы макьале нимеегани цIаIхбышди ушахаршейий ва нягьаIдый имтагьаIнбы хъуво ва няхъайий хъаIдхъас эбчIу кIазете гьевлесда
«Нур» кIазетни редакциейн гыргыни ОГЭ-бы ва ЕГЭ-бы хъелени ушахаршис угъурбы аIрзуламишаъа. Гьасре манбышди гьийд энки югни колледжбышин, институтбышин, университетбышин дарвазабы ачмишхьеджин!
