ГьуIрматукван цIаIхбы, 2026-ъэсди кьоIдъэсди сурасенийн ед’ни мизел’ни кIазетын одкIуний (подписка) гейд дагъамда адкIын, няъас увгьойе вушди хаIббананбыше кIазет одкIун деш.

ОIтмышхьайни сенбышее сувал’ни дерайл’ 300-400 кIазетний ойкIанан, гьайни зарбас 100 кIазет одкIун деш. ГьоIкуматни ишил’ ишлемишоохьени инсанарше ман идедкIунийнкъаI, пенсия алятIанбышикIле нягьаIдне эгьес, окIнева.
Шахъад сельсоветын администрациебышле ва мактаббышле савагьийда клуббы, китабханабы, ФАП-бы, малдохтураршин идаарабы ва медын ташкилатбы водонбы, амма манбышди хаIббананбыше кIазет ойкIан деш.
Масалан, клуббышее ва китабханабышее кIазетбышин подшивкIабы ыккан, амма манбыше не джони китабханабышис, клуббышис ед’ни мизелин кIазет ойкIан деш, не джос хаахъа. Гойнед сабаранбыше эйгьен: «Ман шас ыккан деш, гьиджооне чика гьаъа?».
МанбышикIле зас эгьес ыкканан:«Инсанар иккидебачIен, югда инкишаф гьидяъан, лазымна иш къидеджен, садджу маъаш алятIасдимее гьуваджен китабханабы, клуббы, ФАП-бы ва медын идарабы гьоIкуматыс ыккан деш». Манбы шакIле югда ацIа водонбы ва манчини гьаIкIее ши хъооIни нумрабышее окIанасын ва лазымни джигабышеехъа маIълумат гьихьараъасын. Манке шокIле ваацIавхьесда кIазетна кьувват.
Ин йизын джуваббы гыргынкъус деш аидда вод, няъас увгьее манбышди аIрее ед’ни мизелин кIазет ойкIананбы вобонбы ва джокIле сагъулва эйгьи. Масалан, Мишлешни хивын маданиятын клуб ва чина хааIрна Мустафа Рамазанов. Манкъвее ва джуни ташкилатни ишчерше гыргынкъве гьар вахтал’ кIазет ойкIанан.
Гьаммаше шахъад югын одкIуний йишди мактаббышее эхьи ыхьа. Амма аIхрейни сенбышее сабара мактаббышее мана иш явашувхьана. Масалан, Мишлешни мактабе 46 ишлемишехьени инсаныке июнни аIхреехъа санкъведжад кIазет одкIун деш. ОIгийл’ни сенбышее мааъад шахъад энки югун одкIуний ыхьа.
Ши гьаммаше сувалхъа гьабкIынийнкъаI, гыргыни мактаббышейхъа гьавайкIананбы. Мишл­ешни мактабе гьар сен ед’ни мизелин конкурс алгъайгьи ва мааъадни ишбышди гьаIкIее вахтале-вахталхъа ойкIанан. Умудааъана, манбыше ва шавайий кIазет идёдкIун гьайни йыгъбышее, геджда ыхьейид, поштейхъа гьабкIын ман окIанасын.
Къийна йишин хаIдданан миллет МагьаIчкъале, Къызлар, Дербент, Хушет, Тюбе, Семендер ва сабара джигабышее ешемишехьи водун. Гьамаайид имкан вобынбыше, хаас делес поштын шоIъба водунбыше гьабкIын кIазет ойкIан деш. Тюбее воохьени цIаIхбышилхъа соцсетьбышее зы мураджиет гьаъы, гьабкIын поштейхъа кIазет окIнева, амма 100 гьеххани хизаныке10 инсане кIазет одкIун. ГьамаIгьдыд Хушетни хивее.
Къызларни районе оIтми­шхьайни сенбышее 100-150 кIазетний ойкIан. Мааъад гьар хивее поштайн шоIъбад водун, амма махъа гьабкIын кIазет ойкIанна са-кьоIйре инсан эхьи.
ГьоIкуматын йишди миллетыс «Нур» кIазет, джамаъаIт саджигейхъа саъасва гьуво. Миллетын до ахтыхъаъасдимее, йихъбы гьишубы вухьай дюнйейни акьвал’ ацIарлаъасдиме кIазетын хаIбна иш вуккекка вобна. ГьаIшде кIазетни кумагын манбы няаъаб ешемишувхьай, гьиджо ишбы гьаъа ыхьай, шахъаб нягьаIбын ацIаал’нан ааIлимар, шейхар вухьай хаIббананабышикIле ацlа водун ва йихъбышин до дюнйейлхъа еймишау водон. Мааъад ойкlанан хаlдданан материалбы йихъбышди таарыхыс, манбышди къийнийни йигъыс, гьаъани ишбышис, экономикайс кьадсырыйнбы водунбы. Манчиле савагьийда, кIазетни сайфабышее йихъбышди ааIлимаршис, ишкар инсанаршис, заIгьматкараршис, джаванаршис, шааираршис къадсырыйн материалбы гьеххаалика растына хъайленбы.
«НУР» кIазетын ишчера чалышмишоохьенбы аIхани къайдайл’ йишди миллетни гьаIкIеедын маIълумат гьелес, манбышин сес республикайни, гьоIкуматни регьбераршилхъа гьихьараъас, йишди халкьыни югни ва писди гьаIдисабышди гьаIкIеена хабар хъобкуба шолхъа гьивхьарааъас. Манчиле гъайре ши гьаIракат гьаъан йишди халкьын аIдатбы, адабият, миз, маданият саламатда гьивааджес ва Дагъыстанейий Азербайджан ешемишоохьени цIаIхбышин алаакьабы маIгькамаъас.
Йишди ишис кьиймат садджу шоке гьевлес вааIхас, няъас увгьее йишда иш шокIле къоодже вобна. КIазетыс кьиймат манчин акьва къидеджуйни инсанарше гьооли. Гьел’бедти, шахъадыд саIгьвбы эйхьенбы. Вахтал’ гыргыни джигеехъа вуIххъас усылоохьи деш. Сабара инсанаршис, ишбышис хъобкуна кьиймат гьевлес вааIха деш. ГьуIрматыс лайикьын инсанар, фагьам гьидёву аахва. Шу шакIле йишин нукьсанбы эгьес ыккан, шакасана гаф джигайл’, ваяхуд редакциейхъа абы гьааъас вуккан. Манке ши хъобкуни мислягьаIтеехъа хъавалесынбы. Шоке ши садджу сенее са элейс поштейхъа гьабкIын 500-600 манат (гьидчуд дешин кар) миллетни йаIххъехъа харджавъу, ед’ни мизелин кIазет одкIун шу, цIаIхбы вобонбыва тасдикьауй гозетяъа.
Гьайни карейхье дора ши саджигее вухьес. Дешхьее шахъад геледжагъыл’ гьидчуд ихьес деш, ши миллетхьинне гьодгъул аIлгьаасын!