Дюнйейни акьвал’ хаlдда джурабаджура санаъаlтбы водунбы. Манчини аlрайл’ ши гьаммаше кьомана джига инсанаршис кумаг гьелени санаъаlтбышис гьооли. Манбышда иш дагъамийвалейхъа гябкlыйнбышис чини вахтал’ кумаг хыл’ гьувой водун. Скорый помощыл’ ишлемишоохьени фельдшераршике, медйичибышике, шофераршике чlырынкъуна ыlмыр багълыба.
Къийна мани санаъаlтыл’ чалышмишоохьен йихъбыб кlылба дешинбы. Дербентни шагьарее ешемишехьена Мустафаев Юсуф Магьаlммадна дих мани санаъаlтыс къуллух гьааъан хаlдда сенбы водунбы. Гьайни сен мана шагьарни Скорый помощни станциейл’ ишлемишехье гиргъыл’на 32 сен быкырехьи. Манкъуни увгьойка, мани сенбышее вудже хаlббанани инсанаршис сагъламийвалла гьуваджесдимее кумаг гьагу. Манбышда геллесда чини вахтал’ алятlуйни кумагыке сагъба авху.Ю. Мустафаев 1966-ъсди сен Цlаlхыйни хивее едике ыхьа. 1981-ъэсди сен мактабын молюдъэсын сыныф таамау, санаъаlтбы Дербентни медцинайни техникумейхъа хъуво. Ёкьудле сенна мааъад хъаlдхъы. 1984-ъэсди сен техникум таамау, ишлемишхьес Мишлешехъа оlтирау. Са сенна мааъар ишлемишхьа. Кьоlдле сенна эскерийвалла гьавъу хъарыйле хъийгъа, едике ыхьайни хивее больницее ишлемишхьа. 1989 — ъэсди сениле гиргъыл’ Дербентни скорый помошни станциейл’ доътурна ишлемишехьи. Дербентни Скорый помощни станциейл’ Юсуф дохтуре вуккейкани ишис, чlыlрыlнбышис гьагвани къайгъуйс ахтына кьиймат гьооли. Джуни ишис гьуlкуматын мана хаlдданани мукафатбышис, дипломбышис, таlриф гьагвани кагъызбышис лайикьра къаджы.Манкъуни увгьойка, мани сенбышее энки дагъамынбы аlхырейдын кьоlлле сен ыхьа. Коронавирусни пандемиейн джона иш кьоlни – хьебни элес йыlкь хъавъу. Манчика багълыда дохтураршин хъобтlулыйбыд хаlд хъыхьа. Шаца мана Дербентни шагьарее Скорый помощни станцией сауйни эпиддестейс хаlбвалла гьавъу. Сабара вахтна мана мааъар чалышмишхьа. Пандемиейка начахувхьайнбышис кумаг гьувойхъа гора, манкьус республикайнийий шагьарни чаlакlынбышди доюле грамотабы, мукафатбы гьуво. Къийна Юсуф дохтур, фельдшераршис гьелени энки ахтыйни доюс лайикьра къаджы ворна. Юсуф дохтурухъаб, гьамбазаршини аlрайлиб югна гьуlрмат вобна. Мана гьар вахтал’ манбышис лазымни карее кумаг гьелес гьаlзирра ворна. Станциейни регьберарше Юсуфни ацlаалийс, гьааъани заlгьматыс лийкьыквана кьиймат гьооли. Манбыше манкъуна дараджа ахтывалей гьуваджи. Ишни гьаlкlе гафы гибхьыйнкъаl, манкъве эйгьен: «Скорыйна дохтур ыхьай марахуквана иш вобна. Чlырынкъусхъа чини вахтал’ гьирхьылий манкъус лазымын кумаг гьувой йиздимее хаlбна хошбахтийвалла вобна». Йишда гафчий садджу ишил’джар деш джомардра , мана Дербент ешемишоохьени цlаlахбышди аlрайлир хаlнни гьоlрматыкана инсан ворна. Манкъве хаlрна-кlыл’на хъуваацlана йихъый ворна. Югни-писди йигъыл’ дост-танышни кlане ихьес чалышмишехьена. Джуке ахаlн кумаг гьелес гьаlзирра эхьи. Хъийгъалетти Юсуф дохтур арыйни мигьманыс, гьамабазыс гьоlрмат гьаъана ворна.Йишди редакциейн Юсуф чоджий, джун гьамбазар йикlенче табрик гьааъа. Манкъус джуни ишил’ угъурбы, сибыкийвалла аlрзаъа.
