2021 сенни майни 18-чил Совет гьуIкуматни социалист эмекни кьаIгьраманын, муслагъалий йаIгьйе ФерзаIлиевын 90 сенний быкырхьес. Хизанын, насылан, джамаъаIтын, халкьын до аIкIел’нани, камалнани, йаIгь-ламысыквани, гъирйатыквани инсанаршини обышиква багълыда.
ФерзаIлиеваршина насыл Муслагъни хивее, быкырни цIаIхбышди миллетни арайл’ доюквана, гьуIрматыквана насылобна. Манчина дараджа гьалеб ЙаIгьйе ФерзаIлиев хьиннени игитерше ахты хъавъу.Йишди халкьыхъаб гьар-гьаммаше ваIкьайни пешейн устадар вухьайнбы, вобунбы ва вухьесынбы. Ман идаагаршике хъооIн санаъаIт водун, манчини аллаб, манчил’ Оорункъуна маIргьамат вобна. Муслагъни хивын Свердловни доюлин кIалхоз Совет гьуIкуматни вахтал’ республике милйончий кIалхозбышин са ыхьа. Мани тасарруфатын гьуIкуматын гиххьыйн пIланбы гьеххаалика гяцIаъа ыхьа. Гьавъуйни заIгьматыс оIлкайн хивни тасарруфатын ишчер премиебышис, ахтыйни добышис, медалбышис, орденбышис лайикьба къооджи вухьа.Йишди одкIунийна кьаIгьраман И. ФерзаIлиев 1931 сен Муслагъни хивее пешекарни хивее едике ыхьа. Мааъад дагъайдни сыныфбышин мактаб таамау. ЙаIгьйе ФерзаIлиевыс ваIкьайн санаъаIт деккее, ФерзаIлее, хаIдхъау. Угъад магьаIб хъабы ки, ЙаIгьйе джегьил’рананкъаIджар дек’ раIгьматыххъа аркIын. 1944 сениле хъийгъа манкъве пешекарна пеше гьааъа гиргъыл. ЦIедда манкъус корпачиин санаъат тапширмишау. КIыл’дакIыл’да ата-бабайни пешейн ичи-бичи ацIахьи гиргъыл. Гойне хьинне ЙаIгьйейна дараджа сикIыл’ба ахты хъувхьа, манкъуке ургехъан (тохлучий)гьау. Пешекарна ахтыйна дараджа гязани ваIкьабышиква гьаркIыний вобна. ЙаIгьйейн санаъаIтылхъан гьавас къаджы, къулай къаджы манкъус сагъмалчийна къуллух гьуво. Йиссейда манчикIле цIаIхбыше къаIналийва эйгьи ыхьа.ЙаIгьйе ФерзаIлиев 39 сенна хааIрни пешекарни къуллухыл’ ишлемишхьа. Манкъве гьааъана иш темизни йикIеква, Аллагьылхъани хаIдни инамука, халкьыни хайирыс гьавъу. ЗаIгьматын, ацIаалин ЙаIгьйе ФерзаIлиев ахтыйни дараджейхъа гьихьар гьау. 1971 сенни апрельни 8-чил СССР-ни Аали Советни Фирманыква ФерзаIлиев ЙаIгьйе ФерзаIлийни дихыс Социалист эмекна КьаIгьраман до гьуво. Манчиле гъайре манкъуна заIгьмат «Дагъыстан АССР-на лайикьыквана малдарчий» шарафукани доюква агъмишавъу.
Й. ФерзаIлиевна югвалла, инсанийвалла са ваIкьабышди пешейква деш багълыба, мана хизаныс, джамаъаIтыс, халкьыс ирхьынна инсан ыхьа. Джуни кул’фатбышис хьебни духайс, кьоIни йищес гыранна дек’ ыхьа. Духйебышди санкъус, МагьтимагьаIммадыс, джуна ваIкьабышда пеше хаIрхъавъу. ГьаIшде манкъве Муслагъни хивни тасарруфатни кIапIратIифыс геедни гьаракатука хаIбвалла гьааъа. Манкъуни заIгьматыс районни чIакIынбыше хаIбна кьиймат гьооли.ЙаIгьйе ФерзаIлиев цIаIхни миллетна кьоIръэсда Социалист Эмекна КьаIгьраман ыхьа. ЦIеррийна сувагылий Мина Назирова йихьа. Манбыше йишди миллетни таарыхе кIоран из гьадсыр. Шахъаб нимее доюкан инсанар вухьей, гьаманимеед миллетын до ахты хъихьес.Й. ФерзаIлиев 2006 сенни мартни 28-чил раIгьматыххъа аркIын. Йишди арайл’ вудж дехьейир, манкъун до, къаджейн ишбы ненкеджад кIелиханас деш. 2000 сен Бабаюртни зонайл’ еррашмишивхьайни Тезе Муслагъни йыIкьнекни мактабыс СССР-ни Эмекна КьаIгьраман ЙаIгьйе ФерзаIлиевын до гьуво.
