Диндийн гадиг гийгъални джигее, Самур дамайни сагъни сурал’, гунайил’ йиссейба Калелна хив илёбзур вухьа. ДжинаIгъни хивни сурале махъа вуIххъахьее, Калелхъа эбчIесдимее, Самурни дамайлена йыIгъ алгъавгьу, доламабышикван тик алягьас ыккан.
ОIгийл Калел сафарийени инсанарше тавсун аляатIана хив вухьа. Юххьан, цывылихъа кочес Галахъа аIлгьаан, дават-давлатеехъа оIххъан ЦIаIхни дерайл’ни алидни хиваршин джамаъаIт Диндийни гадигеенчений пиядаба, карванбышиква ивийкаранбы. Сасса вахтал’ манче кьыIд’мына: буранык, йизык’, ыкIеекIбышике илгъебчIесний гябакIанбы. Мани гадигеенче аIлгъаанкъа, инсанаршилхъа йигъйеш адайлена вахтыб воохьенаний. Къаейн ыIхийхаIна, селин, дамайн гьичIийхарна, суван гьааъана, хъаъайкIанна, ыкIеекIын басмышаъана инсан камехьена дешдий. Манке Калелин джамаъаIт гьаммаше кумагыс гьийхьар ыхьа. Йигъыс аIлгьаа — хъооIна мигьман дешин хав калел’бышихъад эйхьен дешдий. Манбыше мыссынкъус чейий гней гьуво, мыкIаалин авхъуйнбы къуIмавъу, обзурыйнбы хаIмыс гьувааджы, чIыры хъувхьайнбы, къел’-хыл’ гьадкьурыйнбы хъувабкавъу. Калел’ йиссейна цIаIхбышда, кIоран таарыхнана хив вухьа. Мани хивни таарыхни гьаIкIеедын маIълумат ши макьаале «Калел’, калел’бышин джамаъаIт» «Нур» кIазете гьувойн. Ин ша Аллагь, ши цIаIхбышди хиваршини гьаIкIеедын китаб къекканкъаI, мани хивни гьаIкIеедын быкырын таарых махъа адчесын. Гьел’бедти, йишда аIсас макьсад Калел’на хив, калелин джамаъаIт, калелбышин аIдатбы гьуваджий вобна. Анджах, шас медни каран эсер гьаъа. Къийна сувал’на Калел’ авху деш. Эн писин карыд Ватан, юрд веранувхьай водун. Калел’, Агъдам Калел’ цIаIхбышин таарых водун. Мани хивеенче хъигъебчIуйни инсанарше хивын таарых гьуваджес ыккан. Сабара сенбына гьихъа Калел’ни хивни джегьилерше фонд къурмишау. Манчина аIсас мураад вухьана – йиссейна Ватан абрелхъа хъавалявъуй. Манбышихъад, нягьаIбый мана хъааъас, джон проект водун. Шаца къыIлина Бабаюртни районе ва шагьарбышее ешемишоохьен джегьилер сабы-хъабы Сувал’ни маIгьалыл’ни йиссейни Калел’ни хивеехъа гьабкIын. Манке манбыше хивни ёкьсуралин горханабы ( някьвбы), зияратбы сетIкIайква гьаIсареехъа алеетIу. Фыкреехъа алеетIуйн гыргын ишбы гьаъас усулывхьа деш. Ман ишбы гьайни сен джегьилерше къедже водунбы. Манбышди ниятее водун, гьалекийс мааъад са-кьоIдле хав аляуй, йаIхъ-кьыIт’ хъаый, хьян цIыцIаъый, токIан иших хъадый, поштина йаIхъ хивеехъамее гивший. Агар ман шараитбы яратмишаъас аIхее, бел’ки махъа кочмышехьен хизанбы эхьи. Лап цIебба ейлягъыс ал’гьааIнбыджаб вухьее, мана хаIбна иш вухьес. Манчилхъана умуд вобна.Джегьилерше ниятеехъа алеетIуйн ишбы кIыл’да-кIыл’да гьаъа гибгъыл вобунбы. Манбыше мислягьаIт къваджена гьайни сен Бабаюртни дюзиле сувал’ни Калел’ни оIршбышеехъа чавра хъыккес. Гьел’бедти , ман ишбы къедженкъаI дагъамийвал’- бышикваб растна хъабайленбы. Мана цIеббыйна мисала гьаIллавъуна. Аллагьни кумагыква хивни джегьилерше сувалхъа 80 авабкьырна къарамал кочес хъувкы. 15 сенний водун калел’бышди малкьарайн махъа гов гидивийххьен. Ман коч хивни джегьилершини ( Къараев Исрефил’ни, Къараев АIбдураIгьман (Тарлан) гьаIджийни, Кьурбанов МагьаIммадни, Къараев МагьаIммадэминни, Къараев Рустамни) гьаIракатыква къурмишаъы. Хивни имамейиб манбышис мислягьаIт ва кумаг гьувы.Мал махъа хъыккекканкъаI йизбы гёгъы, манчихъа гора машинбышиква джигайлхъа мал гьихьараъас ыхьа деш. Чайнеенче сувалхъа пиядада хъыккы. СыкIылин зиянбыд ыхьайнбы. Анджах манчихъа ил’дяакы, джегьилерше джолхъа алебтIуна иш быкыравъуна. Мани джегьилершини увгьойква, манке джос хаIдын кумаг къенбышди, гыл’мецIбышди, хьойикбышди, джинаIгъбышди, атталбышди джамаъаIтын гьувы ва манбышикIле сагъул-варул эйгьи.Чавра джигайлхъа гьихьарауйле хъийгъа, манбыше наIхирванысын хав (дега) , агъыл аляъы. Хив, «мигьманаршини» гьабсырни гьаIш-гьуIшике темизявъу. Анджах хив гьаIкIебаб къелилхъа озахъааъасдимее , хаIдын харджийбы лазымда водунбы. ЦIебба хивни балее хивын джамаъаIт аххъас ыккан. Къийна джуваб эгьесын, джигайлхъа гьихьараъасын , джегьилершис хыл’ авхъасын , кумаг гьелесын инсанар калел’бышихъаб вобунбы. Гьел’бедти, мана са калел’бышда джаб деш дагъамийвалла вобна, манчини балее гыргын цIаIхбы аахвас вуккан. ЦIеддыйн аддым гьаммаше дагъамда эйхьен, анджах хъийгъа йаIхъ ачмишоохьена. Джегьилершини увгьойква, чIакIын ишбы къаджесдимее, джо кумаг ДР-ни Халкьни Иджласни цIаIхбышди депутатыке Фикрет Раджабовыке, ЦНКА-ни садрыйке Рафаел’ АIлиевыке гозетяъа водун. ЦIаIхбышихъаб мисала вобна: « Йиссейни архылхъа хьян сийкIалан». Инам гьаъан , мед мысахье йиссеени Калел’ лампайн иших, бухарайн кума хъихьасын. Манбышихъаб Ватанылхьан аIшкьнан джегьилер вухьайнбы, вобунбы мебыб вухьесынбы.
