Июнни 30-чил’ РФ-ни юстициейни министерствайни УИС-ни къаравул’ни къуллухни ишчершин Йигъ алгъайгьи.
Къийна йишин джегьилер гьарджура гьоIкуматни къуллухбышил’ ишлемишоохьи вобунбы. Манбы няаъаб ишлемишебаххьи вухьейиб , джона иш серрасыба гьааъа. Манбыше вукIул’ салламишааъасын кар мысаджад гьаъа деш. МаIгьарни игитершина сайир муслагъалий Назим Наврузов ворна. Гьайни уIл’джумее мана йишди редакциейна мигьман ыхьа. Мана РФ-ни юстициейни министерствайни УИС-ни къаравул’ни къуллухыл ИК №7 ишлемишехьи. Наврузов Назим Джамална дих Рутул районни Муслагъни хивее едике ыхьа. Деккин до Джамал , един до Севир водун. Дек Джамал чоджий джурабаджур къуллухбышил’ кIалхозее ишлемишхьа, гьам мана цIаIхбыда доюкана зурначий ворна. 1997-ъэсди сен манкъуна хизан Тюбеехъа кочмишивхьа. Къийнаб Джамал чоджее МаIгьчкъалее, Каспийск, Къызлар эхьен цIаIхбышин даватбы накьра-зурнайни сесеква ярашугъеехъа хъаляъа. Назим манкъуна хааIрна дих ворна. Назимыле гъайре , Джамал чоджийхъабый Севир баджийхъа дих- Джабир, йишбы- Пери, Раисат, Гульджанат вобунбы. Манбышди гыргынбышихъа джон хав-уджагъ вобун.Назиме дагъайдын сыныфбы Муслагъни йыIкьнекни мактабее хъаIдхъы. Алидын сыныфбы Тюбейни йыIкьнекни мактабее 2001 –ъэсди сен таамау. Гьамани джар сен мана хъаIдхъас МаIгьачкъалайни Автодорожный колледжехъа иккечIу. 2004 сен ман таамау, поштини йаIхъбышди устадын санаъаIт алеетIу. Гьамани джар сен эскереехъа Ватанын бордж хъелес аркIын. Мааъаб танкбышди войскабышее къуллух гьавъу. Эскереенче хъары, тиклибышее фегьлена, гойне устадна ишлемишхьа. Джусын хав аляу, 2009 сен хусусы хизан Тезегуликва къурмишавъу . ГьаIшде манкъухъар са йиш – Лейла, кьоIйре дих- МаIгьаммадий Урудж вобунбы. Манбы мактабни ва ушахбахчейни ешеебын ушахар вобунбы. Назимий Тезегул’ чалышмишоохьенбы джон ушахарыб югни йишди баба-дидершини наIсигьатбышиква, тербиейква, аIдатбышиква чIакIыхъааъас.2009- ъэсди сен джуни гьавасыква мана ишлемишехьи ФКУ ИК-7 УФСИН РФ по РД гиргъыл’. Иш дагъамна вухьейиб , манкъвее зигаара гьааъа деш. Мани ташкилатее мана прапоршикни званиейква къаравул’на инспекторна ишлемишехьи. Йишди суалыс : « Гъу мани ИК-7 гьиджо ишне гьааъа ва гъу йигъни къуллухыле разийране ворна?» манкъвее джаваб хъуво: « Гьар инсанее джус вукканна иш сечмишааъа. Манчини гьаарынчихъад чин хусусиятбы водунбы. Гьаарна инсан ишлемишехьена джуна хизан доланмишааъасдимее. Гьайна къуллух гьааъас вукканни инсаныхъад цIедда сабыр ихьес ыккан. Гьел’бедти дагъамийваллабыд хъызахханбы. Анджах, гьоIкуматни сураке шалхъана мугъаетыйвалла хаIбна вобна. Медни гьоIкуматни ташкилабышихъа иляаканкъаI, йишин доннухбы югда водунбы. Сен-сениле йишин доннухбы, къуллухыс сикIы чIакы хъаъанбы ва медын соцпакетбыд водунбы. Палтар гьелен, одхьуний гьелен, сене са элейс йаIххъын харджий кьаIрад эхьи, масалан отпукни вахтал’ агар гъу менни шагьареехъа истирагьатыс оIхъахье, больничныйбы хъеленбы, путёвкIабы сура кьийматыс гьели ва медынбы. Манчихъа гора зы йизди ишиле разийра ворна.Йишда иш мана вобна – дустагъеехъа авхъуйнбы къорамишавъуй. Ши вышкабышиле иляаканбы, манбы гьимебахаджин, карбы къаанче ахъа, не аанче хъахъа дыгъмаъаджинва, къадагъа гивхьыйни сергьатысахъа делес хъивхьес гьавайсар деш. Агар бирданхьессе ман кар шакIле къаджее ши хабар гьооли. Ши манбышикв мааъаб растына хъабайли деш, нейиб йишонааъа деш. Мани ишбышиква мебынбы маIшкьулоохьи. ИК-7 садибни режимыкван дустагъ водун. Мааъаб йыIкьни статьябышиква гивъурийнбы дешинбы. Маабын дустагъчер промзоне ишлемишоохьи ва манбыше фегьле санаъаIтбы аляатIа. Мааъад дустагъ цIыцIаъанбыше йиван аккабы гьаъа, осан ешикIбы саъа , фегьлебышин палтарбы ийхьва. Манчике доннухыд гьелен. Агар са элейс саIгьв къайиккыйни инсаныс хъобкуни ыIмрени йаIххъылхъа сакIалас ыкканхьее, гыргын имканбы водунбы ыIмыр тезе джилдайле гивгъаласда. Дустагъыкейий оIлумыке саджар къорамишау дешорна. Зас ыкканан, ненаджар дустагъеехъа гидирхьуй…». — Назим, Тюбееени дустагъее вака ишлемишоохьен ва мааъд дустагъ цIыцIаъан йишди эллин инсанар вобунбыне? — Вобунбы. ИК-7 закасана Кьадиров Бахтияр, Асланов Нуриддин, ГьаIджиев Теймур, Тагъиев ШихаIгьмад, Кавузов АIгьмад ишлемишоохьи. Йишди гьаарункъве са иш мааъаб гьааъа. Шаква сана мааъар хил’дже сенбына гьайни сен джегьирра джар раIгьматыххъа аркIынна Нателла УIмарова ишлемишийхьа. МаIнкъыхъаб хаIбна гьуIрмат вухьа. Ши гыргынкъвее маIнкъылхъа раIгьмат къухооли. Манаб гозет’гьидяаъана хабар вухьа. Манбы Аллагьын ишбы водунбы. Джени адамийс, ушахаршис ыIмыр Аллагье гьевлена.Дустагъее гивъурийнбышди аIрее йишди элинбы вухьай, девхьай закIле хъодкуда ацIа деш. Манбышиква зы хъызахха деш. Йизда иш сыкIылба мебна вобна. Къайиххьыйква, йишинбышике гивъурийнбы мааъаб дешинбы.«Нур» кIазетни редакциейн РФ-ни юстициейни министерствайни УИС-ни къаравул’ни къуллухыл’ ишлемишоохьен инсанар джони байрамыква табрикааъа. Манбышис джанана сагъвалла, сибыкна къуллух аIрзуламишааъа!
