АIдабият ыIмрее эхьени гьаIракатбы, бадалхьайбы гьагвана наххварий вобна. Манчини инсаныкIле ыIмыр хъобкуба вуккейсын сент' гьагва. Шааираршина, язычершина метлеб вобна гьихъийалла эхьен карбы хъодкуда миллетбышилхъа джони асарбышеенче еймишаъый.

ЦIаIхбышди адабиятыхъад кIоран ва йиссейн таарых водун. Анджах манчин хаIдданан оIгийл' одкIунийн асарбы медни графикайл' ва медни мизяаршил' одкIун. Йишди архайлхъа ман тика-тикана гьидхьыр. Манчин ачухын маIълумат шахъад дешин.
Шукур Аллагьылхъа, ХХ асырни аIхрее цIаIхни мизес ойкIанан язы кирилни хаIтIыл' къурмишаъы. ЦIаIхни адабиятна текар гьаIррамишоохьи гибгъыл. ЦIаIхни мизел' шааирарше джон асарбы ойкIан гибгъыл. Манбышин хаIббананбы поэзиейква маIшкьулувхьа. Сабара вахтале проза, адабиятна публицистиква аIреехъа хъады. ЦIаIхбышин фольклор саджигеехъа саъы ва ман китаббышее чапаъы. ЦIаIхбышди шааираршин, язычершин асарбы медни мизяаршилхъа сакIалаъы ва манчин сабарабы федерал антологиебышеехъа гядкIу. ЦIаIхбышин адабият къелилхъа сугъоцы, маIгькамни атдымбышиква гьихъа аIл'гьаа водун.
ЦIаIхбышди адабиятна хаIне дюнйени адабиятни джаргеехъа эвчIу. Гьел'бедти, мани хаIнейс къекIуй гьелена сайир гыл'мецIалий АIбдураIгьим Дадашев ворна. Къийна мана йишди миллетни адабиятна агъсаххъал ва классик ворна.
Адабиятни гьаваскараршикIле мана югра ацIа ворна ва манкъуни асарбышиква дёлесийваленче танышба вобунбы.
АIбдураIгьим маIъаллимын асарбы хаIдданани антологиебышее урусни мизелхъа сакIалаъы чапаъы водунбы. Манчиле гъайре манкъун шечIбы ингушаршини ва медни дагъыстанни миллетбышди мизяаршилхъа тарджума гьаъы. Манкъун асарбы мактаббышди китаббышеехъа эчIу ва цIаIхбышди артистарше манкъуни джуваббышикван маIънийбы гьекIва.
АI. Дадашеве джун асарбы гьале ушахыйвале ойкIан гиргъыл'. Къийнаб манкъуни хыле кьалам мейиб вобна. Ешехъа ил'дяакы, манкъве адабиятын гьаваскарар тезе китаббышиква шадааъанбы.
АIбдураIгьим Дадашевын гьаIракатбы къадже, мана Россиейни язычершини Союзеехъа алертIу. Манкъвее джуни асарбышиква йишди гьоIкуматыкIле цIаIхбышин гивъур-сугъоцый, маданият, таарых, аIдатбы ва йикIее айханан дагъамийвал'бы гьагва.
АIбдураIгьим маIъаллиме джуни поэзиейн хьодле китаб:«Уста РаIгьимна хаIне», «Йихъистан», «Ну как молчать?», Сувабы вергъек' авуд» ва «Къарадагъна кьев». Ёкьудле китаб манкъвее джуни харджийбышиква чапыке къайиккы. Ши мани китаббышди гьаIкIеедын макьаалебы «Нур» кIазете гьувойнбы. Ман китаббы гьазираъанкъаI, манкъус кумаг «Нур» кIазетни редакциейн, джуни духее Тарлане, йище Гул'наре, шааирарше Валегь Гьамзате, Къинады Саиде , Мурад Саиде, Фазил Дашлае ва мебынбыше гьаъы. Эгьес эхьи, манкъун гыргын асарбы «Нуреенче» илгъечIу. Маайиб эн хаIбна заIгьмат Камил' Шамхаловна вобна. Манкъвее манбы адабиятни мизени кьараалихъа хъыъы.
АI. Дадашевын хьодъэсын китаб «Къарадагъна кьев» гьайни сен гьоIкуматни харджийква Дагъыстанни китаббышди чапханее гьазираъы ва чапаъы.
Мани китабеехъа шааире одкIунийн тезе шеирбы эчIу. Манбы муIгьубни, аIшкьни, табиятни, заIгьматни ва менни инсаныква багълыдани ишбышди гьаIкIеедынбы водунбы. Мани лирикайни жанреехъа шечIбышиле гъайре, поэмабы эчIу водунбы.
КьоIдъэсын китабын сура тарджумабышис къадсырыйн водун.
ШакIле АIбдураIгьим маъаIллим садджу шааир хьиннеджар деш, гьам мана тарджумачий ворна. Манкъвее цIахни адабиятни мизелхъа доюквани, дараджайквани дагъыстанни, урусаршини, авропайни, азиейни ва машрыкьни шааираршин, язычершин асарбы сакIалаъы ва мани китабеехъа эчIу.
Шааирни ниятее водун ман китабын презентацие алгъавгьуй. Шинаб гьазирба вобунбы мани ишее шааирыс хыл' авхъас.
Югданий ихьес, агар гьаIмагьадни миллетиква багълыданани ишбышее йишди депутатарше, ишкарарше, интеллигенциейн шааирыс хыл' ахъунахьий. Манчина са йаIхъыб манкъун китаббы алищу хъаIдхъий, сана- санкъус пайис гьувой ва мактаббышее мани китабни гьаIкIеедын ачухын дарсбы ыккый.
АIбдураIгьим маъаIллимыс джанана сагъвалла аIрзуламишааъа ва медын китаббы къайиккас кьисматхьенбы. Шааир, ааферин! Кьалам хыле хаIдда сенбына авхъас кьисматувхьена