Гьар сен сентябрьни 15-чил' Дагъыстанни халкьбышин Садибийваллайн Йигъ алгъайгьен аIдат водун. Мани йигъыл' республикайни гыргыни шагьарбыше, районбыше, хиваршее шадлыгъбы алгъайгьи. Концертбышейхъа, гьагуйбышейхъа, тадбырбышейхъа аазырбышиква инсанр сабайли.

 Мани йигъыл' геед уфтанын тадбырбы ЦIаIхни дерайл'ни Мишлешни хивейид илгъечIы. Хивни йыIкьнекын мактаб ва ушахаршини бахче Дагъыстане алгъайгьени байрамыс югба гьаIзирувхьа. МичIейдыле мактабна ва ушахаршини бахчейна магьаIллабы уфтанын миллетбышин палтарбы аляуйни шигыртаршиква гяцIыйий. Папахбы аляуйни гадебышийий калагъайбы гьадчыйни ичерше шадба йигъынджагъын аахъый гозетяъа вухьа.

Хивни йыIкьнекни мактабеедын йигъынджагъ гигъалассе гьихъа, зы йаIхъ ушахаршини бахчейхъа авхъу. Бахчейни магьаIлле зы мааъб ишлемишоохьени тербиечерше ва ишчерше къаршиламишау. Гойне хьинне зассахъа «Настенька» донан бахчейна хааIрна Ширингул' Рамазанова дёлес хъийхьа. Бахчейни хаIрынкьей арыйни мигьманыс къийна йиджее хааIбвалла гьаъани ташкилатни къийнийни йигъыке гаф гьавъу. Гойне хьинне, маIнкье зы бахчейхъа хъавайлени хурни ушахарше тербие аляатIани сыныфбышиква ва одхьуний хъойхьаран буфетыква дёлесвалейнче танышау. Къаджейнчиле зы нимеехье рязийра аху.
Ши ушахаршин бахчейнче хъигъебчIессе, ушахар шадлыхбышис маIгьалее гьаIзиребхьайий. Манбыше ши уфтанни Дагъыстанни миллетбышди палтарбыше мыкIаршиква къаршиламишавъу. Ушахарше цIедда цIаIхни халкьына, гойнехьиннеб лезгинкайна мыкI гьавъу. Манбышди хатирес хъитIетIу зынар мыкIыс хъигъечIуна. МыкIаар таамхьайле хъийгъа, ушахар суфранылхъа сабы. Манбыше дадаквани хорагбышиквайий ширниятбышиква джон йигъынджах давамгьау.
Ушахаршин бахчейни коллективыква саламатламишхьа, зы йизда йаIхъ тезелбанба хивни йыIкьнекни мактабейхъа авхъу. Зы махъа гьирхьыл'мее, мактабни магьаIлле йигъынджах гидгъыл.
Мактабейхъа хавайлени ушаха­ршини ва маъаIлл­имаршини гьийд мактабни директоре Элескер Лачинове чыхышау. Манкъве Дагъыстанни халкьбышин садибийваллайни байрамни йигъыкен махъа сабыйнбышис аIтрафлы маIълумат гьуво.
Манчиле хъийгъа дагъайдни сыныфбышди шигыртарше Дагъыстанни садибийваллайс къадсырыйн урусни ва цIаIхни мизелин шечIбы хъаIдхъы. Манчиле хъийгъа, гьар сыныфын джурайда джос дарс гьелени маъаIллымыква мыкIаарау.
Мактабни маIгьIлле манчиле гъайре ушахаршихъад ва тамашейс абыйни инсанаршихъад йиссейда хаани аIрайл' ишлемишаъани дезгагьбышиквайий одхьанни хорагбышиква танышувхьесын имканбыд ыхьайнбы.
Мактабни директорни Э. Лачиновни увгьойка, мактабын маIгьдын байрамбы, йигъынджахбы, тадбырбы гьар сен алгъайгьенбы. Манчин гьаIкIебаб, мактабни ушахаршини ва маъаIллимаршини аIрайл'на достыйвалла сыкыIлбаб гуджламишааъана.
Мишлешни хивни мактабейдын ва ушахаршин бахчейдын Дагъыстанни халкьбышин садибийвалийс къадсырыйн йигъынджахбы уфтанни мыкIаршиква таамхьа. Махъа сабыйнбыше тохувхьесын мыкIар гьауйле хъийгъа, хайбышейхъа дагъылмишувхьа.