Сентябрьни 8-чил' Россиейни миллетбышди мизяаршин Йигъ къейдаъани йигъыл’ «НУР» кIазетна хаIрна редактор Байрам АIбдуллаев Рутулни районни Бабаюртни къышлагъбышейни тассаруфатбышди мактаббыше ыхьа ва мааъад «Вааджибна гаф» донан дарс алгъавгьу.

ЦIерра мана Камбулатни мактабее ыхьа ва мааъар мана мактабни директорыква Рамазан Османовыква, мактабни маъаIллимаршиква горушмышхьа, гойне 6-ъэсди сыныфее «Вааджибын дар» ыккы. Мани мактабе ед’ни мизен дарсыбы аварни ва цахни мизел алгъаа водонбы . манчихъа гора ман дарс манкъвее урусни мизел’ алгъавгьу.
Байрам АIбдуллаеве ушахаршиквани ва манбышди маъаIллимаршиквани горушее Дагъыстанни миллетбышди мизаршди ва манбы гьуваджийни гьаIкIе гаф гьавъу.
Манкъуни увгойква, гьавагьийда деш Россиейни Президенте Владимир Путине миллетбышин мизаар гьуваджен Йигъ 8 –ди сентябрыл’ къейдаъуй кьарарейхъа алятIу. Мани йигъыл’ Дагъыстанни халкьна шааир Расул Гьмзатов едике ыхьайн йигъ водун.
«ШокIле ацIахьес ыккан мани йигъни гьаIкIе, гойнед гьаммаше ед’на миз мани йигъыл’джаб деш икIелхъа хъаваляаъас вуккан гьаммаше, гьар йигъыс. Миз цIебба хаа декика, едика, гойнеб куче, мактабее вушди аIрайл йишонаъас вуккан. Гойнед мактабее ед’ни мизелин дарс алгъайгьенкъаI маъаIллимыхъа кIыры гьелес ыккан», - манкъве увгьо.
Камбулатни мактаббеенче цIаIхбышди кIазетна хаIрна редактор Калел’ни мактабехъа гьаркIын мааъар директорыква, маъаIллимаршиква горушмышхьайле хъийгъа, хурни сыныфбыше аIлгъани ед’ни мизени дарсе иштыракаъу ва мааъад мед ед’на миз гьуваджийни гьаIкIее йишонхьа. Гойне гьар сен алгъайгьени цIаIхни мизени конкурсни гьаIкIе увгьо ва ушахаршикIле октябрьни вуза ман конкурс илгъечIесва, къейдаъу.
Гьаманиджар йигъыл’ Байрам Абдуллаев Тезе-Муслагъни мактабее ыхьа ва едни мизес къадсырийн «Ваджибна гьфнан» дарс алгъавгьу.
Ушахни тербиейс, маданиятыс, ацlаал'бышилхъани гьаIракатыс цlеббийна гов хизанее гивийхьи. Манчихъа горад, ушахни хъийгъийни ыlмрее вааджибна джига хаанче алятlуйни дарсын, хизанее гьагуйни маданиятын авхъаахъа. Гойне хьинне, манчиква багълыданани ихтиярбышин геллесынбы мактабысхъа хъели.
Ед'на миз' гьувааджий, джуни миллетин маданият гьуваджий, таарых кIелихан гьидяуй гьаар аIкIелис каамил'ни инсанын бордж водун. Мана эн хаIбна девлет' вобна. Девлетиб къорамишааъас ва гьувааджес вааIхас вуккан. Анджах ед'на миз адабылхъа, къулайлхъа мактабее абадчи. Мактаббыше аIлгъаани, хаIбхъааъани мизекIле адабиятна миз эйгьи, мани горушбышее кIазетни редакторе увгьо.