ЗаIгьматбы суваабыс ойкIананбы

Сувал’ни магьалыл’ «Инсан» фондын иш вуккеккана сабара сенбы водунбы.  Мани манзилее фондын хаlдда хайирысын заlгьматбы гьау. Манчини аlрее: аlгьтияджнани инсанаршис тадарукбы, дарманбы ва сабара медын лазымын карбы бытlалау. Пандемие гидгъылийле хъийгъа, манбышда иш къат-къатна хаlбхъувхьа.

  Гьайни йигъбышее»Инсан» фондни ишчерше, Кlуссурни,  Муlхаlхни, Мишлешни, Муслагъни, Цlаlхыйни хиваршее «Хаахъа тадарук» донан акцие алгъагьу. Добы агъмишауйни хиваршее фондни уlзвубыше акка-аккана ивийкыр 70 агъаллан тадарукын пайбы гьуво.  Фондна сувал’ни магьалыл’ни эл’чий Аlсадуллагь гьаlджий Рамазановни увгьойка, къийна йишди хиваршее хыл’ авхъасын хаlдда хизанбы водунбы. Хивни имамарше маlгьдыни  хизанбышин  сиягьый аххъыйле хъийгъа, ши махъа гьивийхьаранбы. Гьини элеесын  пайбы алищес кумаг Урсият ешемишехьена ишкар Адил’ Рамазанни духейий Магьаlчкъъалайни шагьарее ешемишехьена доюкана дохтур Аlбдулнасир Семедни духе гьуво. Сувал’ни магьаlлыл’на имам Эл’дар гьаlджий  Сулейманове, фондна эл’чий  Асадуллагь гьаlджий Рамазанове тадарукын пайбы алишес кумаг гьувойнбышис джони сурале миннатдарийвалла агъмишау, манбышис югун дилегбы гьеххъы. Маныд эгьес, аlхырейни вахтал’ йихъбышди ишкар инсанарше фондыс джоке аlхан кумаг гьели водун. Манбыше джони къийменче фондыс  тадарукбы алищесын гьели.  Манчиле савагьийда, джурайда хиваршис, инсанаршис кумаг гьеленбыб  кlыл’ба дешинбы. Манбыше гьувойн кумагбы, садакьабы суваабыс ойкlананбы.