Августни 10-чил магьаIчкъалайни аэропортул’ Дагъыстанни ХааIрынкъве Сергей Меликове Токиое илгъечIуйни ХХХII къыIлийни Олимпиейни оюнбышин дагъыстанлы спортсменар къаршиламишавъу.
Манбышди аIрее кьоIникъатна алимпиейна чемпион, АIбдулрашид Садулаев, олимпиейна чемпион Завур Угуев, олимпиейни оюнбышда нукIрайна мукафатчий МагьаIммадгьаIбиб КьадимагьаIммадов, капширни медалбышин мукафатчер ГьаIджимурад Рашидов ва Зенфира МагьаIммадаIлиева, олимпиадайна иштыракчий, ёкьубъэсда джига авхъуна , фехтовальщица Айзанат Муртазаева.
Манбышиле гъайре спортивни делегациейни таркибе РФ-ни гьичIоокаранбышди Федерациейна президент Михаил Мамиашвилли, вице-президент УIмар МуртазаIлиев, сербестба гьичIоокарни Россиейни спортна лайикьыквана устад МаIгьач МуртазаIлиев.
Олимпиадайни кьаIгьраманаршиквани ихтелете Сергей Меликове агъмишаийн, оIлкайква саджиге вуджур россиейни сборныйни кIамандайни чыхышилхъа диххъатука илякка ыхьа. Гьайни сен ши Олимпиадайлхъа оIгийл’ хьинне деш. иляака вухьа. Гьини элейс оюнбышис гьазироохьенкъаI спортсменаршилхъа оIгийл’ шавукIледжад къидеджейн дагъамын йигъбы хъады . Манбы пандемиейква ва кьадагъайква багълыда ыхьа. Ши шадавъуйхъа гора, шос сагъул. Шу гыргынбы игитер вобунбы! Ши шу табрикааъанбы, вушда кьадир ваацIана., хатир ыкканан. Шу вушда иш гьавъуна!», — республикайни хааIрынкъве увгьо.
Гойне регионни регьбере агъмишаийн, россиейни спортун джуна гудж, адалатыйвалла, темизийвалла гьаагуна: «Йишди дагъыстанлы джегьилершед субутаийнки, Дагъыстан ва спорт са сентыл’ водунбы.
Меб шос миннатдарийвалла билдирааъас вукан. Ши шоле гуянмишоохьи вобунбы! Сергей Меликове хъийгъа лети миннатдарийвалла тренерарширс, федерациебышди чIакIынбышис агъмишавъу.
Михаил Мамиашвиллие сербестба гьичIоокаранбышди спортсменаршин чыхышын екунбы ыIхыйханкъаI, увгьойн,кIаманда Олимпиадайс мыIгькамба гьазирувхьана. Манкъве дагъыстанлы спортсменаршини игитийваллайс ахтына кьиймат гьуво. «Зас йикIенче Дагъыстаныс, ман джегьилер чIакIы хъавъуйни едяршис , деккяршис энки хошун джуваббы эгьес ыккан. Ман наградабы геедни дагъамни заIгьматыле хъийгъа къазанмишаийнбы водунбы, — М. Мамиашвиллие джун ихтелет быкрау.
«Россиейни кIамандайн байдах ыккый залхъа тапширмишау. Йиздиме ман хаIдын гьунар водун. ЗакIле ман финал ихьесме ацIа дешдий. Манчин зас сыкIылиныд такьат гьуво. Хъийгъийни Олимпиадайлхъа хьебыдле сен аху. Манчини аллад, йишин гьаваскарар шадавъуйниме ши шаке ахаIн гьаъасын», — АIбдулрашид Садулаеве увгьо.
Мани йигъыл’ Олимпиадайн кьаIгьраманар садджу къуллухчерше деш къаршиламишавъу. Джос аIзизин спортсменар къаршиламишааъас гогьарбы, гьаваскарар абы. Мана маджлис «Лезгинка ансамблин шешитявъу.
Токиейни къыIлийни Олимпиаде 22 дагъыстанлы спортсмене иштыракау: сербестба гьичIобкурий, бокс, регби, фехтование, уIзмишивхьай. Манбышиле гъайре 11 оIлкабышди таркибе дагъыстанлыбы вухьа: Россия, Азербайджан, Белоруссия, Къузайл’на Македония, Узбекистан, Румыния, Венгрия, Польша, Канада, Къазахстан, Испания. Дагъыстанлы спортсменарше 7 медалбы алятIу. Манчике 3 къизлен, 2 нукIрайн ва 2 капширын.
