Октябрьни 21-чил’ йишди республике Дагъыстанни маданиятыний едини мизяаршин Йигъ алгъайгьен аIдат водун. Мани йигъыл’ аали мактаббышее, китабханабышее ва маданиятни ташкилатбышее джурабаджур майдамбышее маджлисбы, конференциебы, семинарбы эйхьи. Гьел’бедти, цIаIхбы ешемишоохьени хиваршеени мактаббышейид ман байрам чини къайдайл’ алгъайгьи.
14-ъэсди октябрьни йигъыл’ Бабаюртни районеени Калел’ни йыIкьнекни мактабее мани байрамыс къассырыйн 5 сыныфни шигыртаршини аIрее конкурс: «Югна едини мизекена ацIаалий» (« Лучший знаток родного языка) илгъечIу. Мани кIонкурсысын пIлан мактабни едини мизен ва адабиятын дарсбы гьелени маъаIллимае Гуляра Аслановае къурмишаъы ва мана маджлисыб йиджее вукку.
Конкурс алгъагьассе гьихъа, сыныфын утагъ гьазираъу. Диварыххъа плакатбы ыIхы, истолбышилхъа цIаIхбышди ааIлимаршин, язычершин, шааираршин китаббы, кIазет «Нур», ушахаршина журнал «Лачын» ва медын журналбы гёку. Сыныфни кундже йиссейн хаани аIрее ишлемишаъан дезгагьбы, ыIгьтаджбы гиххьы. Ушахарше цIаIхни мизел’ йишонааъана тамаше гивхьу. Манчилхъа иляакас мактабын маъаIллимар ва медни сыныфбышин шигыртар сабы. Конкурсее ушахарше едини мизел цIаIхбышди шааираршин шечIбы друстда хъаIдхъы.
Калелин йыIкьнекин мактаб едина миз ва адабият аIлгъааIни сардан , гьаммаше гьийдни джаргее водун. Сенис мани мактабе едини мизеква алаакьан олимпиадабы, конкурсбы, викторинабы ва медын маджлисбы илгъечIи. Калел’ни мактабни шигыртарше районе, республике илгъечIени едни мизекени олимпиадабышее ахтыйн джигабы аххъаххъа.
Ман мактаб гьам цаIхни мизекен джурабаджур методик экспериментбы алгъайгьен базовой мактаб водун. Мактабын шигыртар йишди миллетын аIдатбы, мыкIар, фольклор джурабаджур районе ва республике илгъечIени маджлисбышеехъа хъооIтал.
Гьел’бедти ман гьаIракатбы ва гьунарбы мактабни директорын Фергьад АIлиевын, завучын Тагьир Джанаевын ва цIаIхни мизени маъаIллимайн Гуляра Аслановайн водунбы. Манбышда хьебырсана мизений адабиятын маъаIллимар вобунбы.
Фергьад АIлиевни увгьойква, маIгьадни конкурсбыше ушахаршин гьавас едини мизелхъан, адабиятылхъан, фольклорылхъан, маданиятылхъан артымишаъа; тербие, аIшкь гуджлемишаъа.
Ши, «Нур» кIазетни редакциейн маIгьдын едини мизеква, адабиятыква, фольклорыква, маданиятыква таарыхыква багълыданан конкурс алгъавгьуни Гуляра маъаIллимайс, жюрее вухьайни мактабни маъаIъаллимаршис, ушахаршис ахтына кьиймат гьооли ва геледжагъылид угъурбы аIрзуламишаъа.
