Октябрьни 27-чил МаIгьачкъалее, Дом дружбайни джагварани утагъее ДДУ-ни едини мизяаршиква маIшкьулоохьени Марказее гьазирауйни китаббышин презентацие илгъечIу. Ман китаббы чапыке къайиккас ДР-ни миллетни сиясатын ва динын ишбы къеджени Министерствайн кумаг гьувы.
Маджлис министре Энрик Муслимове ачухавъу. Манкъве ДДУ-ни мизяаршиква маIшкьулоохьени Марказын гьааъани ишина вааджибыйвалла агъмишавъу ва геледжагъылид китаббы къайиккас кумаг гьаъасынва мислягьаIт къавдже.
Гьайни элейс М. ГьаIсановайн, Дж. Самедовын «Числовой код культуры в дагестанской паремиологической картине мира», Х.Аминовайн » Словарь лакских пословиц и поговорок», А. Куриаевын «Говорим по-кубачински», Ф. Дашлайний А.Дашлайн «Рыжик» донан китаббы чапыке хъигъечIу.
Мани маджлисе китаббышди авторарше, Дагъыстанни ааIли мактаббышди, ЫIлимни марказбышди ааIлимарше, язычерше, шааирарше, мизяаршиква маIшкьулоохьени МаскIавгъанче абыйни ааIлимарше , журналистарше ва мизени , адабиятни гьаваскарарше иштыракаы. Чыхышбы гьаъанбыше мани китаббышис югна кьиймат гьуво.
АIсас джига мани маджлисее, цIаIхбышди ва рутулбышди миллетбышдимее, Ф.Дашлайнийий А. Дашлайни китабын «ЧIорайн» авхъу. Ман хьебни мизел’ ( урусни, цIаIхни, рутулни) одкIунийн ушахаршисын хабарбынан китаб водун. Ман китаб ааIлим М. Ибрагьимовайни редакторийваликва гьазирау, Китабеедын хабарбы цIаIхни адабиятни мизелхъа язычее Кь. Омаханове, шааирарше В. Гьамзаевейий Х. Назировае, журналистарше К.Шамхаловейий Г. Керимовае гьазирау. Рутулни мизелхъа хабарбы шааире Б. Рамазанове сакIалаы. Мани китабеени хабарбышисын шикыл’бы мактабни ушахарше С. Сафаровае, Н. Джабаевае, З. Захаровае цIыцIаы.
Мариза Ибрагьимовае китабни гьаIкIеедын чыхыш гьаъанкъаI увгьойн: « Зы «ЧIорай» китабын авторар табрикааъа! Ман хьебни : урусни, рутулни, цIаIхни мизаршил’ одкIунийн китаб водун. Чапыс гьазирааъасдимее ши хаIдда ишбы къадже. Китабыл’ ооъаб быкырна десте сакIалчершина, шикыл’бы цIыцIаъанбышда, редактораршина ва корректораршина ишлемишивхьа. Зы манбышикIле сагъулва эйгьи. Инам гьаъан, гьайин киттаббы мактаббышеехъа гьихьараъасынбы . Манчин йишди ушахаршин ед’ни мизелхъан гьавас гьалед гьаIракатеехъа хъаляъас….»
Кьурбан Омаханове джуни чыхышее увгьойн : « Къийна зы шадра ворна, йизди достыни Фазил Дашлайни китабни презентацие иштыракаъас. Мана доюкана публицист, сакIалчий, шааир ворна. Джун асарбы манкъвее урусни мизел’ ойкIан ыхьейид , анджах манкъуни шечIбышее, хабарбышее, макьалебышее гьаммаше джуни миллетын рыIгь, фыкырбы водунбы. Фазил гьам цIаIхбышда, гьам рутулбышда дих ворна. Манкъуни гьаIракатыква, сакIалаыйбышика йишди шааираршин, язычершин асарбы урусна миз’ гьааъанбышилхъа, гойнед медни дюнйейл’ни миллетбышилхъа ашкарау. Йишди шааираршин асарбы урусни мизелхъа сакIалау джурабаджур антологиябышее, адабиятни китаббышее чапау водунбы. Сабара сенбына гьихъа манкъвее «Два крыла» китаб къайиккы. Маайид йишди шааираршин шечIбы гьам едини мизел’, гьамыд урусни мизел’ гьуво. ГьаIшде мана цIаIхбышди шааираршини позиейква маIшкьулехьи ворна. Манкъухъад хаIдын ниятбы ва фыкырбы водунбы. Фазил Дашлайс, йишди кьаламни чоджисБ ши садджу угъурбы аIрзуламишаъа»
Марина ГьаIсановайни увгьойка, «ЧIорай» китаб Рутул районни хъаIдхъийни управлениехъа оIтираъас. Манче манбы мактаббышеехъа битIалаъас!
