Ши гьаммаше редакциейхъа мигьман арыйнкъаI, шадощхьенбы ва чалышмиш вoохьенбы манкъус гьуIрмат гьааъас. Мигьманар гьар джурайнбы воохьи: сабы шикаятыс абайли, сабы гафыс, сабы кIазетехъани маIълуматыка, амма манбышди аIрей махуIбынбы вобонбы редакциейни коллективыка горушмишувхьес, шахъад гьиджоо дагъамийвал’бы водва ацIахьес ва ши гьааъани ишбышис хайир-дуъаI гьааъас абайленбыб кIылба деш воохьи.
ОIтмишхьайни вузани са уIлджумани йигъыл’ делесни манзикейхъа кубыс зы гьаркIынийнкъаI, мааъар йишди миллетна агъсаххъал, динэгьлий, гьуIрматуквана Шейх АIгьмад Бакаев къаджу. Салам гьуво, хъидгIын-алидгIынбы гьауйле хъийгъа, зы мана редакциейхъа гафыс хъортIул’.
Телесюгра ыхьайхъа гора, няъас увгьойе мани йигъбышил Шейх джуни невайни даватбышди мавлидейхъа аттамыш эйхьи ыхьа. АIгьмад дайий сыкIылра фыкрейхъа аркIынийле хъийгъа ва джун духйебы янашмиш вухьа декикIле шасахъа гьакIнева теклиф гьауйле хъийгъа, мана шасахъа хъары.
Редакциейхъа хъабы, коллективыка горушмишхьале хъийгъа, чей илёгъа АIгьмад дайийка ши кIазетни, миллетни, едэна миз гьуваджуйни, динни, таарыхни, йишди шейхаршди ва манзикбышди гьаIкIей гаф гьавъу.
Манкъуни увгьойква хиваршее, йишди халкьын ишбы югда ихьесдимей цIедда шахъад садибийвалла вухьес вуккан ва къеджен ишбы кумагбышиква гьаъас чалышмиш вухьес вуккан. Къеджени ишбышис йишди къулухчерше, бизнесменарше кумагбы гьелес ыккан.
«Ши санаб-саджигей девхьее, гьаарынкъве джуке аIхан кумаг гьидёве шаке гьиччуд гьааъас аIхас деш ва гьар сенле-сенлхъа миллетна вазият дагъамувхьесда. Сувале джаIмаъат кочмишхьа аIлгьаа водон, джаванар авху деш, няъас увгьое манбышхъад ишбы дешинбы ва йиджбы ихьесдимей шарааитбы гьаъа деш. Хивар кьаIра хъихьай йишда хаIбна дерд вобна», — манъкве ивгьо.
Динни гьаIкIей гаф гьааъанкъаI ши цIаIхбышди шейхаршди, динэгьлершди алла юшон вухьа ва мыслягьатейхъа хъабинбы манбышди гьаIкIей китаб окIанасва. Мана иш ши шалхъа алябтIу ва ИншаАллагь кумагбышиква ман китаб къайиккасын.
Динни гьаIкIей гаф гьааъанкъа зас йикIелгьидхынин АIгьмад дайийс са дердыб ээгьес. Мана МагьаIчкъалае гудмиш воохьени йыхъбышис ааидба вобна.
Къийна шагьарей 10 азырылхъа гьирхьырна йихъий ешемиш эйхьи ворна. Гьайни дюнйел’ хъидекIу ахвасда джар дешда. Инсан раIгьматыххъа аркIынинкъаI, дибир тIабал гьауйна дагъамийвалла воохьи.
Быкырни шагьарей са Низамудин чоджийий, Маджид дайий гьаммаше авааки. Манбыб вахт-вахтал’ чатмиш воохьи деш лазымни джигейхъа. Манчихъа гора шахъаб шагьарей 5-6 Кьуран ваацIан, мавлид хъаIбхъас вааIхан джаванар вуккан. Мана мисала гьайни делесийвале сабы саджигейхъа ГьаIджи-АIгьмад дайиqка йишди маллабыше ва агъсаххъаларше гьаллааъас вуккан.
ЗакIле гьаман ацIа йишди миллетна нена мисала гьаллааъа вухьее цIебба Шейх-АгьмаIд дайийке хайир-дуаI гьевхъас вуккан, манкъука мыслягьат къавджес вуккан. ЦIебба ши манкъуна дараджа ахтыба гьуваfджес вуккан, гойнеб мебынбише. Амма къийна манкъусахъа йишди йыхъершиле медни миллетбышин инсанар вирд гьевхъас, мыслягьат къавджес абайли.
АIгьмад дайий итIумун иманнана, йикI темизна, ачухна, кин дешда динэгьлий ворна. Джус джанана сагъвалла ва хыллийна ыIмыр арзуламииш гьааъа. Аамин!
