Гьар инсан джуни джанана саIгьыб ворна. Джанана сагъвалла инсанни ешайишике, одхьанни караке, темизийвалике, насылыке, гьихъийаллани дюнйейке аIслыба вобна.
Анджах, сасса вахтал’ дохтурын кумагдена, инсаныке вуджееджар вудж хъуваркаъас аIха деш. Дохтур, инсанар хъувабкааъас Аллагье къахувына эл’чий ворна. Дохтураршихъабыб джанан джурабаджур санаъаIткарар вобунбы. Манбышди аIрее терапевтар, хирургар, кардиологар, пульманологар, фтизиаторар, неврологар, акушер-гинекологар, стоматологар, лорар ва мебынбы вобунбы. Манбышиле дераджайс сыкIылба дагъайбынбы фельдшерар, медбратар, медсестрабы, акушеркабы, санитаркабы вобунбы. Анджах манбы дена медицина гьихъа артымишивхьес деш. Дохтуре чIырынкъус диагноз гийххьи ва гьаъасын маалидже ойкIан. Фельдшере, медсестре ва авхуйнбыше маалидже ыкекка: дарманбы гьели, вейбар ыIхийха, ыIхнабы темизяъа, ярабы ийтIал, капельницабы гийххьи, мазбы хъадагъва. ДжитIада , манбыше чIырынбышикван алакьабы гьуваджи. Манчихъа гора,сасса вахтал’ чIырынкъуке манбышилхъаб хъыгъоочIена чIырвалла илгъоочIи. Дохтураршис хаIдын кумаг акушеркабышед гьели. Манбышди ишике, къулайке ва гьаIракатыке единаб, ухойни ушахнаб сагъвалла аIслыба . Манчихъа гора дохтурни санаъаIтылхъан гьавас йикIее ихьес ыккан. АцIаал’, гьаIракат, сабыр дешхьее, дёлес хъихьес ыккан деш, манке манбы азраиляршилхъа сивийкIал.
Къийнийна йишда макьале Камбулатни ФАП-ни гьаIкIеена вухьес, агар хъодкуда увгьее манчее ишлемишеехьени акушеркайни Исакьова Малийка ЫIсмаыл’ни йищени гьаIкIее вухьес.
Сабара йигъбына гьихъа ши Бабаюртни районе сафарийе вухьайнкъаI, Камбулатни ФАП вухьа. Махъа эбчIуна сабаб инсанаршина коронавирусыкена вазият ваацIавхьай, манчикен ва медни чIырвал’бышикен дарманбы ыхьай ва маалиджебы нягьаIдый ыккекка ацIахьай вухьа.
Ши махъа гьабкIынийнкъаI ФАП-на хааIрна ПирмагьаIммадов Камил’ Расулна дих ишил’ деший. Мана отпускейий ворна. Шас ФАП-ни гьаIкIеедын маIълумат медсестре Османова СалигьаIт Баширни йище гьувы.
«Коронавирусыкена вазият Камбулат пис’ба дешобна. Йигъыс профилактик ишбы хивни джамаъаIтыква, мактабни маъаIллимаршиква, шигыртаршиква ыккекканбы. Мани хастаалике чIырыхъувхьайнбыб вухьайнбы. ХаIббананбы хъувабкыйнбы. Агар йыIкьын чIырынбы вухьее, ши хабар Тезе Быршни амбулаториехъа гьооли, нейиб Бабаюртни районеени больницейхъа. Манче дохтураршина биргада абайли. Ши чалышмишоохьенбы вахтал’ мани азарын оIги профилактик ишбышиква къацIакIванас. Манчинимеега инсанаршис вакцинабы ыIхийха, маскIабы хъаъас, хылеббы, аккабышин ручкIабы дарманыква темизяъа. 100 инсаныс коронавирусыкена вакцина Камбулатыл’ гьавъу вобна. Къийна ФАП-ее цIеддыйн кумаг гьелесын дарманбы водунбы, анджах ахуйн дарманбы дешинбы. Маалидже гьаъани инсанарше вейбар, дарманбы илещи. Вузас ФАП-ыс дарманбы алищес 800 манат пылна къоокка. Маныд няхъаджад къийхьар деш»,- СалигьаIт Османовае увгьу.
Хъийгъа маIнкъее шакIле ФАП-ын гозера гьагу, маалиджебы гьаъан инсанар гьаагу. ШакIле манбышин фыкырбы ацIахьа.
Камбулатни ФАП-ээ 2012 сенике акушеркана Исакьова Малийка ЫIсмаъыл’на йиш ишлемишеехьи ворна. Хивни джамаъаIтни увгьойква, мана ишик авейкIына ва акушеркайн санаъаIт гьаIракатыква гьаъана джегьил’ ворна. Гьам мана йишди миллетна йиш ворна. Ши маIнкъыква гаф гьавъу.
Малийка едике 1987 сен калелий ЫIсмаыл’ни хизанее едике йихьа. МаIнкъына дек’ цIаIхийгъалий, ед’ аварка ворна. Калелин йыIкьнекин мактаб таамауйле хъийгъа, мана МаIгьачкъалайни Аскерхановни дойил’ни медицинайни колледжехъа эйчIу. 2008-ъэсди сен ман таамау хъары Ленинни бинайл’ни ( калел’бы, джинаIгбы, атталбы, коршбы ешемишоохьени бинайл’) медсестрана ишлемишеехьи гиргъыл’. 2012 сенилхъамее мааъар ишлемишийхьа. Адамийс Камбулатхъа аркIынле хъийгъа, маIнкъее джена иш джига бадалавъуна. Переквалификацие гьау, Камбулатни хивни ФАП-ээ акушеркана ишлемишеехьи гиргъыл’. 2012 сениле къийнийни йигъылхъамее мана мааъар ишлемишеехьи ворна.
— ГьаIшде хивее 70 мактабеехъа идяакIанан ушахар вобунбы. Графикыква ши манбышикван профилактик ишбы ыккекканбы. Йигъыс ФАП-ехъа чIырын ушахар ёхламайс абайли. Къелис йыIкьын едар ши учотеехъа алябатIа. Ушах ихьесда вахт дёлес хъувхьайнкъаI , манбы больницеехъа оIтирааъа. Манбышда джанана тегьер йыIкьбахьее , районни больницеенче дохтур акушер- гинеколог хъойтIал. Ушах ыхьайле хъийгъад ши едилиб чаранылиб мугъаетоохьенбы. Гьел’бедти, дагъамийвал’бышикваб сасса вахтал’ хъызааханбы. Сен-сениле вухооханбышин сай хаIдхъехьи водун. Манчиква йишда ишиб хаIбхъоохьи. Манчихъа ил’дяакы, мана хаIбна шадвалла вобна. Шаца 29 ушахар едике вухьа. Гьалекийс гьайни сен 13 ушах едике вухьа. Ухоохасынбыб вобунбы», — Малийке увгьы.
Хъийгъа маIнкъее ФАП-хъа абыйн едий ушах кьабылявъу.
Ши Малийка Исакьовайс джанана сагъвалла ва ишее угъурбы аIрзуламишаъа.
