Гьар сен 21-ъэсди февралил’ дюнйейл’ Едини мизяаршин йигъ алгъайгьи. Манчина метлеб мизяаршилхъа фагьам гьувой, манбы къорамишауй ва артымишауй вобна.
Дюнйейл’ аазырбышиква мизяар водунбы. Сабара мизяаршил’ юшонаъан халкь хаIдда водун, сабаранчил’ сыкIылда кIыл’да. КIылда халкьнани мизяаршихъад язынан мизяар ва язы дешин миллетбы водунбы. Анджах ООН-ыи, ЮНЕСКО-йн кьабыляуйни кьаанунбышиква гыргыни мизяаршихъад са ихтиярбы ва тIабалбы водунбы. Мани ва медни ташкилатбыше гыргын мизяар къорамишааъасын джурабаджур мислягьаIтбы кьабыляъа. Анджах манчихъа ил’дяакы, гьар джура сабаббышихъа гора, сенис дюнйейни акьвале мизяар ит’батехьенбы. Манчиква саджигее миллетын таарых, адабият, маданият, фольклор, генофонд батмишехьи.
Дагъыстан Россиейн гьар джура миллетбы ешемишехьен эн хаIбна республика вобна. Гьел’бедти, маайид хаIдда мизяар водунбы. Манчин сабарабы дагъыстанын (аварна, агъулна, даргийна, лезгийна, лакна, табасаранна, рутулна, цIаIхна ва медын язы дешин) мизяар водунбы, шенсабы дагъыстанее ешемишоохьени миллетбышин (кумукна, нагъайна, татна, чеченна, урусна ва медын) мизяар водунбы.
Республикайни конституцейква мани мизяаршихъад инкишаф ыхьесдимее са ихтиярбы водунбы. Анджах манбы гьуваджи деш. Масалан, цIаIхни, агъулни, рутулни мизяаршилин мактаббышисын тезе стандартбышиква одкIунийн китаббы къийнад къайиккы дешодунбы. Ман тахсир садджу ДР-ни хъаIдхъийни ва ыIлимни министерствайн джад деш водун, ман мани миллетбышди эл’чершин, депутатаршин, къуллухчершин водун. Манбы балее авхъаахъа деш. Садджу миллетни дойиле джос, джони ушахаршис къуллух тIабалааъа. АцIа дешки манбышикIле, миз’дешди миллетихъад геледжагъыд дешин.
Манчихъа ил’дяакы, сенис йишди республикее едини мизяаршис къадсырыйн олимпиадабы, конкурсбы, маджлисбы джурабаджур майданбышее, хъаIдхъийни ташкилатбышее илгъечIи. Мани ишбышеейид гьенки заыIфын иштырак йишди районын гьаъа. Мысаджад Рутулни районни мактаббышди ушахарше мани йигъынджагъбышее иштыракаъа деш. Ман тахсир районни чIакIынбышин, хъаIдхъийни управлениейн, мактабни директораршин водун.
Анджах мани ишее югун гьаIракатбы Къизилюртни ТУО-хъа гядакIвани Калел’ни, Теземуслагъни, Камбулатни мактаббыше гьагва. Гьар сен манбыше едини мизеква ва адабиятыква багълыданани конкурсбышее, олимпиадабышее ахтыйн джигабы аххъаххъа.
Февральни 17-чил’ ДИРО (маъаIллимаршина дараджа ахтыхъааъани институте) 11-ъэсди сыныфбышди аIреедын шечIбы хъаIдаххъанбышин республикайн конкурс илгъечIу. Гьайни сенийн конкурс онлайн режиме илгъечIу.
Мани конкурсе иштырак Калел’ни мактабни 11 сыныфни шигыртее Лезгиева Пери Рамизни йище, Теземуслагъни 11 сыныфни шигыртее Османов Рамазане РаIгьманни дихе иштырак гьау.
Пери Лезгиеве конкурсе шааир ШейхаIлий ХанаIгьмадовна шеч’ «Йизда Ватан» друстба йикIеке хъаIбхъы, Рамазан Османове Кьурбан Омахановна шечI «КьоIнахъавъуна Ватан». Гойне манбышилхъа суалбы гьуво. Р. Османов интернет ишлемишдехьайхъа гора, прямой эфиреехъа хъигъечIес дехьана. Манкъуна шечI вацапыква оIтиравъу. Анджах институтни конкурсни комиссейни сайтеехъа абчес девхьана.
Манбышди хъаIбхъийс кьиймат комиссиейни садрее Кь. Омаханове ва комиссейни уIзвее Ш. ЫIсаеве гьуво. Манбыше кьоIнисана шигыртыс югна кьиймат гьуво ва ДР-ни хъаIдхъийни ва ыIлимни министерствайни дипломбышис лайикьавъу.
«Нур» кIазетын Перийий Рамазан ва джон маъаIллимар конкурсе гъамувхьайква табрикааъа!
