Февральни къаюкьаIнчил’ Бабаюртни районеени цIаIхбышди ушахарше хъаIдаххъани мактаббышее едини мизел’ шечIбы хъаIдаххъанбышин конкурс илгъечIу. Ман къонкурс «Нур» кIазетни ва ЦНКА-ни мислягьаIтыква къурмишау.
Гьар сен февральни 21-чил’ едини мизяаршис къадсырыйн Йигъ алгъайгьи. Мани йигъбышее джурабаджур майданбышее едини мизяаршиква алаакьан конкурсбы, олимпиадабы, форумбы, ыIлимын конференциебы ва медын йигъынджагъбы илгъечIи.
МаIгьдын йигъынджагъбы Сувал’ни маIгьалыл’ни ва Бабаюртни районеени цIаIхбышди мактаббышейид алгъайгьенбы. «Нур» кIазетни редакциейн гьаргьаммаше манчилхъа хаIбна фыкыр гьооли ва ман йигъ байрамылхъа сакIалаъа. Гьайни элейс сабара багьнабышихъа гора, Сувал’ни маIгьалылхъа вуIххъас ваIвхы деш. Анджах, гьаммашийн аIдат гьуваджы , редакциейн ишчера хааIрни редакторыыква Байрам АIбдуллаевыква Бабаюртни зонайлхъа конкурс алгъагьас гьабкIын. Гьихъа маани мактаббышди директораршис редакциейн хабар гьувона.
ШечIбы хъаIдаххъанбышди конкурсе хьебни йыIкьнекни мактаббышди (Камбулатни, Калел’ни, Теземуслагъни) шигыртарше иштыракау. Ман Калел’ни йыIкьнекни мактабее илгъечIу. Конкурсее иштыракаъас гьар мактабеенче хьебыйре шигырт ары. Конкурсни жюрийн манбы хьебни дестейлхъа: дагъайдни сыныфбышин шигыртар, йыIкьнекни сыныфбышин шигыртар, чIакIни сыныфбышин шигыртар, джуравъу. Гьар дестее, гьар мактабни са ушахее иштыракау. Ушахаршиква поэзиейлхъа тамаше гьааъас мактаббышин завучар ва едини мизен дарсбы гьелен маъаIлиммар абы. Ман маъаIллимараб жюрийн уIзвубына гивхьы. Конкурсыс къабсырна маджлис Калел’ни мактабни директоре Фергьад АIлиеве ачухавъу. Манкъвее абыйн мигьманар саламыква къаршламишавъуйле хъийгъа, конкурсни иштыракчершис угъурбы аIрзуламишау. Гойне саламыкван чыхыш «Нур» кIазетни хааIрни редакторе Байрам АIбдуллаеве гьау. Манкъвее конкурсна метлеб агъмишавъу ва гыргынкъус угъурбы агъмишау.
Манчиле хъийгъа, конкурсна иш гибгъыл. ЦIедда шечIбы дагъайдни сыныфбышди, хъийгъа йыIкьнекни, чиле хъийгъа чIакIни сыныфбышди шигыртарше хъаIдхъы. Манбышди гьаарункъуни гьаIракатбышис жюрийн баллбы гиххьы. Жюрийн кьиймат гьооленкъаI, шечI’ друстба хъаIбхъийлхъа, шечIни маIънайлхъа, ушахни гьаIракатылхъа ва шечIни оIлчийлхъа гьуво. Гьаарни жюрийни уIзвее гьар шигыртыс джун баллбы гиххьы. Гойне манбы сана-санчилхъа хъаляу. Ненкъвейий хаIдын баллбы алеетIу, манкъус 1 джига гьуво. Гьайни элейс иштыракаъан ушахар кIылба вухьайхъа гора, садджу гьар дестейни санкъус 1 джига гьуво. Анджах грамотабы ва кIылин пайбы гыргыни конкурсе иштыракауйни ушахаршис гьувойнбы.
ШечIбышди конкурсе ушахарше йишди шааираршин, Малла АIбдуллайн, Гьарун Ибрагьимовын, УлуцIаIхийн, Лекий Юсуфын, Кьурбан Омахановын, АIгьмад Давудовын, ШейхаIлий ХаIнаIгьмадовын шечIбы хъаIдхъыI.
Гьел’бедти, шас ыкканний медни йишди шааираршин Сафар АIбдуллаевын, Валегь Гьамзатын, АIбдурагьим Дадашевын, ВаIгьид Мирзоевын, Дабуз Шевкетын, Селим Джафаровын, Алескер ГьаIджиевын, Хан-Алмазын шечIбы къайиххьы. Манбышихъадыд Ватанни, мизени, муIгьубни, табиятни , миллетни гьаIкIее одкIунийн уфтанын шечIбы водунбы.
Ши ушахаршис джигабы садджу жюрийн гиххьыйни баллбышис сикIы гьуво.
Дагъайдни дестее цIеббыйна джига Давудов АIбдулле ( Калелин мактаб) авхъу. ЙыIкьнекни дестее цIеббыйна джига ГьаIдаева Джамиле ( Теземуслагъын мактаб) авхъу. ЧIакIынбышди дестее цIеббыйна джига Османов Рамазане ( Теземуслагъыан мактаб) авхъу.
Анджах , йишди увгьойква, 1 джига Мамедов Нурмагьаммадысыб
( Камбулатын мактаб) гёохьаний.
Ши манбы конкурсе гъамувхьайква табрикааъа.
Конкурсе манбышиле гъайре Мамедов Саиде, АIгьмедова Тамаре, Мусаева Макке, АIгьмадов ГьаIбибе, Омарова Динаре иштырак гьау. Манбышед шечIбы югда хъаIдхъы. ХъооIни элейс манбыше 1 джигабы, инам гьаъан, аххъас. Манбышис мани ишее гьаIракатбы, гьавасбы ва угъурбы аIрзуламишаъа!
Конкурсын екунбы грамотабы ва пайбы гьувойка таамхьа.
