Мартни 16-чил Къызларни районе ешемишоохьени цlаlхбышда маджлис вухьа. Мигьманар джуни хааъаб Джамал Мусаеве къаршиламиш гьавъу. Маджлис Мирное хивни имамни Ислам Шигьбиядовни мыlслягьатука илгъевчlу.
Къызларни торпахыл’ гудмишоохьени джамаъаlтбышди эл’чершиквани горушеехъа Магьаlчкъалэнче РГВК «Дагъыстан» цlаlхни мизел’ни телеверлишбышда редактор Бейдулла Ибрагьимов ары.
Хаани ийессе мигьманар йишди миллетни къайдайл’ни нуlъматбышиква истолылхъа гювъаравъу. Чейни истаканыле хъийгъа, журналисте гыргынкъуке хъидгlынбы-алидгlынбы гьау, манбышди ешайишике марахламишхьа.
Мишлешелий Магьаlммадаlлий Ибрагьимове джуни ыlмырна хабар гьааъанкъаl увгьойнки, вудж гьале кlыл’рананкъаl хизан Азербайджанни Закаталайни шагьареехъа кочмишувхьа. Йыlкьнекин мактаб таамау, Маскlав Плехановни доюл’ни халкьни тасарруфатни институтейхъа иккечlу. Манчиле хъийгъа йигlыдле сенна Миноборонайни военторгее ишлемишхьа. 1995 сен юрдулхъа, Дагъыстанеехъа саркlыл’. Гьаlшде хизаныква Тезеромановка хивее ешемишехьи.
М. Ибрагьимовни джуваббышихъа гора, вудж, джуна хьунаще ва хьебыйре ушахар ыlмырыле разийба вобунбы. Джохъаб нишикенаджаб кеситийвалла дешда. Чалышмышоохьенбы Къызларни районени цlаlахбышикван алаакьабы акlандяъас. Манчини аллаб вахтыле-вахтылхъа мигьманар кьабыляаъас гьаракат гьаъа, шинаб манбышаанкъаl мигьманна вуххъаl.
Магьаlммадаlлий Ибрагьимовни хааъаб садджу ед’ни мизел’ юшоноохьи. Манкъуни увгьойка, ед’на миз Аллагьыке хъооlна баракат вобна.
Къийнийни джегьилершини гьаlкlее гаф гибхьыйнкъаl, манкъве манбышис ацlааликва вухьай мыlслягьат къавджу. «Агар вахъад еттыгъын ацlаал’ водхьее, манбы ыlмырее ненкехьеед лазымхьесынбы», -М. Ибрагьимове агъмишау.
Гыл’мецlгъанчени агъсаххъале Аlзим Гъаlзимагьаlммадове джуна гаф дагъамни ушахийвалике гибгъыл. Мана 1941-ъэсди сен едике ыхьа. Манкъукlлеб, оlлкайни хаlббанани ушахаршикlле хьинне, манчина уфтанийвалла, шадвалла къавджу деш. Аlзиме мактабын 6 сыныф быкырауме, декке джуква къазанджыс Азербайджанхъа аляртlу. Хъийгъыйни ыlмырее хаlдданани дагъамийвал’бышихъа ил’дяакы, манкъве едике ыхьайни хивее югун хав аляу.
Аl. Гъазимагьаlммадовын ёкьцlалилхъа авадкьырийн сенбы Къахни районни Агъйезийни хивыка багълыда ыхьа. Манкъве мааъад саламатын ешайиш ыккы, хивынбышди аlрее хаlбна гьуlрмат къазанмишавъу.
Сабара гагьыле Совет гьуlкумат дагъылмишхьайн. Азербайджан доланмишхьай дагъам хъихьа. Мани сабабыхъа гора, мана ватанылхъа сакlалас кьарарылхъа хъары.
Аlзим Гъазимагьаlммадове Къызларни районе тезе юрд абчы. Гьаlшде мана хизаныква Къызларни совхозни 3 отделение ешемишехьи. Ишни ветеранни увгьойка,гьавъуйни ыlмырыле пашманра ахвасын джига дешин. Садджу гьаlшде Украинайл’ ааlни спецоперациейке хаджалат водун, — агъсаххъале агъмишау.
Мишлешелий Муса Къубалыев Къызларни районехъа 1986-ъэсди сен кочмишхьа. Гьаlшде Тезегеоргиевкайни хивее ешемишехьи. Гьини хивее цlаlхбышда 3 хизан вобна. Манкъуни увгьойка, йишди еррыбышин, Аллагьылхъа шукур, доланмишхьай писда дешин.
М.Къубалыев аlхыреени вахтал’ гьиняаъани цlаlхбышди аlрайл’ Исламни динылхъан мугьуlббат хаlдхъихьава гуянмишехьи. Гьайни сенни январьни 26-чил’ Къызларни шагьаре йишди миллетнаи джамаlъатбышда маджлис вухьа. Манчее Сувал’ни магьалыл’ни гыргыни хиваршини эл’черше иштыракау. Мааъад Къызларни районни имаме Уlмарасгьаб Маджалове Дагъыстанни Муфтиятни доюле цlаlхни халкьыни джамаъаlтыс миннатдарийвалла агъмишааъан кагъыз гьуво. Манчин республикайни динэгьлершини арайл’ шахъаб хаlбна гьуlрмат вухьай эйгьен водун.
Мишлешелий Джамал Мусаев — Къызлар ешемишехьен хьебцIалиле агъаллан сенбы водунбы. Хивни тасарруфатни тавул’нани вахтал’ «Кизлярский» совхозни тlымыл’бышди багъбышее ишлемишхьа. Манбы арайле адкlынийле хъигъа, тикинтийни ишбышиква машгъулхьа. «Мал гьуваджий йишди халкьни эбее водун. Зынаб са-кьоlбле гьаlйван хааъаб гьувааджена. Манчиле гъайре гьавасука дирингее ишлемишехьи. Архайинни вахтал’ къонши хиваршеехъа мигьманна гьайкlан», — манкъве увгьо.
Тележурналист Бейдуллайкан захъадыд кIылин ихтилет ыхьа.
— Зы молюдле сенна Муслагъни хивее маъаlллимийвалла гьавъу. Гойне Цlаlхни мактабее ишлемишхьа. Мани вахтал’мааъад Абутlалиб Мурадове хъаlдаххъа ыхьа. Манкъве одкlунийн кар зас геед дагъамданий башдахьен. Манчихъа ил’дяакы, Абутlалиб литературайке гуджнара ыхьа. Зы юшонайин дарс джуваб-джувабна йикlеххъа аляатlан манкъухъад гьунар ыхьа.
Йигъбышди са йигъыл’ манкъука мактабехъа хъооlни хиягъбышди ичерше закlле эйгьен: «Аlлий маъаlллим, Тlалибе ХыIягъни хивеехъани йаlххъыл’ къаргна гьайкал гивхьес ва манчини гачбышди ооъадни плакатыл’ «Аlлий маъаlллимыс Тlалибыкена пай» окlанасва увгьо. Манчис гыргынкъве ахъаlнабы гьау. Зы Тlалибыкlле увгьойн: « Йиздиме энки хаlбна пай йигъын югда хъаlдхъый вобна. Арайле хаlдда сенбы адкlын, манкъун джуваббы зы оlгийлджад кlелиханаийнбы.
Сабара сенбына гьихъа зас Челябинскгъанче манкъве пайис ноутбук къахову. Зы манчин къапагъ къалхмишаийнкъаl, мааъаб алидкIырийни гачбышиквана къаргна шикылий. Санихьыйна шигырт, къийнийна «Майя» фабрикайна директор Абутlалиб Мурадов джувабыл’ илёрзул’на…
Хъийгъа зас Къызларни районее юрд абчес кьисматхьа. Гьиняаъаб ушахар чlакlы хъейбхьа, манбы эвле-атта гьавъу. Гьувойни ыlмырыс сабур-шукур…
Бейдулла маджлисни иштракчершике «Едике вухьайни хиваршее, Сувал’ни магьаlлыл’ нягьаlб чакба воохьива марахламишхьа?» Манчис гыргынкъве са гIаленчехьинне увгьойн: «Гьелбетте, аlзизни джигабышеехъа зарара-зарара уlххъас шавус декканий. Амма манчисда маджал воохьи деш. Манчихъа ил’дяакы, югни-писда йигъбышил’ джамаъаlтыка вухьес чалышмишоохьенбы».
Маджлисни аlхырее инягьдын горушбы сыхда-сыхда алгъагьас мыlслягьатейхъа хъабы, няъас увгьее сана-санкъукани гафын, ихтилетын инсанар гьалеб делес хъааъа.
