Дагъыстанее чlырынбышис, зарар хъетlуйнбышис экlда кумаг гьелесдимее медицина катастрофа ташкилат аахъыйн са манмегад хаlдда сенбы дешинбы. Манчихъа ил’дяакы, мани ташкилатее ишлемишоохьени дохтурарше, фельдшерарше хаlбба начахынбышис чини вахтал’ кумаг гьуво.
Къийна манбы нейинки дюзил’ни районбышейхъа, акьаlнани сувабышейни хиваршейхъа утlумра чlырынкъусхъа гьивийхьаранбы. Пандемиейни вахтал’ манбы хаlм-йигъна ишлемишоохьи вухьа. Манбыше чини вахтал’ гьагуйни кумагын, хаlббанани инсанаршина сагъламийвалла гьувааджы.
Давудов Эл’мир Шавкатна дих къийна чlырынбышис экlда кумаг гьагванбышди джаргее ворна. Мана ишилхъа гиргъыл’на сабара вахт вобна. Къийна манкъун до иш югба вуккеккани дохтураршини джаргее водун. Мана гьаммаше джуке аlхаlн кумаг начахынкъус гьелес гьаlзирра ворна.
Эл’мирна ватан Коршна хив вобна. Манкъвее едике ыхьайни хивее дагъайдни сыныфбышин мактаб быкырауйле хъийгъа, хъаlдхъый Джинаlгъни хивни йыlкьнекни мактабей давамау. Мааъад йыцlыдсадъэсын сыныф таамау дохтурун санаъаlт алятlастимее Таганрогни шагьарейхъа аркlын. Таганрог медицинай колледж югни кьийматбышика быкырау Дагъыстанейхъа саркlыл’. 2021-ъэсди сениле медицина-катастрофа ташкилате фельдшерна ишлемишехьи ворна.
Джуни ишни гьаlкlее гаф гьааъанкъаl, йишди джегьил фельдшере эйгьен: «Къийна ши санавиациейка, Дагъыстанни гыргыни джигабышей воохьенбы. Йишда макъсад чlырынкъус экlда ва югун кумаг гьувой вобна. Манбышда сагъламийвалла гьуваджесдимее, ши цlеддыйн кумаг гьелен. Йиздимее чlырынкъус кумаг гьелес аlхый хаlбна хошбахтийвалла вобна».
Эл’мирни джуваббышихъа гора, джуни ишиква алакьаба джурабаджура чlырынбы растына хъавайли. Манбы къел’хылис зиян хъетlуйнбы, цlайикейий хьинеке гёбхьунийнбы, йикl ыкlаранбы ва сабар мебынбы воохьи. Манбышди аlрайл’ хаlбба ешлибыйий ушахарыб растына хъавайленбы. Йишдимее тафавут дешин. Гыргынкъус экlда ахаlни саягъыл’ кумаг гьелен. Йизда иш авхуйни дохтурашина хьинне пандемиейни вахтал’ гееб дагъам хъувхьа. Чlырынбы хаlбба вухьайхъа гора, ойзар ыхьа. Манке фыкрее ишиле аркlыний ыхьа. Амма къийна захъад маlгьдын фыкырбы дешинбы.
Джегьил фельдшерихъад хаlдда пlланбы водунбы. Манчини аlрайл’ кьомана джига геледжагъыл’ хъаlдхъый давам гьауй водун. Мана Дагъыстанни медицинайни академиейхъа иккечlес гьаlзирехьи ворна. Манчиныд Эл’мирыхъад медицинайлхъа водун аlшкь, ацlал’ сикылдад хаlдхъаъас.
Заквани гафни аlхырее Эл’мирее джун гьамбазар гьийгъанче хъооlни джони байрамыква табрик гьавъу. Манбышис угъурбы аlрзау.
Шинад йишда джаван фельдшер табрик гьаъуна. Манкъус фыкреедын ниятбы быкырхьес кьисмтахьенва увгьо.
