Апрельни къаехьебенчил’ МаIгьачкъале, «Горная долина» шадлыгъбы илгъечIени утагъее цIаIхни миллетна ифтар илгъевчIу. Мани маджлисее 400 инсанее иштыракаы.
Ифтареехъа абыйнбышди аIрее Дагъыстанни динэгьлершини управлениейн, муфтиятын эл’чер, гьар хиваршеенче, шагьарбышеенче – МаIгьачкъаленче, Дербентгъанче, Къызларгъанче, Каспийскенче ва Рутулни, Бабаюртыни районбышеенче адыйн цIаIхбышди джамаъаIт ыхьа. Джони аIрее хиваршин имамар, динэгьлер ва мебын инсанар вухьа.
Ифтар хъаIдаххъани нашидбышиква ачмишивхьа. Гойне маджлис вуккекканкъвее ушахар майдамеехъа хъобтIул ва манбышилхъа динни гьаIкIеедын суалбы гьуво. Хъодкуда джаваббы хъувойнбышис исламни динни гьаIкIеедын ушахаршин уфтанын китаббы гьувы.
Гойне манкъвее джуваб ЦIаIхни дерайл’ни фонд «Инсанни» филиални хаIрынкъус АIсадуллагь гьаIджийс гьуво. Манкъвее джуни чыхышее гьиджо иший аIхреени сенбышее фондын Сувал’ни дерайл’ вукку хаIдын маIълумат гьуво. Вуккеккани ва гьааъани ишини гьаIкIеедын кIылин кино гьагу. АIсадуллагь гьаIджийни увгьойка, фондын аIсас кумаг касиб хизанбышис, чIырыни инсанаршис, хав-уджагъ гёдхьунни инсанаршис, дареехъа гябкIыйни инсанаршис пылыква, одхьанни карака, дарманбышиква гьели. Манкъвее увгьойн: «Гьел’бедти, ши гьеленбышдийий аляатIанбышди аIреебын аIрачеера вобунбы. Инсанарше шасахъа садакьа хъели, шинад ман лазымни инсанаршилхъа гьихьараъа. Мани карее шас хаIдын кумаг Мамедов Мамедее джуни духйебышиква, мусалагъбышди АIзизейий ШаIъбане, гыл’мецIбышди Адиле, Рамазане, Мустафе, Рутулни 1 мактабни директоре Ямудин маъаIллиме ва мебынбыше гьаъа. Манбышис Аллагье гьалеб хаIбна баракат гьевлена. ДжамаъаIтни сураке манбышикIле сагъул-варул эйгьи»
АIсадуллагь гьаIджее фондыни дойиле Мамедов Мамедыс ШаIъбанни духайс миннатдарийвалла агъмишааъан кагъыз гьуво.
Гойне маджлис вуккекканкъвее джуваб ДР-ни муфтиятеенче арыйни хааIрни динэгьлийс Зайнуллагь гьаIджийс гьуво. Манкъвее ифтарбышда вааджибийвалла йишонавъу ва Исламни динни гьаIкIеена ваIъаз гьуво.
Ифтарее цIаIхни мизелин чыхыш «Нур» кIазетни хааIрни редакторе Байрам АIбдуллаеве гьаы. Манкъвее ифтареехъа абыйнбы Рамандини вузаква табрикавъу ва динни сардан иш вуккеккани ЦIаIхни дерайни имамни ишис ахтына кьиймат гьуво. Б. АIбдуллаевни увгьойка, гьайни сен Эл’дар гьаIджийни, джуни гьамбазаршини, волонтёраршини гьаIракатыква, кумагбышиква цIаIхбышин ифтарбы МаскIавни, Екатеринбургни, Берёзовскни, Челябинскни, Волгоградни, Саратовни, Ростовни, Астарханни, МаIгьачкъалайни, Къызларни шагьарбышее илгъечIу. МаIгьадни йигъынджагъбыше инсанар сана-санкъуква танышааъа, муIгьуббатбы гьеххаъа.
ЦIаIхни дерайни имаме Эл’дар гьаIджий Сулейманове кумаг гьувойни инсанаршис миннатдарийвалла агъмишавъу. Манкъвее шадлыгъбы илгъечIени зални ессийс ШаIъбан Кьасумовыс миннатдарийвалла агъмишааъан муфтиятни сурален кагъаз гьуво.
Мани маджлисее Дагъыстанни генерал- полковник М. Танкаевни дойил’ни джегьилершини патриотический фондыни садрее, ДР-ни халкьни маджлисни депутатни кумагчее ГьаIсангьуIсен АIбдулджалилове иштырак гьаы.
Манкъвее мани маджлисее «Нур» кIазетни хааIрни редакторыс Байрам АIбдуллаевыс юбилейный орден «Честь и гордость Дагестана — золотой орёл», « Строитель ХХI –век» донани ташкилатни гендиректорыс ШаIъбан Кьасумовыс орден «За заслуги перед Рутульским районом», ЦIаIхни дерайл’ни фонд «Инсанни» регьберыс шарафукан лышан « Генерал-полковник М. Танкаев» гьуво.
ДжамаъаIтни сурале чыхыш маджлисее агъсаххъале АIбдураIгьман ГьаIджиеве гьаы.
АIрее-аIрее нашидбы хъаIдхъы. ХаIнелин он аляумее, сабыйнбыше саджигее сивар гьахуы. Гойне джамаъаIт кубар гьаы. Манчиле хъийгъа викторина вухьа. Инасанаршини аIрее пайбы гьувагы. Гьувагани пайбышди хаани аIрее ишлемишаъан кIухнеедын ыIгьтаджбы, диванбы ыхьа. Манбы спонсорарше алищу. МаIгьаб цIаIхбышда ифтар таамувхьана.
