Июльни 14-чил’ Дагъыстанна хааIрна Сергей Меликов ишиква алакьара Рутулни районе ыхьа. Манкъуква саджигее республикайн чIакIын къуллухчера , сабара министерствабышин регьберар мааъаб вухьа. Районее манбы инсанаршини ешайишиква ва экономикайни вазиятыква танышивхьа.
Абыйн чIакIын мигьманар мактаббышее, больницее ва медни социал ташкилатбышее ыхьа. Районни хааIрункъве Ибрагьим Ибрагьимове манбышис районни экономикайна вазият йишонавъу. Анджах республикайна хааIрна районе вуккекани ишиле гейр разийра аху деш. ХаIдда гьаIллаъасын суалбы къалхымишау. Манбы медицинайква, хивни тасарруфатыква, хъаIдхъийква , экономикайква, ешайишиква багълыдананбы ыхьа.
ШакIле ацIан ман дагъамийвал’бы гьалед хаIдда Сувал’ни маIгьалыл’ водунбы. Анджах республикайни хааIрункъуна сафарий махъамее вухьа деш. Йишди миллетын дагъамийвал’бы «мычIахни кунджее» аху. Инам гьаъан манбы ашкархьесынбы, няъас увгьее абыйни мигьманаршин сабаранбы ЦIаIхни дерайлхъа гьабкIынийнбы. Манбышди аIрее сайир Дагъыстан Республикайни хъаIдхъийна ва ыIлимна министр Бучаев ЙаIгье ГьаIмыд’на дих ыхьа. Манкъуква саджигее Сувал’ни маIгьалылхъа министерствайн ишчера, Рутул районни хъаIдхъийни управлениейна хааIрна АIгьмадбегов Ферман Амруллагьна дих гьабкIын. Махъа гьабкIынна метлеб джигайл’ Сувал’ни магьаIлыл’ни мактаббышда иш , вазият, дагъамийвал’бы къаджей вухьа.
ШакIле ацIан мактаббышиква багълыбанана вазиятыб йишди дерайл’ гейб югбаб дешобна. ЦIеббыйна дагъамийвалла еттыгъба ушахар мактаббышее девхьай вобна. КьоIбъэсда дагъамийвалла – йиссейн мактаббы, хьебыдъэсда дагъамийвалла мактаббышее гьаIшдийни хъаIдхъийсын шарааитбы дехьай. Мактаббышихъад аIдатый спортын майданбы, котельныйбы, ушахаршис хораг хъойхьаран ва кар ойхьанан утагъбы, мыкIан ва къуIман хьянбы, джурайн туалетбы дешинбы. Хьебыдъэсда дагъамийвалла – хъаIдхъийн китаббы мактаббышее дехьай. Масалан, къийнад тезени Госстандартбышди тIабалбышиква одкIунийн китаббы цIаIхни мизелин ва адабиятын дешинбы. Манчин сабара рукописьбы гьазирда водунбы. Анджах пыл Дагъыстанни хъаIдхъийни министерствайн къидийкыйхъа гора, манбы МаскIав илёдзур аху водунбы. Нишихъа горайий манбы къидекка, манчина сабаб гьиджоойий, йишди миллетыхъар не мактаббышее, не хъаIдхъийни управлениее, не районее, не республике суалбы къалхымишаъана инсан дешда. Анджах медни мизяаршин китаббы чапыке къайиккыйнбы. ЦIаIхбы, агъулар, рутулар «етимар» вобунбы. Министырни гьийд ман суал къалхымишаъана районе инсан дехьана. Ёьубъэсда дагъамийваллаб, джегьил’ маъаIллимар мактаббышее девхьай вобна. Агар хъодкуда увгьее, манбышис оIги гьидёвой вобна.
ХъаIдхъийна ва ыIлимна министр ЦIаIхее хивни администрациейни хааIрункъвее Вагиф АIлиеве ва ЦIаIхни дерайни имаме Эл’дар Сулейманове къаршламишау. Мана цIеррыйна республикайни хъаIдхъийна министр ворна йишди дерайлхъа арына.
Й. Бучаев цIерра кубыс ЦIаIхни дерайни йыIкьнекни манзикехъа эчIу. Кубаршиле хъийгъа, Эл’дар гьаIджее мана манзик- мадрасайква танышау. Мигьманыс манчин таарых йишонау. Китабхаанени Кьураныква, аIраIбни мизел’ одкIунни китаббышиква танышау. Гойне министр хивни администрациейни хааIрункъуква инсанаршини ешайишиква ва мактаббышди вазиятыква марахламишхьа. Манбышди аIрее ишиква багълыбанана гаф вухьа. Вагиф АIлиевни увгьойква, гьайни делесийвале джо МаIгьачкъалее горушмишивхьесынбы ва сабара мактаббышиква багълыданан суалбы гьаIллаъасын мислягьаIтбы къаджес. Эле гьамани горушее цIаIхни мизел’ни ва адабиятни китаббышиква багълыданан суалбыд къалхымишаъасынбы.
АIхреени сенбышее хил’дже мактаббышис ремонтбы гьауйнбы. Анджах къаанчен безяг са-кьоIни сениле харабехьен. Манчихъа гора, тезе бинаабы гьаIшдийни тIабалбышикван аляъас ыккан.
Гыргынкъус югун гьелен!
