РИА «Дагъыстане» Россиейл’ ишилхъа адчыйни «Югун хав, югна маlгьалла, югун ешайиш» донани конкурсука багълыданан горуш илгъечlу.

Ман конкурс «Единая Россия» партиейн Россиейни тикинтийни министерствайка санад алгъайгьи. Илгъечlуйни горуше регионни «Единая Россия» регионал партиейни мани ишбышихъа иляккани управлениейна координатор Хиби Аlлиеве, республикайни ешайишни инспекциейна хааlрна Сергей Касьянове, «Йишин хав, йишин подъезд» донани проектна координатор Ибрагьим Ыlсаеве иштыракау.

Журналистаршикан горуш аахъанкъаl Хиби Аlлиеве увгьойн: «Тезе ишилхъа адчыйни проектыхъаб хаlбна гудж вобна. Манчин инсанаршин иш вуккеккани ташкилатбышикван алакьабы гьаlракатейхъа хъаляъас. Манчиныд хайбышее, подъездбышее, магьаlллабышее уфтанийвалла гьааъас.Конкурс хьебни этапна илгъечlес. Цlеддыйн этап августни вузани 15-чил’ таамхьес. Кьоlдъэсди этапе конкурсейхъа хъувойни санаъаlтбышика танышувхьес. Хьебыдъэсди этапе екунбы ыккейс. Гъамувхьайнбышис кумаг гьелес. Манчиле гъайре конкурсыхъад йихьыдле номинация водун. Манбы «Мугьуlббатыкан хав», «Югу подъезд», «Югна маlгьалла» ва сабара медынбы водунбы».

Республикайни ешайишни инспекциейни хааlрынкъве Сергей Касьянове  конкур алгъаъанкъаl ташкилатни гьийд илёдзурни мисалабышике йишонхьа. Манкъуни увгьойка, къийна ташкилатын инсанаршин ешайиш сибык хъаъасдимее хаlбна иш вуккека вобна. Гойне хьинне, тезе ишилхъа адчыйни проектын хайбышис, мааъаб ешемишоохьени инсанаршини, хаlбвалла гьааъани ташкилатбышин аlрайлин хаlдданан проблембы аlрейнче алятlас кумаг гьелес.

Горушын екунбы ыккеканкъаl Хиби Аlлиеве проектни ваджибийвалике гаф гьавъу. Конкурсе гыргынбыше иштыракаъас ыккан. Манче  ахтыйни бинабышее ешемишоохьени инсанаршис растына хъавайлени мисалбы аlрейнче алятlасдимее хаlдын кумаг гьелес.  Манчиле савагьийда, проектын гьаlшде Россиейл’ ишлемишехьен сабара ешайишика багълыданан кьанунбы  бадалаъасын имканбы гьелес.